Ală nhai lồi nam 2022, nùs nhơm lơh broă tàm ƀòn Đăk Xây, xã tiah nhàr dà lơgar Đăk Long, kơnhoàl Đăk Glei, càr Kon Tum sơlơ ur ar mờ jal mhar ngan. Pa pĭc jơh kơphe, 130 hìu làng bol kis tàm ƀòn tus rồ bùm blàng tai nàng di tŭ tăc mờ hìu măi tơrdih ƀòk ƀùm in. priă geh bơh bàr bơta phan tam do di tàm lồi nam dong kờl ală hìu geh tai priă nàng blơi phan satềp mờ phan ngui drơng tàm rài kis hìu nhă in.

Ồng A Xôn, Ƀí thư Ci ƀộ ƀòn Đăk Xây chờ hờp pà git, lơh sa, rài kis bơh làng bol ƀòn lơgar nam do geh bơta tam gơl rơlao tài kơnờm mờ broă lơh jăt jơnau bơto sồr bơ̆t bơtàu ƀòn lơgar pa bơh gơnoar atbồ bal mờ kwang bàng cau ling sền gàr tiah nhàr dà lơgar pôs ling Đăk Long dê: “Gơnoar atbồ, ală mpồl lơh broă tàm xã yal mblàng, bơto sồr làng bol tàm ƀòn ală broă lơh mùl màl nàng bơ̆t bơtàu ƀòn lơgar pa. Pôs ling sền gàr tiah nhàr dà lơgar Đăk Long ai kwang bàng, cau ling tus tơl hìu nàng bơto tàm boă tam, sih phơng tơl bơta phan tam in nàng geh cồng nha broă lơh sa. Nam do làng bol chờ hờp ngan tŭ kơphe mờ bùm blàng geh tơnhào uă. Tàm tiah nhàr dà lơgar gơtìp kal ke mờ rơ̆p sơrlèt dùl nam rài kis tam gơl uă bè do là chờ hờp ngan”.

Đăk Long là xã tiah nhàr dà lơgar rềp bal mờ lơgar Lào gơwèt xã kal ke ngan bơh kơnhoàl Đăk Glei dê. Lơh jăt jơnau kờñ dà lơgar bơ̆t bơtàu ƀòn lơgar pa, sơrlèt mờ uă bơta kal ke, tus jơh nam 2022 xã geh 14 tàm 19 khà broă.

Ồng Huỳnh Ngọc Ly, Củ tịc UɃÑZ xã Đăk Long pà git, geh cồng nha do kơnờm mờ gơnoar atbồ xã neh ngui niam gơnoar lơh tờm bơh làng bol dê tàm broă bơ̆t bơtàu ƀòn lơgar pa. “Bơdìh mờ broă pơlam dong kờl Đảng ủy, gơnoar atbồ xã in lơh jăt kơnòl tơnguh bơtàu lơh sa mpồl bơtiàn gàr niam bơta lơngăp lơngai dà lơgar, Pôs ling gam ai cau đảng viên tus pơrjum bal mờ ală ci ƀộ tàm ƀòn nàng di tŭ git ală nùs nhơm, jơnau kơ̆p kờñ, geh gùng dà broă lơh, geh jơnau pơlam mờ kấp ủy, gơnoar atbồ xã in tàm broă tơnguh bơtàu lơh sa. Dơ̆ bàr tai là broă kwang bàng, cau ling là cau kòn cau lơh broă tàm Pôs ling lơh oh mi mờ ờ uă hìu làng bol tàm xã nàng tơnguh bơtàu broă lơh sa ai hìu nhă hơ̆ in. Ală cau gơtìp ờ pràn tàm mpồl bơtiàn geh Pôs ling sền gròi ngan mờ ai kwang bàng tus bơto ală broă lơh mùl màl nàng tơnguh bơtàu lơh sa”.

Nam 2022 càr Kon Tum geh 7 xã geh khà ƀòn lơgar pa, tàm hơ̆ geh xã tiah nhàr dà lơgar Sa Loong, kơnhoàl Ngọc Hồi rềp bal mờ lơgar Campuchia. Tàm broă bơ̆t bơtàu ƀòn lơgar pa, kơnờm mờ broă ngui geh nùs nhơm tam klăc bal, gơnoar atbồ, làng bol mờ kwang bàng cau ling sền gàr tiah nhàr dà lơgar neh dùl nùs ring bal bơsong ală broă gơtìp kal ke tàm xã.

