Pa do, Mpồl duh broă sền sơ wì, tàm pà khà phan bơna OCOP càr Dăk Lăk neh ring bal sră cih mat 25 phan bơna lơh geh jơnau kờñ phan bơna OCOP 3 sơmañ, 4 sơmañ kấp càr tàm nam 2022 gơwèt Broă lơh tơl xã dùl phan bơna tơngai bơh nam 2021- 2025, tơnguh kờp jơh ală phan bơna OCOP tàm càr dê gơguh tus 143 phan bơna.

Tàm 25 phan bơna OCOP pa geh dờp dơ̆ do geh 7 phan bơna lơh geh khà OCOP 4 sơmañ mờ 18 phan bơna lơh geh khà 3 sơmañ. Ală phan bơna geh dờp jơnau kờñ OCOP rơ̆p geh Ủy ƀan Ñân zân càr Dăk Lăk lơh geh khà 3 sơmañ. Ală phan bơna geh dờp lơh geh jơnau kờñ OCOP rơ̆p geh Ủy ƀan Ñân zân càr Dăk Lăk pà sră dờp, geh ngui mat kă bro dờp phan bơna OCOP Việt Nam mờ khà sơmañ in tàm kơldung phan bơna dê jat jơnau sồr. Cồng nha dờp tam pà khà geh kwơ tàm 3 nam.

Nàng tơnguh uă bơta kwơ phan bơna lơh geh bơh lơh sa suơn sre ală tiah dê, tơngai tus, càr Dăk Lăk pơn jăt tai dong kờl ală cau tờm phan bơna OCOP in tơnguh uă bơta bơkah niam, dong kờl ală mpồl lơh sa kă bro, Hợp ták xã tàm tơrbŏ bal cau kờñ blơi phan bơna mờ cau kờñ tăc bro phan bơna, jòi cau lơh broă bal lơh sa, rề ơnàng drà kă bro. Ồng Huỳnh Ngọc Dương, Phó Kwang atbồ Sở Kông thương càr Dăk Lăk pà gĭt: “Ală phan bơna tus bal ndrờm geh dờp ală broă lơh dong kờl bơh càr dê. Dơ̆ 2 là ală phan bơna lơh geh jơnau kờñ OCOP bơh 3 sơmañ tus 4 sơmañ bol añ geh ală sră nggal cribơyai ai ală anih lơh broă bơh ală Sở Kông thương ală tiah tàm gùt lơgar mờ ală anih lơh broă gơ hòi gơ jà kă bro dà lơgar bơh Sở Kông thương hơ̆ dê tàm ală bơta nàng tàm tơrbŏ bal mờ ală anih tam pà phan mờ ală tiah tăc phan tàm ală tiah dê nàng lơh pràn broă tăc bro”.

Ngai 14/8 pa do, Cơldŭ lơh broă đơng lam pơgồp bal broă lơh bơt bơtàu ƀòn lơgar pa càr Dăk Lăk neh bơyai lơh pơrjum mblàng yal, yal broă lơh tơl xã dùl phan bơna nam 2023.

Pơrjum sền sơ wì ală phan bơna OCOP neh sơr băc mhar đơs nền gơnoar broă, geh drà kă bro dờp rò niam ngan, dong làng bol cau lơh broă sa rề ơnàng broă lơh sa, tơnguh bơta kwơ phan bơna dê, bơh hơ̆, pơgồp bơnah tàm trờn rơndăp tăp sèng lơh sa, tơnguh uă priă lơh geh, rài kis làng bol mờ lơh jăt geh cồng nha mpồl jơnau kờñ “lơh sa mờ bơyai lơh lơh broă sa” tàm ală jơnau kờñ dà lơgar dê bè bơt bơtàu xã ƀòn lơgar pa.

Bơdìh mờ cồng nha neh lơh geh, broă lơh OCOP tàm càr Dăk Lăk kung gam geh bàr pe bơta ờ hềt di pal, bè: ală broă lơh dong kờl gơwèt mờ cau tờm bơh ală phan bơna OCOP gam ết ngan, ală phan bơna OCOP gam ờ hềt pràn, broă lơh gơ hòi gơ jà kă bro gam rah rài, ờ tơl bơta dùl ròt bal, ờ hềt lơh geh bơta tờm bơtàu tơnguh uă, niam ngan nàng lơh geh rùp hin, bơta kwơ kă bro.

Tàm pơrjum ală kwang bàng neh geh yal bè mìng dùl tơngume “Broă lơh tơl xã dùl phan bơna, bơta mờng chài lơh broă tàm lơgar mờ dunia bè bơtàu tơnguh lơh sa tàm tiah ƀòn lơgar”, “Ală broă ai tơlik tơnơ̆ 5 nam lam lơh jăt broă lơh OCOP tàm càr Dăk Lăk”. “Bơta tờm broă lơh OCOP dê. Kơnòl broă bơh ală anih lơh broă cíñ trị tàm broă lam lơh jăt Broă lơh OCOP. Jơnau bơsram mờng chài lơh broă, broă lơh tờm tàm tơngai bơh nam 2023-2025”.

Đơs tàm dơ̆ pơrjum, ồng Nguyễn Thiên Văn, Phó Củ tịc Ủy ƀan Ñân zân càr Dăk Lăk đơs sùm, mờ jơnau đơs “Bơta bơkah niam lơh gơs măt kă bro”, bal mờ bơta pơnđơl pràn lơh ngan bơh tơl nă cau tờm phan bơna dê, sồr ală Sở, ngàñ, ală tiah sền gròi rlau tai ală broă lơh dong kờl gơwèt mờ cau tờm bơh ală phan bơna OCOP dê ngan là tơnguh uă bè bơta pràn jak atbồ, lơh gơlik phan mờ kă bro phan bơna. Ồng Nguyễn Thiên Văn pà gĭt:“Bơta mut lơh bal bơh kấp ủy gơnoar atbồ ală tiah dong kờl ai ală cau tờm phan bơna in kung bè bơtàu tơnguh ală phan bơna cèng wơl bơta kwơ bơh ală tiah bơh he dê, geh ală broă lơh kwơ màng bơtàu tơnguh phan bơna mờ lơh uă drà kă bro nàng phan bơna geh tiah tăc bro mờ lơh geh uă bơta nàng bơtàu tơnguh lơh sa- mpồl bơtiàn ai làng bol in tàm broă bơsong broă lơh, priă lơh geh”.

Phó Củ tịc Ủy ƀan Ñân zân càr Dăk Lăk kung sồr anih lơh broă geh gơnoar pal tơrgùm bơto pơlam, dong kờl ai ală phan bơna neh cih mat tus bal Broă lơh OCOP bơh ală kơnhoàl, thị xã, ƀòn dờng tàm nam 2023 jăt jơnau sồr pa bơh Ală jơnau kờñ OCOP dà lơgar dê; mhar pờ ală ơdŭ bơto pơlam ai kwang bàng atbồ broă lơh OCOP ală kấp mờ ală cau tờm phan bơna in tus bal tàm broă lơh bè lơh sa, lơh broă rơndăp lơh kă bro, lơh mat kă bro, marketing mờ yal tơngĭt, lơh uă phan bơna ai ală anih lơh gơlik phan in tus bal tàm broă lơh OCOP nam 2023; sơlơ tơnguh broă lơh yal tơngĭt, mblàng yal bè broă lơh OCOP.