Tŭ sa piang klo ngai, anih tăc piang Lê Na, tàm ƀòn Akŏ Dhông, ƀòn dờng Buôn Ma Thuột, càr Dăk Lăk uă ngan năc tus sa. Mìng bơh 40 rơbô đong lơm, năc gơtùi rơ wah bơh 3 tus 4 phan sa, geh phan sa hang, phan sa chàng, phan sa buh, phan sa ƀŏ mờ biăp dà. Bơta is ồn ngan là jơh ală phan sa do ndrờm trŭ gơm jat broă trŭ gơm bơh yau bơh kòn cau Rơđê dê, tĕ ală phan tĕ bơkah ngan, pơn rơ ngan bơh bơta hòi mờ bơtang. Pa hòi dùl bơnah piang mờ biăp blơn bơtang, nha bùm blàng chàng, poăc sur buh tàm bơrlŭ bal mờ boh mrĕ, bi Lê Vạn Tiếp, ơm tàm sơnah ƀòn Ea Tam, ƀòn dờng Buôn Ma Thuột pà gĭt, bi sùm tus sa klo ngai tàm tiah do: “Lài do, añ mìng geh sa phan sa do tŭ lòt tàm ală ƀòn lơgar, bàr pe dơ̆ sa chờ hờp. Geh tŭ kờñ sa den kung trŭ gơm is sơl mơya ờ geh bơta bơkah bè làng bol tàm tiah do dê gơm. Mờ tŭ do den añ gŏ tàm ƀòn dờng Buôn Ma Thuột geh bàr pe anih tăc piang cau lơh broă in cèng ală phan sa pơn rơ ngan hơ̆ tàm phan sa drơng ai năc lòt  nhơl in gơ lơh gơ kờñ ngan, ală phan sa do sa bơkah ngan, geh uă bơta sac rơwah rlau”.

Jat bi H’Rul Niê, cau tờm anih tăc piang Lê Na yal, kơnờm phan trŭ gơm geh uă ngan bơh ƀòn lơgar dê, phan sa li la, anih tăc piang ngai sơlơ gơ hòi gơ jà năc. Tơnơ̆ dùl tơngai lơyah, anih tăc piang neh geh tai 3 anih ndai tàm ƀòn Akŏ Dhông, pờ tăc bơh 10 jiơ drim tus 10 jiơ mang. Bi H’Rul Niê, yal: “Kờñ sa phan sa lơi den năc cih tàm sră den he lơh trŭ gơm jat jơnau kờñ bơh năc dê, ngan là nha bùm blàng, piăp pài, biăp blơn bơtang, ka rì, plai bơl hông ƀŏ, biăp kloan, núc nác.... Añ blơi jơh ală bơta biăp bơh kòn cau Rơđê dê jat kàl”.

Bơh tiah mìng trŭ gơm drơng ală dơ̆ sa chờ hờp halà gơm jat jơnau sồr bơh ală mpồl năc lòt nhơl dê, bơh bồ nam tus tŭ do, uă hìu bơnhă tàm ƀòn Akŏ Dhông neh ntrờn tus drơng piang sa cau lơh broă in. Ală phan sa bơh jŏ ƀuơn ngan tàm ală ƀòn lơgar, tŭ do gơ gơs “phan sabơkah pơn rơ”. Bi H’ Minh Byă (gam hòi là mè Jay), cau tờm anih tăc piang Mnga Tăng Bi, ơm tàm ƀòn Akŏ Dhông pà gĭt, ală phan sa geh bơta tam gơl ai gơ in di pal mờ uă ngan năc tus sa: “Năc kung gal ngan sơl, tŭ do trŭ gơm kung uă ngan. Añ gơm jat broă bơh kòn cau Rơđê dê, geh uă bơta tam gơl dồ ết, ờ hòi, ờ bơtang, di pal ai cau lơi in kung sa gơtùi lơm. Phan sa den uă phan den là he pơgồp bal, ngai lơi kung tam gơl phan sa, geh phan trŭ gơm lơi là he gơm phan sa hơ̆”.

Ờ mìng tàm ƀòn dờng Buôn Ma Thuột lơm, piang sa cau lơh broă in mờ pơn rơ ngan là phan sa kòn cau Rơđê dê kung neh geh tàm thị xã Buôn Hồ. Bi Lê Thanh Vinh, năc lòt nhơl bơh ƀòn dờng Hồ Chí Minh đơs là, phan sa kung là broă nàng làng bol tiah do in yal tơngĭt bơta niam chài he dê. Bi Lê Thanh Vinh, đơs: “Añ kơlôi là mờ bơta gơ kờñ ngan bơh ală phan sa bơh kòn cau Rơđê dê den kung là dùl bơta nàng gơ hòi gơ jà năc lòt nhơl tàm uă tiah tus mờ ù tiah càr Dăk Lăk dê. Tài bơh lòt nhơl den bơdìh mờ ù tiah niam den phan sa kung là dùl bơta tờm ngan lơh nền dùl bơnah lơi hơ̆ tàm broă sac rơ wah bơh năc lòt nhơl dê”.

Ờ duh pal gơn tus dơ̆ lơh chờ halà mut tàm ală ƀòn lơgar ngài ngan, tŭ do năc tus mờ càr Dăk Lăk gơtùi ƀuơn ngan sa ală phan sa bơh yau bơh kòn cau Rơđê dê tàm nggùl ƀòn dờng Buôn Ma Thuột tơn. Ală bơnah piang sa cau lơh broă in neh ai uă phan sa bơh ƀòn lơgar dê tơmut tàm rài kis pa tŭ do, gơ gơs “phan sa bơkah pơn rơ” phan sa drơng uă ngan làng bol mờ năc lòt nhơl in mờ giă priă brah brài ngan.