Uă phan bơna OCOP bơh càr Dăk Lăk dê neh đơs nền bơta bơkah niam, bơta pin dờn ờ mìng mờ cau ngui tàm lơgar lơm mờ gam brồ guh tus tàm dunia. Pơn rơ bè phan bơna OCOP geh uă bơta niam 5 sơmañ gar mắc ca Dăk Lăk bơkah ngan bơh Kông ty Kổ phần Damaca Nguyên Phương, kơnhoàl Krông Năng dê. Sơr lèt gan ală bơta kal ke bơh sơnrờp, mờ bơta pơnđơl pràn lơh ngan bơh he dê, nam 2021, phan bơna gar mắc ca Dăk Lăk bơkah ngan bơh kông ty dê lơh geh sră dờp OCOP 4 sơrmañ. Tơnơ̆ 3 nam, sơrlèt gan uă dar sền sơwì kal ke ngan, tŭ do phan bơna geh đơs wơl mờ khà điềm 100 tàm 100 điềm, mờ gơs phan bơna geh bơta bơkah niam 5 sơrmañ bơh càr dê.

Jat mò Nguyễn Thị Thu Phương, Kwang atbồ Kông ty Cổ phần Damaca Nguyên Phương, pà gĭt, bơh tŭ phan bơna dờp geh sră dờp OCOP 4 sơrmañ, drà tăc bro phan geh rề ơnàng. Mò Nguyễn Thị Thu Phương, đơs:“Phan bơna bơh Damaca Nguyên Phương dê neh geh mat tàm 47 càr, ƀòn dờng bơh lơgar Nhờk dê. Gơwèt mờ drà kă bro lơgar Hàn Quốc den kung ai geh ală bơnah phan lơh tơrlòng lài tus mờ lơgar do. Tŭ do bol añ kung gam lơh broă mờ bàr pe drà kă bro geh bơta ƀuơn, bơta pràn bè drà kă bro lơgar Lo, bàr pe drà kă bro tàm ală lơgar Ả Rập den kơ̆p gơn ngan tàm tơngai tus rơ̆p dờp geh bàr pe tềl tơngŏ niam bơh drà kă bro do dê”.

Kung là 1 tàm ală phan bơna tàm sră cih mat phan bơna geh uă bơta bơkah niam 5 sơrmañ bơh càr Dăk Lăk dê tus bal sền sơwì phan bơna OCOP kấp Dà lơgar mờr tus, phan bơna kơphê pì Kiên Cường bơh Kông ty TNHH MTV Kiên Cường, ƀòn dờng Buôn Ma Thuột, càr Dăk Lăk neh lòt gan tŭ tơngai sùm tam gơl niam phan bơna. Phan bơna do neh geh pà sră dờp phan bơna OCOP 4 sơrmañ bơh nam 2021. Mờ sồr pal ngai sơlơ uă ngan bơh cau ngui dê den mpồl lơh sa kă bro pal sùm tam gơl pa nàng tơnguh khà sơmañ nàng lơh geh jơnau kờñ drà kă bro tàm lơgar kung bè tăc mờ lơgar ndai. Ồng Hoàng Mạnh Cường, cau tờm mpồl lơh sa kă bro pà gĭt, phan bơna Kơphê pì Kiên Cường neh tăc tus ală lơgar Nhờk, Hàn Quốc, Phillipines mờ Australia.  Ồng Hoàng Mạnh Cường, đơs:“Ngai sơlơ pal lơh niam rlau tai nàng sền gŏ gơnoar broă, tiah lơh broă mờ tiah tăc bro phan tàm drà kă bro dê. Dơ̆ 2 là tàm broă ngui ngai sơlơ uă cau sền gròi tus bơta niam bơh ală sră dờp dê. Sră dờp phan bơna OCOP do tơngŏ kung bè đơs loh mờ drà kă bro là, cau tờm khi pal hơ pơr gon mờ pal lơh di ngan mờ niam ngan tŭ bol khi neh geh dờp. Bơh hơ̆ lơh geh dùl drà kă bro ngan ngồn pal geh bơta niam rlau tai”.

Đắk Lắk tŭ do geh 237 phan bơna OCOP lơh geh bơh 3 tus 4 sơrmañ, 2 phan bơna geh uă bơta bơkah niam 5 sơrmañ. Jat ồng Nguyễn Hoài Dương, Kwang atbồ Sở Nông nghiệp mờ Phát triển Nông thôn càr, do là khà ờ hoan uă ngan gơwèt mờ 1 tiah geh uă bơta ƀuơn, bơta pràn bè lơh sa suơn sre, ƀòn lơgar bè Dăk Lăk dê. Nàng ngui niam ngan rlau tai bơta ƀuơn, bơta pràn do, tàm tơngai tus, Sở Nông nghiệp mờ Phát triển Nông thôn càr rơ̆p pơgồp bal mờ ală gah geh gơrềng pơn jat tai dong kờl ală cau tờm OCOP tơnguh uă bơta bơkah niam phan bơna neh geh dê, kung bè lơh geh uă phan bơna pa jat ală anih lơh sa, lơh gơlik phan mờ tăc bro phan, pơlam gùng dà lơh geh mat kă bro phan bơna OCOP kấp Dà lơgar. Ồng Nguyễn Hoài Dương, đơs:“Sở Nông nghiệp sùm geh broă lơh, gùng dà broă lơh, broă rơndăp lơh nàng bal mờ ală tiah dong kờl lơh geh ală tiah lơh sa tơrgùm bal, lam lơh wơl lơh sa jat gùng dà geh tơl jơnau kờñ dờp sră geh dờp, geh tiah tờm lơh gơlik wèt tus gàr niam lơngăp lơngai, sền gàr tiah ơm kis, lơh geh ală jơnau kờñ kal ke ngan bơh ală lơgar bè Nhờk halà câu Âu dê”.

 Gơtùi gŏ ală cau tờm OCOP neh rcang lài tàm broă lơh ai phan bơna càr dê bơh “tàm ƀòn lơgar” lik tus” drà kă bro dờng. Càr Dăk Lăk kung kơ̆p kờñ ală phan bơna geh bơta ƀuơn, bơta pràn bơh càr dê, bè: kơphê, tiêu, ka kao, kòi phe, mắc ca... tŭ lơh geh phan bơna OCOP 5 sơrmañ gơtùi ngui jơh bơta niam tŭ tơngai niam bơh ală hiệp địñ kă bro khat gơboh rài pa mờ Việt Nam gam là lơgar tàm mpồl nàng tus bal mờ tăc bro phan tàm drà kă bro dunia dê”.