Do là ală broă lơh tềl lời wơl bơh rơnàng kơnòm să dê, pơgồp bơnah bal mờ ală tiah dong kờl niam rài kis mpồl bơtiàn mờ sơlơ geh bơta pràn nàng ală tiah tàm tiah kal ke, tiah sar lơgar ngài geh ală bơta nàng lơh sir broă lơh ƀòn lơgar pa.

Nam pa do, muh mat ƀòn lơgar tàm thôn 2, xã Ea H’Mlay, kơnhoàl tiah sar lơgar ngài M’Drăk neh geh bơta tam gơl niam. Ală gơl gùng lòt tờm tàm thôn neh lơh bê tông tus 90%. Gơl gùng lòt tờm tàm ală thôn geh ală đèng sòl àng, ƀuơn ƀoài ngan ai làng bol in lòt rê, jun pơndiang phan bơna lơh geh bơh lơh sa suơn sre lòt gùt tiah. Mò Nguyễn Thị Bích, Ƀí thư Ci bộ thôn 2, xã Ea H’Mlay, kơnhoàl M’Drăk, càr Dăk Lăk pà gĭt, là ù tiah gam uă kal ke, làng bol ơm kis ờ hoan geh den jơh ală bơta pràn broă lơh bơt bơtàu ƀòn lơgar pa kung gam pal hòi jà mpồl bơtiàn lơh bal bơh đah bơdìh kung bè bơh bơta dong kờl bơh Dà lơgar dê. Bè broă lơh gùng che ồs đèng sòl àng jòng rlau 1 kơi sồ crăp tàm gùng lòt ală thôn lòt tus anih tờm xã dê, mò Bích yal, hơ̆ là broă lơh bơh Đoàn viên Ơruh pơnu dê lam lơh crăp nàng dong kờl làng bol. Mò Nguyễn Thị Bích, đơs: “Kơnờm geh broă lơh gùng che ồs đèng sòl àng gùng ƀòn lơgar bơh Tỉñ đoàn, Huyện đoàn dê sền gròi mờ dong kờl. Bơh hơ̆ tus tŭ do làng bol chờ hờp ngan, sền gàr lơngap lơngai den niam đau. Tŭ do làng bol lòt rê tàm trồ mang kung ờ rngòt tai, jơh bal kơnòm dềt lòt rê, nhơl ñŏ, lơh ală srơh là kung chờ hờp, chờ hờñ ngan sơl”.

 Xã tiah nhàr lơgar Ia Lốp là xã kal ke bơh kơnhoàl Ea Sup, càr Dăk Lăk dê, mờ nggùl khà kờp làng bol là làng bol kòn cau dùl ết nă cau mờ 70% làng bol ơm kis là hìu bơnhă rƀah. Tàm uă nam do, sùm geh ală mpồl Ơruh pơnu dong kờl is ală càr tus dong kờl làng bol. Bè tàm nam 2022, ală mpồl dong kờl is kàl rơlô bơkang tơlir càr Bình Dương, mpồl dong kờl is Mpồl cau lơh sơnơm kơnòm să càr Bình Dương, Tỉñ Đoàn Lâm Đồng mờ Tỉñ Đoàn Dăk Lăk neh lam lơh uă broă lơh dong kờl is, jàu pà ală broă lơh Ơruh pơnu, Hìu ơm kờñ gơboh kòn bơnus tàm ală thôn. Jat ồng Lang Văn Sơn, Phó Ƀí thư Đảng ủy, Củ tịc Hội đồng Ñân zân xã Ia Lốp yal, bơta dong kờl bơh ală mpồl cau dê neh pơgồp bơnah dong xã gàr geh broă lơh sền gàr niam rài kis mpồl bơtiàn in, pơnđơl pràn lơh ngan bơt bơtàu ƀòn lơgar pa mờ tus tŭ do neh lơh geh 12/19 broă jàu. Ồng Lang Văn Sơn, đơs: “Ală mpồl dong kờl is rê tàm do den kung dong uă ngan ai làng bol xã in, ngan là ală broă lơh mpồl bơtiàn, lam lơh ală broă lơh kham, sơm kòp, pà phan, bơt bơtàu broă lơh gùng che ồs đèng sòl àng, dong kờl ală hìu bơnhă cíñ sác, ngai lơh broă geh kwơ ngan. Dơ̆ dùl là tơngŏ gơnoar broă tam klăc bal kung bè là bơta lam lài bơh Đoàn dê. Dơ̆ bàr tai là den rơ̆p dong làng bol in geh dùl gơl gùng sòl àng, tơlir, niam, tơrmù uă ngan broă geh gơrềng tus broă sền gàr lơngap lơngai, rơndap tap sèng”.

