Lŏ Nguyễn Thị Thu Dền pà git: “Uih yơ, tŭ hơ̆ añ ñìm tơn, ni sơna ƀák sĩ Khải đơs là neh lik bloh do, kòn klao lik bloh do, bơh tŭ hơ̆ dà măt añ gơhòr, chờ hờp ngan. Nùs nhơm gơlơh niam bơnĕ, gơboh gơbài ngan, gơlơh bè he gơs kơnờm wơl, pràn kơl dang ngan”.

Hơ̆ là jơnau yal bơh lŏ Nguyễn Thị Thu Dền, kis tàm ƀòn drà dềt Buôn Trấp, kơnhoàl Krông Ana, càr Dăk Lăk dê tŭ dơ̆ sơnrờp geh tìp măt kòn tàm cơl dŭ reh. Lŏ Dền yal, ùr bơklao lŏ neh ờ geh kòn rơlao 5 nam, kung neh geh tŭ lòt kham uă hìu sơnơm tàm ƀòn dờng Hồ Chí Minh, mơya ndrờm ờ geh cồng nha. Tàm 05 nam lòt jòi kòn, bàr nă ùr bơklao lŏ neh tìp mờ uă bơta kal ke bè nùs nhơm bal mờ priă jền. Nam 2023, ni sơna geh git tus broă lơh “Ròng gàr bơta chờ hờp” bơh Hìu sơnơm Đại họk Y Dược Buôn Ma Thuột bơyai lơh, ùr bơklao lŏ Dền jòi tus nàng tơrlòng bơta bơtoah. Mờ bơtoah ngan neh tus mờ ùr bơklao lŏ tŭ sră dan bơh lŏ dê geh kĭ. Bơh bàr dơ̆ jào, lŏ neh geh bun kòn tơnhoa.

Kung bè lŏ Dền, ùr bơklao lŏ Nông Thị Thu, kis tàm thôn 6A, xã Ea Wy, kơnhoàl Ea Hleo, càr Dăk Lăk kung neh geh bơta gơboh sơl bơh broă lơh do. Lŏ Thu pà git, tàm 11 nam bàr nă ùr bơklao lŏ neh lòt gùt tiah nàng jòi kòn. Bơh broă lòt jòi do, lŏ neh rơlao 1 dơ̆ jồp, 03 dơ̆ gơtìp gơ-iò, 1 dơ̆ reh poluyp hìu kòn. Jàng lah lời sơrbì tài priă bal mờ nùs nhơm ờ geh tai, mơya bơta gơboh gơbài ni sơna neh tus tŭ lŏ neh gơ-ơn bun tàm broă lơh “Ròng gàr bơta chờ hờp” tàm Hìu sơnơm Đại họk Y Dược Buôn Ma Thuột nam 2023. Tàm 9 nhai geh bun, lŏ Thu kung tìp uă ngan bơta kal ke tŭ bun gơtìp ờ tơl dà, bun dềt rơlao mờ sơnam geh, gơtìp đồm sơdàng tàm tơngai geh bun, di gơlan gơ-iò. Lŏ Thu ngoh rơngăc đơs: Ờ kơlôi là geh kòn, tài lơh neh git nđờ dơ̆ bơh tàm ală tiah ndai mờ gơtìp chơ̆t bun, bơtoah ngan dơ̆ den geh kòn. Tŭ deh kòn gơlơh bè tàm mpao, ờ git bè lơi tơn, ni sơna geh kơn đu kòn tàm tê”.

Là cau geh lơh broă bal tơn mờ ală ùr bơklao ờ geh kòn tàm broă lơh “Ròng gàr bơta chờ hờp”, ƀák sĩ Lê Huy Khải, Atbồ mpồl dong kờl deh kòn IVFMD Buôn Ma Thuột, Hìu sơnơm Đại họk Y Dược Buôn Ma Thuột pà git, ală cau ờ geh kòn jòi tus uă ngan neh tàm bơta kal ke ngan, ờ chờ tài neh lòt mờ sơm uă tiah mờ ờ geh cồng nha. Den tàng, bơdìh mờ broă sơm kòp, ală ƀák sĩ gam pal sơm bè nùs nhơm nàng cau kòp iang nùs, pin dờn, lơh geh cồng nha uă ngan: “Kung pơnyờ să ngan sơl, mờ bơtoah ngan tŭ añ geh sền gŏ ală cồng nha neh lơh geh, bal mờ să tờm añ mờ cau kòp lơh broă bal nàng lơh geh. Añ mìng kơ̆p kờñ là geh pơn jăt tai lơh bè lơi nàng lơh broă bal rơlao tai mờ cau kòp nàng cau kòp geh cồng nha niam bè do”.

"Ròng gàr bơta chờ hờp” là broă lơh geh bun tàm ding ờ sa priă bơh mpồl lơh broă IVFMD ai ală ùr bơklao ờ geh kòn in, geh jơnau sồr lơh geh bun tàm ding mơya tài bơta lơh sa gơtìp kal ke den tàng ờ hềt geh lơh. Broă lơh do geh sơn đờm mŭt bơh nam 2014 mờ neh lơh broă bal mờ mờr 600 nă ùr bơklao kờñ geh kòn, geh rài kis gơtìp kal ke. Mùl màl geh pơgồp bal tàm broă lơh bơh nam 2023, Hìu sơnơm Đại họk Y Dược Buôn Ma Thuột neh dong kờl geh cồng nha 6 nă ùr bơklao, tàm hơ̆ geh 3 nă neh geh kòn se pràn kơl dang neh deh. Kờp jơh priă lơh dong kờl tàm Broă lơh rơlao 1 tơmàn 100 tơlăk đong. Ƀák sĩ Võ Minh Thành, Kwang atbồ Hìu sơnơm Đại họk Y Dược Buôn Ma Thuột pà git, Hìu sơnơm Đại họk Y Dược Buôn Ma Thuột kung gam dờp sră ai Broă lơh “Ròng gàr bơta chờ hờp” nam 2024. Nam do, Hìu sơnơm rơ̆p dong kờl 10 nă ùr bơklao ờ geh kòn geh rài kis gơtìp kal ke tàm Tây Nguyên: “Broă lơh do cèng geh bơta kwơ uă ngan mờ di pal mờ gùng dà broă lơh bơh Hìu sơnơm dê den tàng bol añ rơ̆p pơn jăt tai lơh broă bal mờ lơh ngan lơh bè lơi niam ngan nàng làng bol bơh bol añ dê geh dờp bơta kwơ bơh cồng nha bơh bơta chài măi mok pa kung bè broă dong kờl priă jền”.

Ală broă dong kờl mùl màl bơh Broă lơh “Ròng gàr bơta chờ hờp” tàm Hìu sơnơm Đại họk Y Dược Buôn Ma Thuột neh lơh geh mùl màl jơnau kơ̆p kờñ bè dùl hìu nhă gơboh gơbài mùl màl bơh uă ùr bơklao ờ geh kòn gơtìp kal ke tàm Tây Nguyên. Pơgồp bal tàm broă tơnguh geh tai nùs nhơm pin dờn, bơta pràn tus mờ ală hìu nhă ờ geh kòn tàm tơngai lòt jòi kòn bơh ală cau ờ geh in.