Tàm 2 poh tus mờ ù tiah Cư Pơng, kơnhoàl Krông Buk, càr Dăk Lăk, 15 nă ơruh pơnu dong kờl is gơwèt mpồl lơh broă lơh Kàl rơlô bơkang tơlir kấp càr neh bal mờ ală tiah lơh sir 4 broă lơh bơt bơtàu ơruh pơnu. Bulah trồ tiah ờ niam, ală cau tus bal dong kờl is kung gam tơryang tơryồng dong lờl lơh gùng lòt mù tam dà mbòr mờ pơs wàs, lơh niam wơl dà mbòr; lơh blàng mờ bê tông, ƀlàng nhơl bơlai tềng đăp hìu mpồl bơtiàn. Tus trồ mang, cau dong kờl is den lời tŭ tơngai bơsram wơl jơnau bơsram ai kơnòm dềt in, lam lơh 8 dơ̆ pơrjum kàl rlô bơkang pơgồp bal mblàng yal adat boh lam. Bi Y Hlý Niê Kdăm, Ƀí thư Đoàn Ơruh pơnu xã Cư Pơng, kơnhoàl Krông Buk, pà gĭt:“Nam do xã Cư Pơng rơ̆p lơh sir broă lơh ƀòn lơgar pa den tàng ală broă lơh bơt bơtàu, bơnah broă mờ ơruh pơnu dong kờl is dong kờl tàm xã là kờñ pal geh ngan nàng tus bal lơh sir jơh ală bơta nàng lơh sir broă lơh tàm nam do. Ală bơyô khi tus tàm tiah do den ờ mìng lơh gơrề uă rùp rài niam bơnĕ ngan bè sền gàr tiah ơm kis, bơsram wơl jơnau bơsram ai kơnòm dềt in lơm mờ gam tơngŏ bơta jơh nùs ngan, lơh kah wơl bơta pin dờn ai rơnàng kơnòm să in, tă pơgồp bal dà kơl hề ai mpồl bơtiàn in”.

Tàm kơnhoàl Lăk, 15 nă ơruh pơnu dong kờl is kấp càr neh tus dong kờl tàm ƀòn Dăk Sa, xã Dăk Nuê. Do là ƀòn geh 100% là kòn cau Mông ntrờn ơm kis khat gơboh bơh tiah đah Tô dà lơgar mut tàm do, ală bơta ơm kis gam uă ngan kal ke, ờ hềt geh gùng che ồs đèng dà lơgar mờ gùng lòt rê. Ơruh pơnu dong kờl is neh tam pà mpồl lòt mblàng yal bè broă bau gờñ, rcang lài kơryan kòp, dong kờl hìu bơnhă geh sră dong kờl bơh dà lơgar tơnhào phan lơh geh bơh suơn sre, sơng ka sền gàr kơphê. Pờ bơsram ơdŭ 2 bơsram wơl jơnau bơsram kàl rơlô bơkang ai 40 nă kơnòm dềt tàm ƀòn, bal mờ làng bol lơh niam wơl 5 kơi sồ gùng lòt tàm dơlam ƀòn, koh wàs rŭ rơm tàm bàr pe gơl gùng lòt ală ƀòn mờ tam 100 tờm sao đen jat kềng gah gùng. Mò H Me Tơr, ơm tàm xã Dăk Nuê, kơnhoàl Lăk đơs:“Tềl lời wơl bơh ală ơruh pơnu dê hơ̆ là bơta jơh nùs ngan. Tàm tiah do den ờ hềt geh gùng che ồs đèng, ờ geh dà, ờ geh gùng lòt, ală ơruh pơnu pal đơ dà mìu, kơ̆p dà mìu gơdùh nàng um, bơ̆ dà nàng trŭ gơm phan sa. Mơya ală ơruh pơnu chờ hờp ngan, ală ơruh pơnu ờ rngòt ngai mang sùm jơh nùs tus bal lơh jơh ală srơh lơh broă mờ ờ tŭ lời đơs là mbè là tàm do ờ geh dà, ờ geh gùng che ồs đèng”.

