Do là dơ̆ sơnrờp lŏ Nguyễn Thị Ngọc Lan bal mờ ờ uă cau năc nhơl chờ bơh ƀòn dờng Hồ Chí Minh tus nhơl chờ “Hào bơnơm sền mhoal” tàm kơnhoàl Lăk, càr Dăk Lăk. Gùng ntiar, kơh, mơya gùng brê chi chi hòn gơs tơlir niam, sềm nrao, croh dà ntas swào bal mờ nùs nhơm chờ hờp neh dong kờl lŏ bal mờ ală cau tàm mpồl lơh ngan guh tus gùng tus dà hờ đang bồ bơnơm Chư Yang Lăk, dùl tàm ală bồ bơnơm ñhoa ngan bơh dòr bơnơm Chư Yang Sin dê.

Lŏ Nguyễn Thị Ngọc Lan yal, dơ̆ lòt chờ hờp mờ geh bơta niam pal dờp ngan. “Tài bè ờs ờ tŭ lơi kơlôi là añ geh hào guh bơnơm ñhoa bè do, mơya lơh ngan. Lòt neh nggùl gùng den kung glar sơl, mơya pal pơlam is là, lơh ngan mìng gam 1 jơ tai là tus hờ đang bồ bơnơm. Guh tus hờ đang bồ bơnơm den gŏ trồ tiah mrềt niam, tàm tiah jơng bơnơm ờ tŭ lơi gŏ geh bơta niam bè do. Bol añ kis tàm ƀòn dờng ờ tŭ lơi gŏ tờm chi geh uă nha bè do”.

Hào guh bơnơm sền mhoal là dùl tàm 2 “bơta gơboh” bơh Y Xim Ndu, klao pơnu kòn cau Mnông kis tàm ƀòn Yuk La 1, xã Dăk Liêng, kơnhoàl Lăk, càr Dăk Lăk yal bơh tŭ bi mŭt lơh broă tàm gah nhơl chờ. Bơta gơboh ndai bơh Y Xim dê là broă lòt sền nàng git rài kis, bơta chài rơgơi ală ƀòn gùt dar tơnao dà Lăk dê. Y Xim Ndu pà git, bi ai uă ngan bơta pràn tus mờ 2 broă nhơl chờ tiah brê bơnơm geh is mờ ƀòn lơgar dê. Bŭ lah geh tơngai gơtìp gơrềng ờ niam ngan tài bơh kòp gơtờp, mơya tus tŭ do, kông ty TNHH nhơl chờ Chư Yang Sin geh bi lơh neh geh gal cau tus sùm. “Añ tơnguh bơtàu jăt gùng dà broă lơh nhơl chờ tàm brê bơnơm pơgồp bal mờ sền gàr tiah kis mờ prăp gàr bơta chài rơgơi bơh mpồl bơtiàn ƀòn ơm kis tàm do dê. Tơnơ̆ do, di lah tơnguh bơtàu niam den den añ geh wèt tus cau năc nhơl chờ lơgar bơdìh tàm lơgar Việt Nam. Bơta mờ añ kơ̆p kờñ hơ̆ là rơndăp broă bơh añ dê geh ai nùs nhơm pin dờn, geh bơta pràn nàng ală bơyô kơnòm să tus mŭt lơh broă, tàm hơ̆ uă ngan là cau kơnòm să kòn cau bè añ dê sơl, geh wă tus mờ bơta kwơ màng, bơta kwơ bơh broă lơh sa pơgồp bal mờ broă prăp gàr mờ sền gàr bơta niam chài rơgơi kòn cau dê”.

