Lơh jăt broă lơh bơt bơtàu suơn lam lài, ồng Trần Anh Lang, ơm tàm thôn Mỹ Sơn, xã Duy Phú, kơnhoàl Duy Xuyên, càr Quảng Nam lam lài tam gơl pa suơn bơh hìu bơnhă ồng dê, ơnàng mờr 2 lồ nàng tam ală bơta phan tam lơh geh priă jền, bè: plai bung, kroăt, kruêt, tơngời... Ồng Trần Anh Lang pà gĭt, lài do suơn do uă ngan tam ală bơta phan tam tàm bơr lŭ bal, cồng nha lơh sa ờ uă. Geh gơnoar atbồ tiah do sền gròi, ồng Lang neh sơnđờm tam gơl pa suơn lam lài. Tŭ do, suơn ồng Trần Anh Lang plai chi tơ̆t plai uă mờ cèng wơl priă lơh geh uă ngan. Ồng Trần Anh Lang gam tam tàm bơr lŭ bal mờ ală bơta phan tam lơyah ngai bè khoah rơbài, ƀùñ, biăp sàng goh, pơgồp bal mờ kòng ka dà bè ờs nàng tơnguh priă lơh geh. Ồng Trần Anh Lang, đơs: “Lơh geh suơn lam lài, dơ̆ 1 ai cồng nha lơh sa hìu bơnhă in, mơkung bơto pơlam broă lơh sa ai ală hìu bơnhă ndai in tai. Dà lơgar dong kờl ai he in lơh suơn lam lài là 5 tơlak đong mờ suơn do neh cèng wơl cồng nha lơh sa”.

Ờ mìng is hìu bơnhă ồng Trần Anh Lang lơm, bơh tŭ lơh jăt broă lơh tiah làng bol ơm kis ƀòn lơgar pa lam lài, uă hìu bơnhă tàm xã Duy Phú, kơnhoàl Duy Xuyên, càr Quảng Nam neh tam gơl broă kơlôi sơnơng, broă lơh nàng lơh geh ală suơn brê bơnơm mờ ù tiah tơlir, sàng goh, niam bơnĕ, pơgồp bơnah sơlơ tơnguh lơh sa, bơtàu tơnguh lơh sa mờ tơnguh priă lơh geh. Mò Trần Thị Dương, Củ tịc Ủy ƀan Ñân zân xã Duy Phú, kơnhoàl Duy Xuyên pà gĭt: Tus tŭ do jơh gùt xã neh lơh niam wơl, lơh 70 suơn, kờp jơh bă ù ơnàng 15 lồ, tàm hơ̆, geh 10 suơn lam lài jat jơnau sồr. Broă lơh suơn lam lài geh lơh mờ tam tờm chi tam jăt rơndăp ù tiah, tơl broă lơh cèng wơl cồng nha lơh sa, tơnguh priă lơh geh ai cau lơh broă sa in. Jat mò Trần Thị Dương, tus tŭ do, khà hìu bơnhă rƀah bơh xã dê gam 4,88%, priă lơh geh kờp bal tơl nă cau lơh geh rlau 47 tơlak đong dùl nam. Mò Trần Thị Dương, đơs:“Ală broă lơh suơn lam lài neh tơnguh uă bơta gĭt wă ai làng bol in, bơh hơ̆, ală hìu bơnhă rềp bal bơsram jăt bal lơh jăt lơh geh jơnau kờñ ù tiah bơh suơn dê nàng tam ală bơta phan tam cèng wơl cồng nha, kwơ màng rlau là lơh geh tiah ơm kis niam. Gơnoar atbồ xã dong kờl sơntìl phan tam, bơto pơlam lơh sa đòm jăt bơta chài pa ai làng bol in, làng bol mìng ai ù mờ sơng ka sền gàr lơm”.

Bơdìh mờ broă dong kờl tơl hìu bơnhă 5 tơlak đong lam lơh broă lơh suơn lam lài, kơnhoàl Duy Xuyên, càr Quảng Nam lơh pràn broă lơh mblàng yal, hòi jà làng bol yờ tơnguh uă bơta gĭt wă sền gàr tiah ơm kis. Mơkung bơto pơlam, ai ală sơntìl phan tam pa geh cồng nha tơnhào uă tàm broă lơh sa nàng kờñ tơnguh uă bơta kwơ phan lơh geh bơh suơn sre dê, lơh uă tiah lơh sa suơn sre, ƀòn lơgar jăt gùng dà lòt nhơl brê bơnơm mờ sền gĭt. Ồng Đặng Hữu Phúc, Phó Củ tịc Ủy ƀan Ñân zân kơnhoàl Duy Xuyên, càr Quảng Nam pà gĭt: ală nam do, gah lơh sa suơn sre mờ gơnoar atbồ kơnhoàl dong kờl làng bol rlau 1 tơmàn đong nàng bơcri priă lơh uă broă lơh suơn lam lài. Bơh hơ̆, neh lơh tam gơl bơh bơta gĭt wă tus broă lơh bơh tơl nă làng bol dê tàm broă bơtàu tơnguh lơh sa suơn dê, lơh geh ù tiah ƀòn lơgar điờm gơs, bềng bơta kis. Ồng Đặng Hữu Phúc, đơs:“Bè cồng nha gơwèt mờ ală suơn lam lài, bơdìh mờ broă lơh geh ù tiah ơm kis, ù tiah tơlir, sàng goh, niam bơnĕ, mơkung pơgồp bal dong làng bol tơnhào phan bơh ală tờm chi tàm suơn hơ̆, tam gơl rài kis lơh sa hìu bơnhă dê. Bơh priă jơnau kờñ dà lơgar bơt bơtàu ƀòn lơgar pa, tàm hơ̆ geh dong kờl bàr pe broă lơh ai ală hìu bơnhă làng bol in nàng lơh niam wơl suơn chi lơh geh ù tiah ơm kis niam, lơh geh priă jền ai ală hìu bơnhă làng bol in. Priă jền do neh lơh jăt geh cồng nha gơwèt mờ tơl suơn lam lài dê”.

Tŭ do, càr Quảng Nam geh 170 tiah làng bol ơm kis ƀòn lơgar pa lam lài mờ rlau 250 broă lơh suơn lam lài. Tàm tơl suơn lam lài, cau lơh broă sa đòm jăt bơta chài măi mok pa bè crăp ală ding tuh dà is, halà ngui sơntìl phan tam pa tàm broă lơh sa nàng lơh geh cồng nha uă. Kờp bal, tơl suơn do ai priă lơh geh bơh 150 tus 200 tơlak đong dùl nam. Ồng Hồ Quang Bửu, Phó Củ tịc Ủy ƀan Ñân zân càr Quảng Nam pà gĭt: broă lơh lơh tiah làng bol ơm kis ƀòn lơgar lam lài, lơh geh suơn lam lài bơh sơn rờp cèng wơl cồng nha, lơh geh bơnàng jă nàng wèt tus rài lơh sa suơn sre sàng goh, lơh sa suơn sre hữu kơ, hời rơ hời lơh geh ù tiah ơm kis ƀòn brê bơnơm kơ̆ kơl jap.