Tàm dơ̆ ai mhàm dong kờl geh Liên đoàn Lao động càr Lâm Đồng pơgồp bal mờ Mpồl Cữ thập đỏ càr bơyai lơh tàm ƀòn dờng Dà Làc, lŏ Phạm Thị Hồng, đoàn viên Kông đoàn gah bơto bơtê mờ bơsram đơs: Do là broă lơh geh kwơ màng ngan, den tàng pal geh lơh mờ bơyai lơh sùm rơlao, hòi jà tai geh uă cau tàm mpồl bơtiàn tus bal. “Tŭ dờp geh jơnau yal geh ngai chờ ai mhàm dong kờl tàm anih do oh mi cau pơgru bơto tàm hìu bơsram geh tus bal is, ai mhàm dong kờl tàm nùs nhơm chờ hờp ngan. He kơlôi là tă pơgồp dùl bơnah dềt lơi hơ̆ ai mpồl bơtiàn in den gơlơh chờ hờp ngan”.

Do là dùl tàm ală broă lơh geh pơnrơ ngan geh bal tàm broă pơgồp bal đah Liên đoàn Lao động càr mờ Mpồl Cữ thập đỏ Lâm Đồng tơngai bơh nam 2019 tus 2023, nàng pơn jăt tai lơh jăt bơhiàn ai mhàm dong kờl is drơng ai broă sơm kòp, rơcang tàm ală tŭ gơtìp jal mhar, ni sơna mờ di pal mờ broă kờñ tàm broă sơm kòp cau kòp in.

Pa do ngan, Mpồl đơng lam lam sồr ai mhàm dong kờl is càr Gia Lai bơyai lơh pơrjum tơn jơh broă ai mhàm dong kờl is nam 2022, lơh jăt rơndăp broă nam 2023. Jăt jơnau yal, nam do gùt càr Gia Lai neh bơyai lơh lam sồr geh 84 dơ̆ ai mhàm dong kờl is, cồng nha dờp geh rơlao 18 rơbô kơl dung mhàm, geh 120% khà broă rơndăp lơh geh ai. Tàm hơ̆, Hìu sơnơm càr Gia Lai neh dờp rơlao 14 rơbô 600 kơl dung mhàm mờ hìu sơnơm Quân y 211 dờp rơlao 3 rơbô 300 kơl dung mhàm. Geh 416 kơl dung mhàm jal mhar neh geh ai di tŭ ai ală hìu sơnơm in nàng sơm kòp cau kòp in. Ồng Dương Đình Diện, Phó kwang atbồ ƀan Thường trực Mpồl đơng lam lam sồr ai mhàm dong kờl is, Củ tịc Mpồl Cữ thập đỏ càr Gia Lai đơs: “Nam 2022 mờ broă đơng lam nền nòn bơh UɃÑZ càr kung bè mpồl đơng lam lam sồr ai mhàm dong kờl is càr den bơta pràn hòi jà tàm broă ai mhàm dong kờl is geh uă ngan tàm làng bol mờ ngai sơlơ hòi jà uă làng bol tus bal broă ai mhàm dong kờl is. Bol añ ai ală ngai pơn jăt tai geh lơh bal tai, den bol añ lơh ngan lơh geh uă broă dong kờl, ai mhàm dong kờl cau nàng mpồl bơtiàn ƀòn lơgar tus bal tàm broă ai mhàm dong kờl is tàm tơngai tus”.

Tàm càr Dăk Lăk, Mpồl đơng lam lam sồr ai mhàm dong kờl is càr kung neh bơyai lơh Pơrjum pơn jờng cau ai mhàm dong kờl is geh pơnrơ jăk nam 2022. 52 nă cau geh pơnrơ jăk tàm broă ai mhàm dong kờl is neh geh pơn jờng tàm dơ̆ do. Do là ală cau tus bal ai mhàm dong kờl uă dơ̆ tàm nam 2020 mờ 2021. Ồng Nguyễn Tấn Chờ, deh nam 1967, kis tàm thôn Tiến Thịnh, xã Quảng Tiến, kơnhoàl Cư̆ Mgar, càr Dăk Lăk neh 48 dơ̆ tus bal ai mhàm dong kờl is đơs là: “Añ gŏ gơlơh là añ pal geh lơh ờ uă broă lơi nàng dong kờl ală cau gơtìp ờ bơtoah tàm rài kis. Tus tŭ do añ kung neh geh 48 dơ̆ ai mhàm dong kờl is mờ kung dan ai pà phan tàm să nàng tơnơ̆ do bŭ lah he chơ̆t den he kung gam lời wơl ờ uă bơta tàm rài kis, ai cau ndai in. Bơh ală kòn tàm hìu nhă añ kung tus bal ai mhàm dong kờl sơl mờ añ kung kờñ lam sồr ală cau in là, he bañ kơlôi ờ di bè broă ai mhàm dong kờl lơh gơtìp ờ niam tus mờ bơta pràn kơl dang să jan, lài jơh là he dong kờl cau, dơ̆ bàr là dong kờl să jan he geh tam gơl mhàm, să jan he pràn kơl dang rơlao ờ gŏ di lơh ờ niam tus mờ bơta pràn kơl dang să jan”.

Dăk Lăk là dùl tàm jơ̆t càr lam lài gùt lơgar bè broă ai mhàm dong kờl is. Càr tŭ do geh 200 Mpồl đơng lam ai mhàm dong kờl is ală kấp; 8 Mpồl lam sồr ai mhàm dong kờl is mờ ai mhàm rơcang lài... Pah nam càr geh di pơgăp 30 rơbô nă cau dan cih măt ai mhàm dong kờl is, dờp geh rơlao 20 kơl dung mhàm.

Mò H’ Yim Kđoh, Phó Củ tịc UɃÑZ càr, kwang atbồ Mpồl đơng lam ai mhàm dong kờl is càr Dăk Lăk đơs là, geh cồng nha do là kơnờm tàm broă tus bal niam bơh ală cau tàm mpồl Đơng lam, lam sồr ai mhàm dong kờl ală kấp, ală mpồl lơh broă, ală kơnhoàl, ƀòn dờng bal mờ broă lơh niam bơh ală cau geh nùs nhơm ian is dê tai. “Tàm tơngai tus pơn jăt tai hòi jà lam sồr uă cau tus bal ai mhàm dong kờl is rơlao, mờ kơ̆p kờñ jơh ală cau pràn kơl dang, geh broă tam pà bal tus mờ cau gơtìp kòp tê jê să. Do kung là jơnau kơ̆p kờñ ai jơh ală cau kòp in mờ he pin dờn là, mờ broă lơh ngan uă bơh ală mpồl lơh broă cíñ trị bal mờ jơh ală jơi bơtiàn kòn cau kis tàm càr Dăk Lăk geh uă bơta niam nàng ai mhàm dong kờl rơlao, ai cau kòp in nàng cau kòp geh dùl rài kis niam bơnĕ rơlao”.

Pa do, tàm ƀòn dờng Buôn Ma Thuột kung neh bơyai lơh tơlik măt Mpồl cau ai mhàm RH- càr Dăk Lăk. Mpồl do geh 3 mpồl mờ 43 nă cau, là ală cau geh mpồl mhàm RH-, gơwèt mpồl bơtiàn cau geh mpồl mhàm ờ hoan geh ngan. Do là anih tơrgùm, tam klăc bal ală cau tàm mpồl nàng bơ̆t bơtàu mpồl ai mhàm dong kờl rơcang lài, lơh geh cau geh mpồl mhàm ờ hoan geh tus bal ai mhàm dong kờl niam ờ do ờ dă.