Pa do Ƀộ Nông nghiệp mờ Phát triển Nông thôn neh bơyai lơh Pơrjum pờ tơlik tơn tàm intenet gùt lơgar sền wơl 3 nam lơh Broă lơh jơnau kờñ Dà lơgar bơt bơtàu ƀòn lơgar pa (tơngai bơh nam 2021-2025). Jat jơnau yal, tus tŭ do jơh gùt lơgar geh 6 rơbô 022 xã lơh sir broă lơh ƀòn lơgar pa, 263 mpồl lơh broă kấp kơnhoàl lơh sir broă lơh ƀòn lơgar pa. Jơh gùt lơgar geh 19 càr, ƀòn dờng gơwèt Dà lơgar geh 100% khà xã lơh sir broă lơh ƀòn lơgar pa. Mò Đinh Thị Ngoại (kòn cau Barhnar) ơm tàm ƀòn Lơk, xã Nghĩa An, kơnhoàl K’Bang, càr Gia Lai pà gĭt: “Làng bol tàm ƀòn Lơk neh jơh nùs lơh ngan tus bal, lơh jăt srơh, tam klăc  bal, lơh gùng bê tông, gùng lòt ƀòn lơgar. Tơnơ̆ tŭ đòm jăt bơta chài ngui măi mok pa tàm broă lơh sa den priă lơh geh neh uă rlau, ƀòn lơgar sàng goh rlau, lơh sa bơtàu tơnguh rlau mờ lài do”.

Lơh jăt Cỉ thị bơh Mpồl Lơh kơnòl broă sùm Tỉñ ủy càr Gia Lai bè sơlơ tơnguh bơta đơng lam bồ bơh ală kấp ủy bè bơt bơtàu ƀòn lơgar pa tàm jơi bơtiàn dùl ết nă cau, 5 nam do, priă bơh kes priă dà lơgar mờ mpồl bơtiàn lơh bal neh tă pơgồp mờr 1 rơbô 500 tơmàn đong nàng bơt bơtàu ƀòn lơgar pa tàm tiah jơi bơtiàn dùl ết nă cau càr Gia Lai dê. 

Tơngai bơh nam 2021 tus nam 2023, kờp jơh priă jền hòi jà tă pơgồp lơh Broă lơh bơt bơtàu ƀòn lơgar pa tàm jơh gùt lơgar geh pơgap 1 tơlak 752 rơbô tơmàn đong. Lài hơ̆, bulah gùt lơgar pal “lơh ngan” rcang sơndră kòp Kovid-19, mơya broă lơh kung gam lơh sir jơnau kờñ geh Cíñ phủ jàu. Bulah bè hơ̆, jăt ồng Ngô Trường Sơn, Cáñ Văn phòng đơng lam pơgồp bal ƀòn lơgar pa Dà lơgar yal, tàm broă lơh jăt kung geh uă bơta kal ke, ờ hềt di pal. Ồng Ngô Trường Sơn đơs: “Bơta niam lơh geh jơnau sồr mờ broă lơh gàr niam bơta kơ̆ kơl jăp cồng nha bơh bàr pe xã dê tơnơ̆ tŭ lơh geh jơnau kờñ gam ờ hềt di pal, ngan là jơnau kờñ bè tiah ơm kis, priă lơh, lơngăp lơngai, rơndăp tăp sèng mpồl bơtiàn... Bơta niam ală broă lơh bơt bơtàu phan bơna tơnơ̆ tŭ lơh geh jơnau kờñ tàm bàr pe tiah neh geh tềl tơngŏ ờ niam tài bơh ờ hềt geh sền gròi, lơh niam wơl sùm...”.

