Bơh bồ nam tus tŭ do, gùt lơgar neh geh mờr 40 rơbô nă cau gơtìp kòp rang tàm 63 càr, ƀòn dờng, tàm hơ̆ geh mờr 3 rơbô 500 nă cau gơtìp mờ kòp rang tàm 61 càr, ƀòn dờng. Khà cau geh pin gơtìp kòp rang uă ngan tàm tiah đah Jum (geh 57% khà cau gơtìp tàm gùt lơgar), tiah tàm Gùl lơgar geh 19,2%, tiah đah Tô geh 15,1%, tiah Tây Nguyên geh 8,7%.

Tiến sìh ồng Hoàng Minh Đức, Lam bộ Kụk Rơcăng kòp pà git, neh geh 5 nă cau gơtìp chơ̆t tài gơtìp kòp rang tàm càr Quảng Nam: “Cau gơtìp chơ̆t pa do ngan là tàm kơnhoàl Nam Trà My. Kòn dềt do gơtìp kòp rang mơya ờ tus hìu sơnơm nàng kham, sơm kòp, mờ jà cau bơjơu tus tàm hìu nàng trang sền. Tŭ kòn dềt neh gơtìp jroă hơ̆ sồng tus hìu sơnơm den gơtìp chơ̆t”.

Ală càr, ƀòn dờng geh khà cau gơtìp kòp rang geh tơngŏ gơguh uă là Cao Bằng, Nghệ An, Quảng Nam, Đà Nẵng, Khánh Hòa, Dăk Lăk, Gia Lai, Kon Tum, Đồng Tháp, An Giang, Lâm Đồng. Geh ờ uă tiah geh cau gơtìp kòp uă mơya neh gơ-ơm wơl mờ rơhời geh sền gròi, tàm hơ̆ geh ală càr: Lào Cai, Hà Giang, Hà Tĩnh, Bình Thuận, Bạc Liêu, ƀòn dờng Hồ Chí Minh, Bình Dương, Đồng Nai, Tây Ninh, Cà Mau.

Jăt Kụk rơcang kòp yal, tàm nam 2024, khà cit vaccine kòp rang ai kòn dềt in tàm sơnam geh rơlao 97%. Mơya, tàm broă bơyai lơh cit vaccine kơrian mờ kòp tàm 31 càr, ƀòn dờng di gơlan gơtờp uă tŭ do gam 7 càr, ƀòn dờng geh khà cit vaccine kòp rang ờ hềt geh jăt jơnau kờñ bơh Ƀộ Lơh sơnơm dê.

Đơng lam dơ̆ pơrjum pờ tơlik tàm internet gùt lơgar, Ƀộ trưởng Ƀộ Lơh sơnơm mò Đào Hồng Lan sồr ală mpồl lơh sơnơm rơcang kơrian kòp gơtờp bơh Ƀộ dê pal kah bơta kòp rang tàm ală tiah geh khà cau cit vaccine ờ uă, ală càr tiah kơh bơnơm, do là tiah geh gal làng bol jơi bơtiàn ờ gal cau ơm kis, mờ bơta geh tus mờ broă lơh drơng ala gam ờ uă. “Ƀộ Lơh sơnơm gam yal Cíñ phủ lơh geh jơnau sồr lơh pràn broă cit vaccine kòp rang tàm ală tiah. Ƀộ kung neh lơh ală broă rơndăp lơh cit vaccine kòp rang nam 2025 do, is ồn là tŭ do, trồ tiah tam gơl kàl mờ ală tam gơl ni sơna, lơh geh ală bơta kòp gơtờp, is ồn là kòp rang gơguh pràn…”

Ƀộ Lơh sơnơm kung sồr ală càr, ƀòn dờng sùm sền gròi bơta gơlik geh bơh kòp rang gơtờp, ai lài broă geh tơl cau lơh broă, phan lơh broă, priă jền, phan lơh sơnơm nàng lơh mhar broă cit vaccine rơcang kơrian kòp rang, lơh gơs broă cit bơtơl, cit jơh tàm nhai 3 do.