Ồng A An Toàn, kòn cau Jeh Triêng ơm tàm thôn Đắk Wâk, xã Đắk Kroong, kơnhoàl Đắk Glei, càr Kon Tum dê là cau lơh ngan klàs bơh rƀah bơh bàr nơm mpàng tê gời. 15 nam lài, hìu bơnhă ồng A An Toàn dê là hìu bơnhă rƀah ngan. Ù tiah rơ̆ ru ngan mơya mìng tam bùm blàng mờ tùc kòi mìr lơm den tàng nam lơi kung bè hơ̆ lơm pah tŭ tus kàl puh pah kung pal dờp phe dong kờl bơh dà lơgar dê. Nam 2013, ùr bơklau ồng A An Toàn càn geh 120 tơlak đong nàng bơcri priă tam kơphê mờ blơi kơnrồ me rê ròng. Kơnờm gĭt tềm pềr tàm broă ngui sa den tàng rài kis bơh hìu bơnhă ồng dê rơhời geh tơl ngui tơl sa, 5 nă kòn ndrờm geh lòt bơsram. Tŭ do, hìu bơnhă ồng A An Toàn dê neh gơlik gơs là cau pas sơm ngan bơh thôn Đắk Wâk dê. Pơgăp mờ do 2 nam, ùr bơklau ồng neh lơh geh hìu dờng niam ngan kờp priă tus 1 tơmàn 400 tơlak đong.

Ồng A An Toàn geh sươn ơnàng rlau 3 lồ tam kơphê, 2 nơm tơnau dà ròng ka. Dùl wàng dờng ròng 8 nơm sur me, dùl nam sur deh mờr 200 nơm kòn sur. Jơh ală ồng ròng gơs sur puăc den hơ̆ sồng tăc mờ kờp bal pah nam 15 tấn puăc. Bồ nam 2022 do, ồng khin cha càn tai 800 tơlak đong bơcri priă lơh dùl nơm kơng điện tử nàng blơi phan lơh geh bơh sươn sre, mờ lơh dùl hìu ràng tăc phan siam phan ròng. Gĭt broă lơh sa, mờ jơh nùs jơh tồr ngan bơto pơlam làng bol tàm ƀòn nàng lik klàs rƀah bal den tàng ồng geh làng bol pin dờn mờ pồ lơh cau ala măt Hội đồng Ñân zân xã Đắk Kroong. Ồng A An Toàn yal: Priă càn bơh Agribank dê neh gơdờp tus lơh sa hìu bơnhă añ dê uă ngan. Añ kờñ bơtàu tơnguh lơh sa nàng geh tai priă jền. Tơnơ̆ hơ̆, kờñ lơh dùl nơm krơh nàng làng bol in khi sền jăt broă lơh bơh añ dê mờ lơh, nàng bal mờ gơ̆p bơtàu tơnguh. Tàm tŭ añ geh jơnau kơlôi lơh bè hơ̆ den añ geh càn priă Agribank dê. Priă hơ̆ neh dong añ lơh gơtùi jơnau kơlôi lơh mờ broă kă bro bơh añ dê geh priă cồng, geh cồng nha, geh tai priă jền ai hìu bơnhă in mơkung dong kờl uă làng bol tàm ƀòn.

Ồng A Lê Chúc, Phó Kwang ătbồ Agribank kơnhoàl Đăk Glei pà gĭt: Tŭ do, cau lơh broă sa tàm jơh 12 xã tàm kơnhoàl neh geh càn priă mờ ngui di broă den tàng lơh geh cồng nha ngan. 5 nam rềp ndo, kờp jơh priă dồs càn bơh năc càn dê là cau kòn cau dùl êt nă cau neh gơguh tus bàr dơ̆. Kơnờm priă càn do mờ uă hìu bơnhă klàs geh bơh jơgloh rƀah. Ồng A Lê Chúc, đơs: Lơh jăt kơnòl broă bơh Agribank dê hơ̆ là broă lơh lơh broă sa, cau lơh broă sa mờ ƀòn lơgar. Kờp tus tơngai tŭ do, priă bơh bol añ dê gơguh tai mờ bơcri ai làng bol tàm do in, kwơmàng là cau kòn cau dùl êt nă cau. Tŭ do, bol añ neh gơguh tai 856 tơmàn đong, 90% priă do bol añ bơcri ai cau lơh broă sa, lơh broă sa sươn sre mờ ƀòn lơgar in. Làng bol neh rơcăng lài mờ càn geh priă ngân hàng dê, tơrgùm tàm broă tam, sền gàr kơphê, kau su. Ròng phan tàm do uă ngan là ròng kơnrồ. Den làng bol kung neh kơ̆ kơl jăp bè lơh sa.