Lơh jat broă lơh Đoàn mờ srơh Ơruh pơnu, tàm nam pa do, càr Dăk Lăk neh lam lơh mờr 2 rơbô 500 broă lơh, bơnah broă tàm uă tiah làng bol ơm kis, wèt tus tờm ngan tus tàm tiah kal ke uă, tiah sar lơgar ngài. Ngan là, mờ tềl lời wơl là nam geh bơyai lơh Pơrjum dờng Đoàn ală kấp, rơnàng kơnòm să càr Dăk Lăk neh sơnđờm mŭt lơh broă bơt bơtàu gĭt nđờ jơ̆t kơi sồ broă lơh sòl àng gùng lòt ƀòn lơgar, sòl àng gùng lòt tiah nhàr lơgar; lơh pa gĭt nđờ rơhiang kơi sồ gùng lòt ƀòn lơgar, gĭt nđờ jơ̆t nơm hìu ơm dong kờl kòn bơnus tàm ală thôn, ƀòn mờ kờp jơh priă gĭt nđờ tơlak đong. Bi H Giang Niê, Ƀí thư Tỉñ đoàn Dăk Lăk pà gĭt: “Bol añ rơ̆p bal mờ ală kấp ủy, gơnoar atbồ mờ làng bol nàng sơm bat tê bal bơt bơtàu ƀòn lơgar pa mờ ală broă lơh, bơnah broă Ơruh pơnu mờ bơta pràn rơnàng kơnòm să, bơta pràn să jan bơh he dê tàm broă dờp lơh ală broă kal ke, broă pa. Ală broă lơh sền gàr niam rài kis mpồl bơtiàn rơ̆p geh lơh pràn mờ ală bơta pràn wèt rê mờ làng bol nàng lơh bè lơi bal mờ làng bol gờñ lơh sir broă lơh ƀòn lơgar pa”.

Bal mờ ală broă lơh sền gàr niam rài kis mpồl bơtiàn, rơnàng kơnòm să càr Dăk Lăk đơs is, rơnàng kơnòm să ală jơi bơtiàn kòn cau tàm tiah Tây Nguyên đơs bal pơn jat tai geh uă broă lơh wèt tus ală tiah kal ke, tiah nhàr lơgar. Tàm càr Lâm Đồng, bulah ờ geh tiah rềp nhàr mờ tiah nhàr lơgar mơya uă nam do, broă lơh mblàng yal, lơh jat niam kơnòl broă bơh rơnàng kơnòm să dê tàm broă sền gàr tiah nhàr lơgar, jrong nhàr lơgar kung gam geh lam lơh nàng bơto bơtê bơhiàn yau ai Đoàn viên Ơruh pơnu in. Bi Ndu Ha Biên, Phó Ƀí thư Tỉñ đoàn càr Lâm Đồng pà gĭt, tàm uă nam do, rơnàng kơnòm să càr Lâm Đồng sùm pơgồp bal mờ càr Dăk Lăk bơyai lơh broă lơh “Nhai pe tiah nhàr lơgar” wèt tus làng bol kòn cau, cau ling gam ơm kis mờ lơh kơnòl broă tàm tiah nhàr lơgar, Dà lơgar dê. Bi Ndu Ha Biên, đơs: “Tỉñ Đoàn Lâm Đồng pơgồp bal mờ Tỉñ Đoàn Dăk Lăk lam lơh ală broă lơh sền gĭt gơtha ai ală tiah tàm xã tiah nhàr lơgar bơh càr Dăk Lăk dê in bè là gơl gùng sòl àng gùng tiah nhàr lơgar, jàu priă bơsram den hơ̆ sồng pà phan ai làng bol tiah nhàr lơgar dê. Mơkung hòi jà tàm pà bal, pơndờm pơnđiang ală gơ̆p bơyô đoàn viên, Ơruh pơnu tiah nhàr lơgar in lơh ngan mblàng yal, hòi jà ai rơnàng kơnòm să càr Dăk Lăk, càr Lâm Đồng kung bè jơh bal tiah Tây Nguyên dê bè bơhiàn bơh rơnàng kơnòm să dê mờ pơn jat tai lơh jat kơnòl broă bơh rơnàng kơnòm să dê tàm broă sền gàr gơnoar tờm tiah nhàr lơgar bơh Dà lơgar dê”.

Bè nam pa bơh ù tiah trồ tiah dê, rơnàng kơnòm să tiah Tây Nguyên den pơn jat tai gùng lòt tă pơgồp dà kơl hề, bơta pràn rơnàng kơnòm să, nùs nhơm, bơta jơh nùs bơh he dê, geh ală broă lơh geh kwơ, geh ngan wèt tus mờ làng bol. Bơh hơ̆, cih wơl ală tềl lời wơl niam bơnĕ ngan tàm nùs nhơm gơnoar atbồ mờ làng bol tàm ală tiah dê, pơgồp pràn kơl dang să jan dê bơt bơtàu ƀòn lơgar ngai sơlơ pas niam.