Kung mŭt lơh broă tàm tiah kơh bơnơm càr Dăk Lăk dê, mơya lŏ Chu Thị Lan, kis tàm xã Ea Kly, kơnhoàl Krông Păc den lơh geh cồng nha mờ gah lơh broă jàng lah ờ di là bơta pràn, hơ̆ là sền gàr bơta pràn kơl dang să jan. Phan geh lơh ce thảo mộk mờ phan bơka să geh is Lanchans geh lŏ lơh neh geh tăc tơrlòng mờ tŭ tus pơrlòng neh geh khà dùl tàm dơ̆ pơrlòng mŭt lơh broă tam gơl pa bơceh pa tàm càr Dăk Lăk. Jăt lŏ Chu Thị Lan đơs, dơ̆ pơrlòng mŭt lơh broă geh càr bơyai lơh là dơ̆ kwơ màng nàng lŏ geh tai bơta lơh gơs phan bal mờ broă kă bro. Bơh tŭ hơ̆, tơmù tơngai geh lơh nàng ai phan tus mờ cau ngui in. “Broă bơyai lơh ală dơ̆ bơto pơlam geh kwơ màng ngan nàng añ gơtùi lơh gơs, ngui tàm broă kă bro añ dê. Bơh dơ̆ pơrlòng do, añ geh bơta niam tìp geh uă cau bơcri priă. Mùl màl den broă gơrềng bal tus mờ bơta pràn kơl dang să jan do kung geh uă cau bơcri priă sền gròi mờ bơtoah ngan là tàm dơ̆ pơrlòng do kung geh uă cau bơcri priă sền gròi ngan mờ kờñ lơh broă bal tơnơ̆ do”.

Bal mờ broă jòi geh cồng nha bơh ală broă lơh is krơi ngan bè bơh bi Y Xim Ndu bal mờ lŏ Chu Thị Lan dê, mpồl bơtiàn mŭt lơh broă tàm càr Dăk Lăk gam tơrbŏ bal mờ ală mpồl lơh broă nàng tơnguh bơta pràn, lơh geh ală jơnau kờñ dờng rơlao. Jăt ồng Phạm Hoài Nguyên Anh, củ ñiệm Mpồl bơcri priă mờ mŭt lơh broă (Mpồl Cau lơh sa kă bro kơnòm să càr Dăk Lăk), tŭ pơgồp bal, ală starup neh jòi gŏ uă bơta niam rơlao ai ală rơndăp broă mŭt lơh broă in. “Nàng mùl màl mờ geh cồng nha rơlao den đah mpồl bơcri priă mờ mŭt lơh broă cau lơh sa kă bro kơnòm să geh dùl mờ dùl, hơ̆ là dùl nă cau lơh broă bal mờ dùl nă cau. Tŭ do den kung gam tơrbŏ bal mờ ờ uă bơta phan bơh ală bơyô bè ka lăng, sầu riêng, dà bơka să. Ală bơyô hơ̆ gam là cau tàm mpồl Bơcri priă mờ Mŭt lơh broă Cau lơh sa kă bro kơnòm să, gơwèt mpồl Bơcri priă mờ Mŭt lơh broă Mpồl Cau lơh sa kă bro kơnòm să Dà lơgar Việt Nam dê. Mpồl geh lơh broă bè là tơrbŏ bal, tam pà bal, bơsram bal mờ gùng kă bro. bơdìh hơ̆ tai, geh cơl dŭ lơh broă, geh anih nggui lơh broă ờ sa priă, geh phan bơna nàng ală bơyô mŭt lơh broă gơtùi tus tàm hơ̆ nàng lơh ală broă lơh sa pah ngai”.

Sơrlèt gan mờ ală bơta lòng bơh kòp gơtờp, broă mŭt lơh broă tàm càr Dăk Lăk gam geh ală bơta tơngŏ niam bơh mpồl bơtiàn mŭt lơh broă tàm càr do. Ờ lơh jăt broă neh lơh lài ha là geh gal cau lơh, uă cau kơnòm să neh rơwah lơh jăt ală gùng dà broă lơh krơi is mờ geh gŏ ală rơndăp broă lơh geh kơ̆p kờñ tơnguh bơtàu. Ală kấp, gơnoar atbồ, ală mpồl cau lơh sa kă bro tàm càr kung neh pơn jăt tai geh ală broă lơh ai geh bơnàng jă tơnguh bơtàu ai ală cau mŭt lơh broă in, dong kờl geh bơta niam mŭt lơh broă tàm càr ngai sơlơ geh uă bơta mờ geh lơh nền nòn ngan.