Ồng Nguyễn Hữu Bảng, Củ tịc UɃÑZ xã Sa Loong đơs tờm, nàng xã geh khà ƀòn lơgar pa geh broă pơgồp bal lơh uă ngan bơh kwang bàng, cau ling sền gàr tiah nhàr dà lơgar Sa Loong dê: “Kờñ xã Sa Loong lồi nam 2022 geh khà ƀòn lơgar pa, tàm ală nam do broă pơgồp bal đah Pôs ling bal mờ xã bol añ sùm đơs bal Pôs ling mờ xã là dùl mờ tàm broă pơgồp bal là niam ngan. Kơ̆p kờñ là tàm ală nam pơn jăt tai, broă pơgồp bal do geh lơh sùm uă rơlao tai nàng broă tơnguh bơtàu lơh sa mpồl bơtiàn, sền gàr bơta lơngăp lơngai dà lơgar tàm xã geh niam rơlao”.

Dùl nùs bal mờ gơnoar atbồ, làng bol kis tàm 13 xã tiah nhàr dà lơgar bơh càr Kon Tum dê bơ̆t bơtàu ƀòn lơgar pa, Mpồl đơng lam Ling sền gàr Tiah nhàr dà lơgar càr Kon Tum ai git nđờ jơ̆t nă kwang bàng tus lơh broă tàm 11 xã, ai cau đảng viên tàm ală pôs ling tus bal pơrjum tàm 71 ci ƀộ ƀòn; lơh oh mi, drơng broă rơlao 1 rơbô hìu tàm tiah nhàr dà lơgar in; dong kờl làng bol tơnguh bơtàu lơh sa, bơ̆t bơtàu broă lơh phan bơna mờ git nđờ rơbô ngai lơh broă. Ală broă lơh geh dong kờl làng bol tơn jơh jơgloh, tơmù rơƀah, bơ̆t bơtàu ƀòn lơgar pa geh cồng nha mùl màl, lơh tam gơl rài kis bal mờ muh măt ƀòn lơgar tàm tiah nhàr dà lơgar. Thiếu tá Nguyễn Doãn Hải, Cíñ trị viên phó Pôs ling sền gàr tiah nhàr dà lơgar Sa Loong pà git: “Lài do làng bol jăt bơhiàn lài do mìng tùc, tam dùl nam mìng geh dùl kàl den tàng cồng nha geh ờ uă. Pôs ling sền gàr tiah nhàr dà lơgar dong kờl làng bol tàm broă lơh sre dùl nam geh bàr kàl, cồng nha geh uă. Đảng ủy, Mpồl đơng lam Pôs ling pơgồp bal mờ gơnoar atbồ xã, kwang bàng cau ling tus dong kờl làng bol lơh hìu pa sờr hìu sèt mờ lơh gơs khà bơ̆t bơtàu ƀòn lơgar pa. Hìu lơi ờ geh ngai lơh broă den kwang bàng cau ling dong kờl ngai lơh broă nàng hìu nhă tơmù bơnah kal ke bè lơh sa”.

Tus jơh nam 2022, càr Kon Tum geh 43 xã geh khà ƀòn lơgar pa. Tàm hơ̆ mìng is gơl gùng nhàr dà lơgar jòng rơlao 292 kơi sồ rềp bal mờ bàr lơgar Lào mờ Campuchia geh 6 tàm 13 xã geh khà ƀòn lơgar pa, tàm hơ̆, kơnhoàl Ngọc Hồi geh 5 xã mờ kơnhoàl Ia H’Drai geh 1 xã geh khà ƀòn lơgar pa. Broă lơh geh cồng nha Jơnau kờñ dà lơgar bơ̆t bơtàu ƀòn lơgar pa gam dong kờl 13 xã tiah nhàr dà lơgar gơwèt 4 kơnhoàl Đăk Glei, Ngọc Hồi, Sa Thầy mờ Ia H’Drai càr Kon Tum dê ngai sơlơ tam gơl muh măt să bồ.