Nam 1993, tơnơ̆ tŭ lơh sir jơh kơnòl broă ling klàng rê wơl tàm ƀòn, ồng Y Tuyên Buôn Krông ơm tàm ƀòn Drai H’Ling, xã Hòa Xuân, ƀòn dờng Buôn Ma Thuột, càr Dăk Lăk neh jơh nùs tus bal ală broă lơh mpồl bơtiàn tàm ală mpồl Đoàn Ơruh pơnu, Mpồl Cau ling yau tàm ƀòn dê. Tus nam 2015, ồng geh pin dờn pồ lơh Phó Ƀí thư Ci ƀộ, Kwang atbồ ƀòn Drai H’Ling dê.

Tàm 30 nam lơh broă mpồl bơtiàn, ồng Y Tuyên Buôn Krông gơ gơs rƀàng tàm tơrbŏ ai gùng dà broă lơh bơh Đảng, adat boh lam Dà lơgar dê tus rềp rlau tai mờ làng bol kòn cau Rơđê tàm xã Hòa Xuân đơs bal mờ ƀòn Drai H’Ling đơs is. Bulah tàm gơnoar broă lơi, ồng kung ờ rơngòt bơta kal ke, lòt tơl tàm sơnah ƀòn, teh tơl nơm mpồng hìu nàng mblàng yal jơnau, hòi jà làng bol lơh jat niam gùng dà broă lơh bơh Đảng mờ Dà lơgar dê. Ồng Y Tuyên Buôn Krông đơs: “Tàm ƀòn Drai H’Ling khà kờp làng bol uă ngan là làng bol kòn cau Rơđê geh rlau 93%, bơta git wă niam chài ờ ndrờm bal. Mờ jơh bal mờ nùs nhơm jơh nùs, añ sùm pơndờm pơnđiang làng bol tàm ƀòn lơh jat gùng dà broă lơh bơh Đảng mờ Dà lơgar dê neh ai. Tàm tơngai pa do, làng bol kung lơh jat niam sơl pơndrờm mờ ală nam lài do dê den añ gơ lơh chờ hờp ngan”.

Ồng Y Tuyên Buôn Krông pà gĭt, lài do làng bol tàm ƀòn kung gam prap uă bơhiàn bơrngơl gơla, bơhiàn kơ̆t bau, tơ̆p ƀồc sùm geh bơyai lơh uă ngai, lơh hoàc huơr ngan; ai bơhiàn kơ̆t bau, ai phan bơna uă tàm dơ̆ lùp bau ùr bơklau dê... Ồng sùm tus tơl hìu bơnhă làng bol nàng tơm bơh bơr, gĭt loh bơta kơ̆p kờñ, nùs nhơm mờ mblàng yal nàng tơnguh uă bơta gĭt wă, sang tĕ ală bơhiàn yau bơrgơl gơla lik bơh rài kis mpồl bơtiàn. Bal mờ hơ̆, ồng Y Tuyên Buôn Krông jơh nùs tus bal mblàng yal dong làng bol tam gơl bồ tơngoh kơlôi sơnơng tàm broă lơh sa suơn sre, khin cha bơcri priă bơtàu tơnguh lơh sa. Mò H’I Ƀuôn Yă (sùm hòi là Mè Bảo) làng bol tàm ƀòn do dê yal, làng bol sùm kờñ gơboh, lùp bơsram mờ lơh jat jơnau ồng Y Tuyên Buôn Krông dê mblàng tài bơh nùs nhơm jơh nùs, jơh tồr ngan mờ ƀòn. Mò H’I Ƀuôn Yă, đơs: “Bèp Hà lơh Kwang atbồ ƀòn bơh bol añ dê jŏ ngan rao. Tŭ hơ̆ ală gùng dà broă lơh bơh Đảng mờ Dà lơgar dê neh ai den ồng sùm yal, mblàng yal loh làng ai làng bol in, tŭ geh broă lơh tam gơl, pà sơntìl phan tam phan ròng ồng sùm tơngkah làng bol lùp bơsram bal mờ ai sơntìl phan tam. Làng bol bol añ lời uă nùs nhơm kờñ gơboh gơwèt mờ kwang atbồ ƀòn bol añ dê ngan”.

Ồng Y Niwa Ƀuôn Yă, Phó Củ tịc Ủy ƀan Ñân zân xã Hòa Xuân, ƀòn dờng Buôn Ma Thuột, càr Dăk Lăk pà gĭt, ồng Y Tuyên Buôn Krông là dùl nă Đảng viên krơh niam. Mờ gơnoar broă là Phó Ƀí thư Ci ƀộ mơkung là Kwang atbồ ƀòn Drai H’Ling dê, ồng Y Tuyên Buôn Krông sùm lam lài tàm tơl srơh. Bơh nam 2016 tus tŭ do, ồng bal mờ Ci ƀộ neh hòi jà làng bol tàm ƀòn tă pơgồp tai rlau 200 tơlak đong mờ gĭt nđờ rơbô ngai lơh broă nàng lơh bê tông rlau 2 kơi sồ gùng tàm dơlam ƀòn dê. Tus tŭ do, rlau 85% khà hìu bơnhă tàm ƀòn lơh geh hìu bơnhă niam chài, bơta hìu bơnhă deh kòn dơ̆ 3 gơmù uă ngan, rài kis phan bơna, nùs nhơm làng bol dê ngai sơlơ geh gơguh. Ồng Y Niwa Buôn Yă, Phó Củ tịc Ủy ƀan Ñân zân xã Hoà Xuân đơs là ồng Y Tuyên Buôn Krông geh uă bơta bơceh lơh, jòi bơsram, tam gơl pa broă lơh lơh broă nàng kờñ ai Cỉ thị, Nghị quyết bơh Đảng dê geh mut lơh ngan ngồn tàm rài kis. Ồng Y Niwa Ƀuôn Yă, đơs: “Ồng Y Tuyên Ƀuôn Krông mờ bơta mờng chài lơh broă 15 nam lơh kwang atbồ ƀòn mơkung là Phó Ƀí thư Ci ƀộ bơh ƀòn Drai H’Ling dê mơkung là cau geh làng bol pồ lơh là cau geh bơngă pin dờn neh 10 nam do rao. Mờ gơnoar broă là kwang atbồ ƀòn, Phó Ƀí thư Ci ƀộ bơh ƀòn dê, ồng neh sùm lơh krơh niam, lam lài tàm srơh bơt bơtàu ƀòn lơgar pa, mơkung mblàng yal, hòi jà làng bol pà is ù nàng ai ù, lơh ală broă bơt bơtàu gùng lòt, ồng kung sùm gĭt nền he là rƀàng tàm tơrbŏ kwơ màng đah gơnoar atbồ mờ làng bol”.

Ồng Y Tuyên Ƀuôn Krông là dùl nă Đảng viên geh bơngă pin dờn ngan, geh bơta pràn jak mờ jơh nùs ngan mờ broă lơh. Bơta pơnđơl pràn lơh ngan, tryang tryồng bơh ồng dê neh pơgồp bơnah bơt bơtàu mpồl tam klăc dờng jơi bơtiàn, lơh jat ală srơh tàm pơrlòng kờñ gơboh dà lơgar, chồl tơnguh bơta bơtàu tơnguh tơl ală bơta bơh ƀòn Drai H’Ling dê. Mờ bơta pơnđơl pràn lơh ngan tàm broă lơh, ồng Y Tuyên Buôn Krông là Đảng viên lơh sir jak ngan kơnòl broă, là cau geh bơngă pin dờn gơguh jak ngan tàm làng bơh jơi bơtiàn dùl ết nă cau dê.