Bi Võ Thị Tuyết Nhung, lơh broă tàm Gah Lơh lề phan sa, là dùl krơh pơnrơ ngan. 9 nam đềt mềr mờ broă lơh, ờ mìng jơh nùs jơh tồr ngan trăng gàr, sơm kòp ai ală cau kòp là kơnòm dềt in, bi gam uă dơ̆ pà mhàm tàm ală jơnau gơbàn mhar. Tus tŭ do, bi neh geh 22 dơ̆ pà mhàm mhar, di tŭ pơgồp bơnah dong kis uă cau kòp sơbơng roh in. Mờ bi, pah dơ̆ pà tĕ là geh tai dùl tŭ bơtuah kis geh jàu wơl.

“Ală tŭ dong kờl mhar bè hơ̆ den añ mìng kơlôi là nàng pà mhàm ai ală bơyô in, cèng wơl dùl tŭ bơtuah tai ai ală bơyô in. Den ală bơta tŭ hơ̆ den añ gŏ gơlơh chờ ngan tài bơh añ neh lơh geh dùl broă niam ai ală cau ndai in. Ờ mìng geh dùl nă añ cèng ală bơta broă hơ̆ tus jơh tơl nă cau in, mờ gam geh bơklau añ, mè añ, oh mi añ dê tai mờ ndrờm bè là mờr jơh ală cau tàm hìu bơnhă añ dê ndrờm tus bal pà mhàm. Ală tŭ dong kờl mhar, kờñ mpồl mhàm lơi den bol hi rơ̆p crăp rơcăng pà ai ală bơyô in”.

Bal mờ bi Nhung, pà mhàm dong kờl is neh gơgơs gơ bè ờs ngan gơ wèt mờ mpồl kwang bàng, cau lơh broă lơh sơnơm hìu sơnơm Kơnòm dềt Gia Lai dê. Đơng lam kâp cơldŭ bè bi Đỗ Thị Thu Hà, pà gĭt:

“Añ kơlôi là dùl ntờc mhàm ai pà là dùl rài kis ơm wơl, den he kơlôi hơ̆ là dùl jơnau kwơ dờng màng ngan. Tŭ hơ̆ là he ờ gŏ kơlôi là dùl broă lơi là dờng màng ờ. Tŭ he gŏ cau kòp tàm bơta gơbàn jal mhar ngan kờñ geh dong kờl mhar den he kơlôi là ơi he geh tơl pràn den he rơ̆p pà, bè hơ̆ gời lơm”.

Hala kâp gah bè ƀak sìh Rmah Din ndrờm neh uă dơ̆ pà mhàm, yal:

“Jơh ală cau lơh broă lơh sơnơm tàm Hìu sơnơm Kơnòm dềt do ndrờm geh nùs nhơm pà dong mhàm dong kờl cau nàng dong kờl cau kòp. Nùs nhơm tài cau kòp là hơđăng rlau jơh, den tàng ală y ƀak sìh halà ală cau lơh broă sền gàr cau kòp halà ală cau lơh broă ndai bơh hìu sơnơm dê sùm lơh jăt jơnau là pà mhàm dong kờl cau nàng dong kờl cau kòp”.

Măt tờm sền gŏ tơn gùng lòt sơm kòp gơ hòr mhàm bơh mè deh (Thalassemia) kòn dê tàm Hìu sơnơm Kơnòm dềt Gia Lai, bi Nông Thị Tươi, ơm tàm sàh Ia Piơr, ờ gơtùi pleh klàs bơta ngoh rơngăc ngan tềng đăp bơta jơh nùs jơh tồr ngan bơh mpồl ală y ƀak sìh tàm do dê. Tàm ală tŭ jiơ sơbơng roh halà ală tŭ mhàm sơm kòp gơgơs ờ huan ngan geh, ngan să tờm ală y ƀak sìh neh ờ gŏ kơlôi sơnơng pà tơn ală ntờc mhàm he dê nàng di tŭ dong kờl sơm kòp ai ală cau kòp là kơnòm dềt in.

“Kòn tờm gơtìp kòp gơ hòr mhàm bơh mè deh, mờ pah nhai pal mŭt ndo tơmŭt mhàm, pal tơmŭt mhàm sùm. Mờ tàm do sùm geh lài mhàm nàng ai ală sau in gàr geh pràn kơldang”.

Ală ntờc mhàm nùs nhơm ờ mìng pơgồp bơnah dong kis uă cau kòp in lơm, mờ gam gơrề jrô ơnàng làm uă jơnau pơyua gơboh kòn bơnus tàm mpồl bơtiàn. Hơ̆ kung là cơng tàng ngan ngồn ai jơnau bơto “Nùs nhơm cau lơh sơnơm bè cau mè” tŭ cau lơh sơnơm ờ mìng sơm kòp lơm, mờ gam jàu pà gơn kơnờm kis ai cau ndai in tai, bơh ală jơnau dềt rơhền ƀươn soh ngan tàm rài kis mơya dờng màng ngan gĭt lơh.