Dùl tàm ală broă lơh pơn rơ ngan srơh “Rơnàng kơnòm să sơm bat tê bal bơt bơtàu ƀòn lơgar pa” bơh ơruh pơnu càr Gia Lai dê lam lơh nam 2023 hơ̆ là broă lơh lơh gơl gùng ơruh pơnu “Àng- tơlir- Sàng goh mờ Niam” tàm ƀòn Thơh Ga B, xã Chư Don, kơnhoàl Chư Pưh.  Broă lơh geh bơta jòng mờr 1 kơi sồ geh crăp 20 bong đèng năng lượng măt tơngai mờ tam 200 tờm chi mờ kờp jơh priă jền rlau 60 tơlak đong. Gơl gùng ơruh pơnu “Àng- Tơlir- Sàng goh mờ Niam” geh ai lòt rê neh pơgồp bơnah lơh tam gơl muh mat ù tiah ƀòn lơgar mờ gàr niam lơngăp lơngai rơndăp tăp sèng, lơngăp lơngai gùng lòt tàm ƀòn Thơh Ga B. Bi Lê Quốc Việt– Ƀí thư Đoàn xã Chư Don, kơnhoàl Chư Pưh pà gĭt:“Lơh jat srơh rơnàng kơnòm să bơt bơtàu ƀòn lơgar pa tàm ƀòn Thơh Ga B, Đoàn xã hòi jà đoàn viên ơruh pơnu lơh jat mờ lơh ală bơnah broă bè tam tờm chi jat kềng gah gơl gùng, crăp bong đèng năng lượng mat tơngai, tam tờm chi tàm ală pơng gàr pa nàng lơh geh ală pơng gàr tơlir. Hòi jà làng bol koh wàs rŭ rơm gùng tềng đap hìu nàng lơh geh ù tiah tơlir sàng goh mờ niam. Tàm tơngai tus đoàn xã pơn jat tai hòi jà làng bol mờ đoàn viên ơruh pơnu hơ pơrgon lơh jat ală tơngume nàng gàr niam gơl gùng ơruh pơnu àng- tơlir- sàng goh mờ niam”.

Nam 2023, mờ tơngume “Nam tam gơl sồ ală broă lơh bơh Đoàn”, ală mpồl đoàn ƀòn lơgar tàm ù tiah càr Gia Lai dê neh lơh pràn broă mblàng yal, dong kờl làng bol tus bal tam gơl sồ mờ uă broă lơh geh ngan, bè: tơlik mat mờ yal tơngĭt mã QR bè sơnđờm mut lơh broă mờ jòi broă lơh, lơh broă; lam lơh ală broă lơh sồ hoá ù tiah, thư viện sồ mờ ală broă lơh tổ zân phố điện tử, tiah drà ờ ngui priă mat... Tŭ do, jơh gùt càr geh 1 rơbô 233 mpồl tam gơl sồ mpồl bơtiàn bơh kwang bàng, đoàn viên lơh cau tờm. Tam gơl sồ ală broă lơh bơh Đoàn dê neh pơgồp bơnah lơh gơs ngan ngồn lơh jat ală kơnòl broă jat Quyết địñ sồ 924 bơh Thủ tướng Cíñ phủ dê bè “Ring bal broă lơh tam gơl sồ tàm broă bơt bơtàu ƀòn lơgar pa, wèt tus ƀòn lơgar pa ngăc ngar tơngai bơh nam 2021-2025”. Bi Nguyễn Hoài Phương– Ƀí thư Huyện đoàn kơnhoàl Chư Păh, pà gĭt:“Nàng lơh jat tơngume broă lơh nam 2023, broă lơh sồ hóa ală tiah kung cèng wơl ală gah ƀuơn ngan ai làng bol tàm ù tiah kơnhoàl dê in. Ală gơ̆p bơyô đoàn viên, ơruh pơnu kơnòm pa tàu mờ kơnòm dềt tàm tŭ lòt sền ală ù tiah tam lơh bơh yau ƀuơn ngan jòi gĭt mờ gĭt loh ală jơnau yal tàm ù tiah hơ̆ dê mờ kung geh bơta dùl nùs ring bal bơh làng bol dê kung bè ală đoàn viên ơruh pơnu tàm ù tiah kơnhoàl dê”.

Lơh jat ală bơnah broă nàng kờñ sơm bat tê bal, pơgồp bơta pràn bơt bơtàu ƀòn lơgar pa, tàm nam 2023, Đoàn ơruh pơnu càr Gia Lai neh lam lơh 3 broă lơh ơruh pơnu kấp càr, 74 broă lơh kấp kơnhoàl, 615 broă lơh kấp ƀòn lơgar mờ 653 broă lơh ơruh pơnu tus bal “bơt bơtàu ù tiah tiah ơm àng- tơlir- sàng goh mờ niam, lơngăp lơngai” mơkung bơt bơtàu mờ lơh niam wơl 17 gơl gùng sòl àng gùng ƀòn lơgar; tam pa rlau 996 rơbô tờm chi... Bi Đỗ Đức Thanh- Phó Ƀí thư Tỉñ đoàn càr Gia Lai jờng rơ uă ngan bơta sơm bat tê bal bơh rơnàng kơnòm să càr Gia Lai dê neh pơgồp bơnah bal mờ ală tiah lơh jat broă lơh bơt bơtàu ƀòn lơgar pa lơh geh uă cồng nha niam ngan. Bi Đỗ Đức Thanh, đơs:“Tơngai bơh nam 2021 – 2025 bol añ pơn jat tai ngui tam gơl sồ mờ ală bơta gơguh jak khoa họk kỹ thuật tàm broă tus bal bơt bơtàu ƀòn lơgar pa. Bơdìh hơ̆, broă pơgồp bal mờ ală kấp, ngàñ nàng lơh geh ală broă lơh, ală priă jền nàng dong kờl ală đoàn viên, ơruh pơnu là bơta mờ mpồl lơh broă dê sền gròi ngan. Bơdìh mờ lơh jat gùng dà broă lơh bơh Đoàn Dà lơgar dê bol añ wèt tus bơt bơtàu ƀòn lơgar pal kis ngan. Wèt tus lơh 3 broă lơh mờ tàm nam 2024 bol añ lơh tàm xã An Trung, kơnhoàl Kông Chro. Jat tàm jơnau sồr bơh kấp ủy dê, bol añ pơn jat tai dong kờl ai ală tiah in, tơrgùm priă jền dong kờl ală tiah in lơh sir broă lơh ƀòn lơgar pa”.