Bơh anih tờm kơnhoàl Kbang, càr Gia Lai, hìu bơnhă bi Nguyễn Thị Thu Huyền, năc lòt nhơl bơh Hà Nội, neh geh dùl gùng lòt chờ ngan jòng mờr 70 kơi sồ jat gơl gùng càr 669 nàng tus liang dà Lơ Lung, gam hòi là liang Pe (Ba Tầng), tàm ƀòn Kon Bông, xã Đăk Krong. Tàm do, jơh hìu bơnhă mut bal tàm nhiòng dà lơngơm mrềt, sàng ngan mờ ù tiah brê bơnơm dờng ơning ơnàng. Kơnòm dềt nhơl ñŏ tiah dà thờl, tàm tŭ cau dờng nđàr ka mờ cùp rùp tềng hơđơm mƀur tờm chi, dờp geh nhơm sàng goh bơh brê bơnơm dờng dê. Cau lam mpồl lòt nhơl là làng bol tàm tiah do dê, dong năc lòt nhơl in sền gĭt bơta hàng niam gùt dar liang dà. Tơnơ̆ 2 ngai lòt nhơl chờ ngan, jơh mpồl rê wơl tàm ƀòn nàng sa ală phan sa barah barài bè biăp brê, ka dà croh mờ dà lơwe brê. Jơh ală bơta ndrờm bơh làng bol tàm tiah do dê tam is mờ ròng is lơm. Bi Huyền pà gĭt: “Bơh gùng lòt jòng nàng tus tàm do là di pal ngan. Lòt kal ke dồ ết sơl mơya ù tiah niam ngan! Dờng ơnàng ngan. Liang dà niam ngan, trồ tiah kung lơh jat nùs nhơm cau dê sơl. Ngan ngồn là dùl dơ̆ lòt nhơl hừh nùs ngan”.

Gơwèt mờ ală năc lòt jat mpồl kờñ lòt sền mờ sền gĭt niam chài niam ngan bơh kòn cau Bahnar dê, làng bol rơ̆p jà khi ơm wơl tàm hìu ơm ing. Trồ mang gơmù, năc lòt nhơl rơ̆p iăt gùng dròng cing jañ mồng mờ tam ya xoang bal mờ làng bol tàm ƀòn dê kềng gah gơnru ồs hơng sùm. Mìng bơh nhai 01 nam 2024 tus tŭ do, ƀòn Kon Bông neh wă rlau 40 mpồl năc, pah dơ̆ mpồl năc geh bơh 20 tus 30 nă cau. Khi sền gĭt bè bơta bè ờs ngan bơh brê dờng, bơh dà croh lŭ mơ liang dà Ba Tầng dê. Làng bol kòn cau Bahnar tàm do pa lơh kwèng mờ broă wă năc lòt nhơl. Kơnờm bơh hơ̆ ờ geh bơta lơh broă ờs mờng, bềng bơta barah barài do mờ năc lòt nhơl gơ lơh sơlơ kờñ ngan. Ồng Đinh Văn Nhú, Ƀí thư Ci ƀộ, kwang atbồ ƀòn Kon Bông, yal: làng bol bòl añ wă năc mờ jơh nùs nhơm bơh he dê: “Ală phan bơna bơh làng bol tàm ƀòn dê lơh geh bè: iar, sur ròng lềng mờ prìt sơng kò ờ geh mat, geh năc lòt nhơl kờñ ngan. Tŭ do geh uă hìu bơnhă tàm ƀòn neh geh phan bơna mờ tus bal drơng broă năc. Ci ƀộ ƀòn kung mblàng yal nàng làng bol in sơlơ tơnguh tai bơtàu tơnguh lơh sa,, tam tờm chi sa plai, ròng sur kòn cau mờ iar, ada, tam mbar jù. Bol añ gam gàr niam broă bơsram tàp mpồl cing mồng mờ mpồl tam ya xoang nàng drơng năc lòt nhơl in”.

Tiah sền gàr brê bơnơm geh is dunia Tiah kơh bơnơm Kon Hà Nừng ơm tàm tiah đah tô mat tơngai lik càr Gia Lai, rềp nhàr bal mờ càr Kon Tum, Quảng Ngãi mờ Bình Định, kờp jơh geh bă ù ơnàng rlau 413 rơbô lồ. Tiah tờm bơh tiah do dê là Brê Dà lơgar Kon Ka Kinh mờ Tiah Sền gàr brê bơnơm geh is Kon Chư Răng, uă ngan là brê yau mờ brê dờng. Ồng Nguyễn Hồng Quân, Phó Kwang atbồ Tiah Sền gàr brê bơnơm geh is Kon Chư Răng đơs là bơta ƀuơn, bơta pràn bơtàu tơnguh lòt nhơl brê bơnơm, lòt nhơl rơngòt rơngơ̆t tàm do dờng ngan. Mơya gơ lơh bè ờ hềt geh cau lơi sền gròi:“Tiah sền gàr brê bơnơm geh is Kon Chư Răng geh rlau 20 nơm liang dà gơtùi tơmut tàm broă bơtàu tơnguh lòt nhơl. Bơcri priă lơh tàm ală gah lòt nhơl là tŭ niam nàng yal tơngĭt Tiah Kơh bơnơm Kon Hà Nừng tus mờ ală mpồl cau tàm lơgar mờ ală lơgar dê”.

Ồng Nguyễn Văn Hoan, Phó Kwang atbồ Sở Broă lơh sa mờ Bơtàu tơnguh Ƀòn lơgar càr Gia Lai pà gĭt càr gam lam lơh uă broă lơh lòt nhơl mpồl bơtiàn mờ lòt nhơl ƀòn brê bơnơm nàng kờñ lơh tai broă lơh broă sa kơ̆ kơl jap ai làng bol jơi bơtiàn dồ ết nă cau kis tàm tiah rềp nhàr in. Càr kung gam lơh broă rơndăp lơh ngui niam bơta kwơ uă bơh tiah kơh bơnơm Kon Hà Nừng dê mờ ală broă lơh geh ngan nàng kờñ tơnguh uă priă lơh geh ai làng bol tàm tiah do in: “Càr Gia Lai neh tơlik mat Mpồl atbồ Tiah sền gàr brê bơnơm geh is Tiah kơh bơnơm Kon Hà Nừng, bơh Phó Củ tịc Anih duh broă làng bol càr dê lơh kwang atbồ mpồl. Bơh hơ̆, càr gam lam lơh ală tơngume geh ngan tàm broă lơh ngui niam bơta kwơ do dê, bè lơh logo pơrya mờ pang web ngan ngồn. Jơh ală phan bơna broă lơh sa geh tam tàm do kung rơ̆p geh lơh anih sơñio ù tiah, nàng kờñ tơnguh uă bơta kwơ”.

 Ală lơh ngan ngui niam ală bơta kwơ niam chài mờ brê bơnơm geh is tàm Tiah sền gàr brê bơnơm geh is Tiah kơh bơnơm Kon Hà Nừng bơh càr Gia Lai dê gam pờ geh gùng lòt pa ai bơta bơtàu tơnguh kơ̆ kơl jăp in. Rùp hin barah barài mơya gơ kờñ ngan bơh cau tàm tiah kơh bơnơm dê, brê dờng tàm rơndăp rơndồl, dà sàng ngan lơngơm mrềt, liang dà kò dờng ơning ơnàng... ngan ngồn rơ̆p là tiah tus ngai sơlơ uă năc lòt nhơl tàm lơgar mờ ală lơgar dê. Kon Hà Nừng neh geh pơrlai guh.