Tàm Pơrjum jơh gùt lơgar sền wơl 3 nam lơh jăt Broă lơh jơnau kờñ dà lơgar bơt bơtàu ƀòn lơgar pa, kwang bàng ală tiah neh geh uă jơnau đơs tă pơgồp, đơs gùng dà broă lơh. Ngan là bè broă sền gàr sàng goh tiah ơm kis, ồng Nguyễn Ngọc Phúc, Phó Củ tịc Ủy ƀan Ñân zân càr Lâm Đồng đơs là, pal geh dùl gùng dà broă lơh pờ tàm tiah khòm tơrgùm sồ siă ƀòn lơgar dê. Ồng Nguyễn Ngọc Phúc, đơs: “Hơ̆ là  pal kờp sền khà sồ siă pah nam tàm tiah drà bơh  bi dê mờ ai tàm pơrlòng giă. Bol he mìng lơh dùl kơnòl broă lơm, hơ̆ là tă priă bơh làng bol dê mờ tơm wơl ai mpồl lơh sa kă bro tàm pơrlòng giă in. Bè hơ̆, gàr niam broă khòm tơrgùm sồ siă sàng goh. Bol añ đơs là broă do là pal lơh. Tŭ do bol añ gam lam lơh mìng  tàm dùl kơnhoàl lơm hơ̆ là  kơnhoàl Đức Trọng nàng lơh broă lơh do. Dilah geh cồng nha bol añ kờñ lam lơh tàm uă tiah tàm gùt càr dê".

Đơs tàm dơ̆ pơrjum, Bộ trưởng Bộ Nông nghiệp mờ Phát triển nông thôn ồng Lê Minh Hoan đơs sùm: broă lơh jơnau kờñ dà lơgar bơt bơtàu ƀòn lơgar pa ờ mìng là lơh phan bơna bơt bơtàu lơm, mờ gam là bơtàu tơnguh rài kis phan bơna mờ nùs nhơm ai làng bol tàm ƀòn lơgar in. Ồng Lê Minh Hoan, đơs: “Jơh ală bơta kwơ he gam lơh geh tiah niam, tiah ờ hềt niam. Mơya bol he pal kơlôi sơnơng pa dùl ết, kơlôi sơnơng uă gah jrô ơnàng làm uă bơta kwơ, tŭ he gĭt geh jrô ơnàng làm uă bơta kwơ dê den rơ̆p gơ gơs bè ồng Thống đốc lơgar Nhờk cèng phan bơna tàm Hà Nội tăc. Cau đơs dùl jơnau tŭ gĭt bơta pơn yờ să tài bơh bơta kờñ den mut lơh is. Tài bơh he lơh, he cèng wơl bơta chờ hờp ai làng bol he in, cèng wơl bơta tam gơl pa ai mpồl bơtiàn in. Nàng tơnơ̆ do mpồl bơtiàn rơ̆p tus bal mờ he atbồ ală tiah...”

Tŭ do, tàm jơh gùt lơgar gam lam lơh 3 Broă lơh jơnau kờñ dà lơgar, tàm hơ̆ geh Broă lơh bơt bơtàu ƀòn lơgar pa. Mơya, tŭ tơngai ai priă broă rơndăp lơh priă bơh kes priă dà lơgar dê nam 2022 mờ tơngai bơh nam 2021-2025 gam lơyài. Củ tịc Quốk hội ồng Vương Đình Huệ sồr lơh loh kơnòl broă bơh ală Ƀộ, ngàñ tàm broă lơyài ai priă 3 Broă lơh jơnau kờñ dà lơgar dê gơ lam tus pơhì pơhà... : "Jăt sền do pal hơ geh jơnau lùp. Mbè lơi lơyài bè hơ̆?Mbè lơi gơ kòl bè hơ̆, ală bơta gơ kòl tềng lơi? mờ broă tă bơsong bè lơi”. Pe broă lơh gam gơ kòl gĭt nđờ rơhiang tơngume ai lơh jăt Nghị địñ sồ 28, tơnơ̆ tam gơl sồ 27, tŭ do kơnòl bơh ală Bộ, ngàñ là bè lơi mờ nàng lời gơlik geh bơta hơ̆. Mbè lơi ai priă dà lơgar lơyài? Priă broă lơh gam lơyài rlau mờ priă bơcri lơh bè hơ̆ là mbè lơi? lời bè hơ̆ hoàc huơr uă ngan?"

Mpồl jăt sền bơh Ủy ƀan Thường vụ Quốk hội dan geh rơndăp broă lơh jàu broă rơndăp lơh lơh jăt priă broă lơh halà y al priă bơcri broă lơh kes priă dà lơgar lơh ală broă lơh jơnau kờñ dà lơgar tơngai bơh nam 2024-2025 nàng ală tiah in rcang tàm broă tàm pà priă.