 Ồng A Klok, cau Sơdàng ơm tàm ƀòn Đắk Tang, xã Đắk Sú, kơnhoàl Ngọc Hồi yal mờ bol añ in kàl do digơlan lơh geh 120 tấn kơphê ris. Tŭ do, pah ngai hìu bơnhă apah 20 nă cau lơh broă nàng pik plai kơphê. Ồng A Klok là dùl nă cau pơnrơ bè lơh sa jak bơh kơnhoàl Ngọc Hồi dê. Pơgăp mờ do 15 nam, mờ priă càn 500 tơlak đong, ồng A Klok neh bơcri priă bơtàu tơnguh 3 lồ kơphê. Lơh sa ngai sơlơ bơtàu tơnguh, ồng càn tai priă nàng rề ơnàng sươn kơphê tus 8 lồ. Tŭ do, lơh sa hìu bơnhă neh tơl ngui tơl sa ngan, hìu đam niam tre ngan, neh blơi geh rơndeh ô tô rài pa. Nam lài, ồng A Klok khin cha càn priă nàng bơcri priă lơh dùl nơm ƀlàng ìs kơphê kờp priă 2 tơmàn đong. A Klok đơs là: kờñ tăc kơphê mờ giă jơnhoa den pal bơcri niam, di broă rơndăp lơh bơh broă tam, sền gàr, tus broă pik mờ lơh gơs phan. Lơh pas ai hìu bơnhă in mờ ồng A Klok kung neh lơh geh broă lơh sùm ai rlau 20 nă cau lơh broă in bal mờ priă lơh geh sùm. A Klok jơh nùs ngan dong kờl ală srơh bơ̆t bơtàu ƀòn lơgar pa, dong cau kal ke tàm thôn geh priă bơcri tàm broă lơh sa, tơn jơh jơgloh tơrmù rƀah. Ồng A Klok, đơs: Kơnờm bơh dong kờl bơh Đảng mờ Dà lơgar dê bè bơtàu tơnguh lơh sa tiah làng bol kòn cau Tây Nguyên đơs bal mờ đơs is là kòn cau Sơdàng tàm xã Đắk Sú do. Lài do, añ kơnờm priă càn bơh ngân hàng nông nghiệp dê, càn geh 500 tơlak đong. Priă do añ tam kau su, lơh gùng, tam kơphê. 3 nam tơnơ̆, añ geh priă jền, bơh hơ̆ hìu bơnhă neh kơ̆ kơl jăp.

Mò Hà Thị Thanh Hoà, Phó Kwang ătbồ Agribank Kon Tum pà gĭt, tŭ do rlau 80% priă càn geh cau càn gơwèt broă lơh broă sa sươn sre ƀòn lơgar. Khà gơguh kờp bal tàm 5 nam rềp ndo geh rlau 15% mờ sùm geh tus rlau 40% khà priă càn bơh gah ngân hàng gùt càr dê. Tŭ cau kòn cau gĭt ngui geh cồng nha priă càn den khi geh klàs bơh rƀah dùl bă kơ̆ kơl jăp jŏ jòng. Mò Hoà, đơs: Tàm ală nam do, Agribank Kon Tum sồr ngan ală agribank ală kơnhoàl lam lơh jăt geh cồng nha ală broă dong kờl bơh Dà lơgar dê lơh broă sa sươn sre, cau lơh broă sa mờ ƀòn lơgar tàm ù tiah càr dê. Kwơmàng là ală kơnhoàl tiah sar lơgar ngài, bol añ lam lơh kràñ cê jơh nùs ngan broă tơm priă ờ ngui priă măt tàm tiah ƀòn lơgar. Lơh pràn drơng broă ala ngân hàng pa rài do ală tiah ƀòn lơgar; lơh ală phan bơna thẻ mờ gơ gơhờp mờ tiah ƀòn lơgar nàng làng bol in ƀươn ngui geh ală phan ngui tơm priă pa rài do dê. Bơh hơ̆, pơgồp bơnah tơrmù ƀà uă ngan càn priă sa priă uă đah bơdìh tàm ù tiah càr dê.