Tàm broă lơh ơruh pơnu dong kờl is kàl rơlô bơkang tơlir nam do, bal mờ rlau 7 rơbô nă ơruh pơnu dong kờl tàm dồ bă tiah, Tỉñ đoàn càr Dăk Lăk neh ai tai 180 nă ơruh pơnu dong kờl is tus dong kờl 6 xã gơwèt 6 kơnhoàl. Bal mờ hơ̆ là 6 mpồl ờs tus bal dong kờl mblàng yal, tam gơl sồ mpồl bơtiàn, prap gàr niam chài niam bơnĕ ngan jơi bơtiàn dê, mut gơ rờm bal ală lơgar, bồ tơngoh gĭt wă rơnàng kơnòm să dong kờl is, tài ală kơnòm dềt kờñ gơboh. Bơh hơ̆ neh lơh gĭt nđờ jơ̆t broă lơh bơt bơtàu, bơnah broă geh ngan. Bi Y Lê Pas Tơr, Phó Ƀí thư Duh broă sùm Tỉñ đoàn càr, Kwang atbồ Mpồl sồr lơh broă lơh đơs:“Neh geh uă ngan broă lơh bơt bơtàu, is ồn tàm tơngai mờ 2 poh geh bơyai lơh broă lơh den trồ tơngai kung ờ niam ngan sơl, trồ mìu uă ngan sơl. Jat hơ̆, den ală cau tus bal dong kờl is kung neh ngăc ngar tàm ală broă lơh bơh he dê mờ tam pà ngai lơh broă nàng gàr niam lơh jat gơtùi ală broă lơh bơt bơtàu mờ kung gàr niam ală tơngume bè mblàng yal adat boh lam tàm ƀòn lơgar mờ pơrjum Ci đoàn kung bè bơto pơlam bơsram wơl jơnau bơsram kàl rơlô bơkang ai kơnòm dềt in”.

Gơwèt mờ ală cau tus bal dong kờl is, do là kàl rơlô bơkang geh kwơ ngan, pơgồp bơnah lơh geh ală bơta niam bơnĕ ngan ai mpồl bơtiàn in. Cau bơsram dờng Đặng Thị Phương Thảo (Hìu bơsram Đại học Ngoại ngữ - Tin học ƀòn dờng Hồ Chí Minh) đơs: “Kàl rơlô bơkang nam 2024 do gơwèt mờ oh den ờ mìng là dùl kàl rlô bơkang dong kờl is lơm mờ gam là tŭ tơngai niam nàng ntào dờng rlau tai, gơtùi gĭt wă uă rlau tai, lơh ai he in dùl rài kis geh kwơ, lơh geh bơta kwơ niam ai mpồl bơtiàn in. Oh gam lơh broă tàm internet ai jơh broă lơh kàl rơlô bơkang tơlir bơh ƀòn dờng Hồ Chí Minh dê mờ lơh broă tơn, tă pơgồp dà kơl hề he dê ai kàl rơlô bơkang tơlir tàm ƀòn lơgar he dê. Tàm tŭ lơh broă mờ mpồl, pah dơ̆ tus bal den oh bơsram tai dùl bơta pa”.

Broă lơh kàl rơlô bơkang tơlir nam do tàm càr Dăk Lăk neh tơn jơh mờ uă bơta tềl lời wơl niam bơnĕ tàm nùs nhơm gơnoar atbồ mờ làng bol tàm ală tiah dê. Ală broă lơh bơt bơtàu, bơnah broă bơh ơruh pơnu dong kờl is ờ mìng pơgồp bơnah lơh ală broă lơh gàr niam rài kis mpồl bơtiàn lơm mờ gam lơh gơrề uă rùp rài niam ngan bè rơnàng kơnòm să, jơh nùs, tă pơgồp dà kơl hề bơh rơnàng kơnòm să càr Dăk Lăk dê tài rài kis mpồl bơtiàn.