Sơrlèt rơlao 40 kơi sồ gùng nàng tus siêu thị tàm ƀòn dờng Buôn Ma Thuột blơi phan Satềp, lŏ Võ Thị Diệu Hương kis tàm kơnhoàl Krông Păc pà git, lòt ngài nàng blơi phan Satềp tài ờ hềt di nùs mờ phan geh tăc tàm drà kă bro. Lŏ Võ Thị Diệu Hương đơs tai: “Phan kă bro tàm siêu thị geh uă bơta mờ niam, tài geh tơrgùm dùl bă den tàng he gơtùi tơrgùm blơi geh niam rơlao. Mờ mŭt tàm siêu thị kung gŏ iang nùs rơlao bè bơta niam phan kă bro tài drà hờ bơdìh geh uă tŭ kung ngòt tăc phan ờ ngan, den tàng rơwah broă blơi phan tàm siêu thị niam rơlao”.

Kung gờñ lòt blơi ờ uă bơta phan Satềp sơl, lŏ Nguyễn Thị Mai Hương kis tàm sơnah ƀòn Ea Tam, ƀòn dờng Buôn Ma Thuột đơs là, tŭ do geh uă tơngai nàng rơwah, sền gròi phan kă bro nền rơlao, pleh mờ broă blơi ờ di ală phan ờ niam. Lŏ Nguyễn Thị Mai Hương đơs: “Gơwèt mờ drà kă bro phan Satềp añ gŏ geh uă bơta phan ngan, priă tăc kung uă bơta sơl bơh bè ờs tus kas. Jơnau kờñ rơwah phan bơh hìu nhă añ dê nam do den phan pal niam măt mờ pal geh bơta bơkah tai. Añ kung kơ̆p kờñ ală anih lơh broă geh gơnoar sền nàng git bơta kloh niam phan sa uă rơlao tai nàng bol añ iang nùs”.

Drơng Satềp Giáp Thìn nam do, ală mpồl lơh sa kă bro, hìu tam pà phan tàm càr Dăk Lăk neh rơcang geh phan, lơh broă bal, hơ mờ ală hìu ai phan geh bơngă pin dờn nàng gàr bơta kloh niam. Lŏ Nguyễn Thị Em, cau tờm hìu tăc phan tềng gùng Nguyễn Tất Thành, sơnah ƀòn Tân Lợi, ƀòn dờng Buôn Ma Thuột pà git: “Đơs ngan là hìu tăc phan añ dê kung geh bơngă pin dờn tàm drà kă bro den tàng blơi phan geh sền gròi nền nòn ngan, phan lơi geh bơngă pin dờn bơkah, geh tem lir loh làng hơ̆ sồng blơi phan, di lah ờ tŭ do tàm pơrlòng siêu thị hơ̆ sồng ƀăc hoá pờ geh uă ngan den tàng he pal geh bơngă pin dờn phan bơkah niam den hơ̆ sồng hòi jà cau tus blơi he in”.

Nàng gàr kloh niam phan sa di lài, tàm mờ tơnơ̆ Satềp, càr Dăk Lăk neh sồr ală anih lơh broă atbồ tơnguh broă gàr kloh niam phan sa, mờ đơng lam ală mpồl lơh broă ală tiah bơyai lơh sền gròi, lơh glài broă lơh, kă bro phan sa ờ ngan, ờ bơkah. Ală broă lơh yal tơngit kung geh càr lơh pràn nàng dong kờl cau lơh sa, lơh gơs phan, kă bro phan sa git mờ geh kơnòl tàm broă gàr kloh niam phan sa, mờ dong kờl cau ngui sa in wă nàng blơi geh phan sa kloh niam nàng gàr niam bơta pràn să jan. Ồng Hoàng Văn Nghĩa, Phó kwang atbồ gah lùp sền Sở Nông nghiệp mờ Phát triển Nông thôn càr Dăk Lăk pà git: “Bol añ sền kwơ broă tus sền ală phan geh lơh tờm ai Satềp mờr tus in bè ală bơta phan bièr, alăk, ƀañ kèo, poăc mờ ală bơta phan geh lơh bơh poăc, biăp, kơnuh, plai chi. Bơh broă sền den di tŭ gŏ ală broă lơh tìs bè kơrnoăt geh ai kloh niam phan sa mờ bol añ lơh glài nền nòn ală cau lơi lơh tìs. Bơh broă sền den mblàng yal ai ală hìu lơh, kă bro ală bơta phan sa bơh phan geh ai nàng lơh tus mờ phan geh lơh nàng tăc pal geh lơh 1 đah jăt mờ kơrnoăt geh ai bè kloh niam phan sa”.

Broă tus bal pràn bơh gah lơh broă geh gơnoar là jơnau tờm nàng gàr kloh niam phan sa di tàm Satềp neh mờr tus. Bŭ lah bè hơ̆, làng bol kung pal lơh jăt ală jơnau bơto sồr bơh ală anih lơh broă geh gơnoar, geh broă rơwah ngăc ngar, mìng blơi mờ ngui sa phan git anih lơh gơs loh làng, sền nòn tơngai geh ai ngui, jơnau cih tềng kơl dung phan.