Mut tàm sơnam 74, Cau ling yau Nguyễn Đức Thành, ơm tàm sơnah ƀòn Cheo Reo, ƀòn drà dờng Ayun Pa, càr Gia Lai kung gam tơryang tơryồng ngan lơh broă tàm bă ù mờr 1 lồ suơn dờng bơh hìu bơnhă dê mờ sùm lơh geh bơh 130 tơlak 150 tơlak đong priă cồng pah nam. Suơn dờng tam pà gơs ală tiah ròng phan, tơnau ròng ka, tờm chi sa plai mờ phan tam lơyah ngai, cèng wơl priă jền gùt nam, tơrmù uă ngan ală bơta aniai bè drà kă bro dê. Jat ồng Nguyễn Đức Thành, bal mờ jơnau kờñ lơh sa bơh să tờm dê, broă 2 nă ùr bơklau kra pơn jat tai jơh nùs lơh broă tàm suơn dờng, là tài bơh kơ̆p kờñ geh tă pơgồp tàm srơh bal bơh Mpồl Cau ling yau ƀòn drà dờng dê: “Bè Wa Hồ neh đơs, yau mờ gŏ di là neh klàr, den să tờm añ pơnđơl pràn lơh ngan bơtàu tơnguh lơh sa suơn tơnau wàng ròng phan. Añ bal mờ ală cau tàm mpồl pơn đơl pràn lơh ngan lơh bè lơi ai oh mi in ndrờm brồ guh bơtàu tơnguh lơh sa tàm thôn, ƀòn”.

Kung tàm sơnam bal “bơh lài tus tŭ do ờ hoan geh”, Cau ling yau Nguyễn Văn Tuyến, ơm tàm sơnah ƀòn Hòa Bình, ƀòn drà dờng Ayun Pa kung gam geh sùm priă lơh geh gĭt nđờ rơhiang tơlak đong pah nam bơh mpàng tê lơh broă bơh he dê. Ƀòn tờm tàm kơnhoàl Hương Sơn, càr Hà Tĩnh, geh uă mờng chài uă ngan ròng il ai ngke il pa bŭt den hìu bơnhă lơh jat niam sùm bơta ƀuơn do. Ồng Tuyến yal, ròng il pal geh uă ngan rlau jơh là mờng chài ròng, ai phan sa den geh lài lơm, ờ roh uă ir dà kơl hề ròng siam. Ồng Tuyến pà gĭt:“Broă lơh ròng il bơh añ dê mìng jơh priă bơh chờm lơm, tơnơ̆ do ai sa, ai ñô den añ ngui jơh bơta pràn he dê nàng tam ñhơ̆t, nha chi mờ koh rê ai il in sa. Bè il me 1 nam deh geh 1 nơm il kòn den kung tăc geh pơgăp bơh 12 tus 13 tơlak đong sơl. Ai il dam 1 nam ai 2 dơ̆ ngke il pa bŭt, dơ̆ sơn rờp geh mờr 7 lạng, dơ̆ tơnơ̆ pơgăp 3 lạng den 1 nam kung geh 1 kĭ sơl”.

Srơh “Cau ling yau lơh krơh lam lài” ờ mìng ơm wơl tàm broă bơtàu tơnguh lơh sa dồ nă să is lơm, mờ gam lơh gơrề uă tus ală srơh ndai bè “Cau ling yau dong bal mờ gơ̆p tơrmù rƀah, lơh sa jak”, “Cau ling yau sơm bat tê bal bơt bơtàu ƀòn lơgar pa”. Uă cau ling yau neh jơh nùs tus bal pà is ù, tă pơgồp ngai lơh broă, tă pơgồp tàm ală kes priă mpồl mờ priă jền uă... Pơn rơ bè cau ling yau ồng Ksor Khoan, neh pà is rlau 500 thơk vuông ù nàng lơh gùng lòt ƀòn lơgar tàm xã Chư Băh, ƀòn drà dờng Ayun Pa. Ồng kung sùm lơh krơh niam nàng làng bol tàm ƀòn in bơsram mờ lơh jat srơh bơt bơtàu ƀòn lơgar pa tàm tiah do dê. Cau ling yau ồng Ksor Khoan, đơs: "Añ neh kis tàm mpồl ling klàng rê wơl tàm ƀòn lài ngan lơh broă niam blàng yal hòi jà làng bol lơh jat niam lơh broă sa, tơn jơh jơgloh tơrmù rƀah nàng tơnguh priă lơh geh. Tus bal tơl làm ală srơh, pơs wàs tiah ơm kis lơh sàng goh ƀòn lơgar”.

Mờ uă ngan bơta pơnđơl pràn lơh ngan, srơh “Cau ling yau lơh krơh lam lài” tàm ƀòn drà dờng Ayun Pa neh lơh geh uă cồng nha, bè: 100% mpồl ƀòn lơgar ndrờm lơh geh sră jờng rơ lơh sir kơnòl broă rlau hơđang, khà cau tàm mpồl lơh krơh niam sơr lèt 90%, khà hìu bơnhă niam chài lơh geh rlau 85%. Ồng Nay Phong, Củ tịc Mpồl Cau ling yau ƀòn drà dờng Ayun Pa, càr Gia Lai pà gĭt, bal mờ ală broă lơh srơh, mpồl kung sền gròi ngan tus tơnguh uă nùs nhơm cíñ trị, đòm jat niam nùs nhơm cau ling Wa Hồ gơwèt mờ tơl nă cau tàm mpồl, nàng tơl nă cau tàm mpồl Cau ling yau lơh jat niam rlau tai gơnoar broă bơh he dê: “Tàm tơngai tus, pơn jat tai lơh ală srơh tàm pơrlòng bè cau ling yau lơh krơh lam lài pơgồp bal mờ broă bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê, bơt bơtàu mpồl pràn kơl dang kơ̆ kơl jăp bè cíñ trị mờ bồ tơngoh. Mpồl tơnguh uă bơta niam geh cồng nha tơl làm bè tơl bơta broă lơh, pơnđơl pràn lơh ngan mờ sơr lèt ală broă jàu, kơnòl broă”.

Srơh “Cau ling yau lơh krơh lam lài” neh gơ gơs dùl bơta pràn dờng, chul chồl cau tàm mpồl Cau ling yau tàm ƀòn drà dờng Ayun Pa, càr Gia Lai in jơh nùs lơh broă sa, tus bal ală srơh tàm pơrlòng, đơs nền gơnoar broă kwơ màng tàm rài kis mpồl bơtiàn. Khi neh mờ gam pơgồp dà kơl hề tàm bơta bơtàu ƀòn lơgar Ayun Pa ngai sơlơ pas niam mờ niam jak.