Nggui kơ̆p dờp sơnơm tơnơ̆ mờ tŭ neh kham, ồng Đoàn Thanh Phương, thôn Hội Phú, sàh Tuy An Đông pà git: “Mùl màl ưn ngài uă ngan ală mpồl lơh broă nùs nhơm dong kờl is, dà lơgar, tŭ bol añ gơtìp mìu dà tih dà lìu den mìng git pal tềng chi ơm, jơh ală hìu đam ndrờm roh jơh. Tơnơ̆ dà tih dà lìu dờng bè hơ̆ ală mpồl lơh broă nùs nhơm dong kờl is neh pà phan, còp să, bal mờ dà lơgar, ală anih lơh broă neh dong kờl kham kòp, pà sơnơm Añ ưn ngài uă ngan”.

Cèng kơl dung sơnơm pa geh dờp, mò Lê Thị Hương tàm sơnah ƀòn Đông Hoà, càr Dăk Lăk pà git, mò gơlơh nùs nhơm ngoh rơngăc ngan tŭ geh ală y ƀák sìh bơh ngài ngan tus tàm do nàng sền gàr bơta pràn kơl dang să jan làng bol in: “Kơno cau yal geh mpồl bơh ƀòn dờng Hồ Chí Minh tus kham kòp làng bol bol añ in, añ chờ hờp ngan, ală ƀák sìh, cau lơh broă jơh nùs nhơm, tề lam làng bol nền nòn. Añ ưn ngài uă ngan”.

Bơh ngai 23 nhai 11 tus tŭ do, bal mờ mpồl y ƀák sìh tàm càr, càr Dăk Lăk neh dờp 5 mpồl ƀák sìh lơh broă nùs nhơm dong kờl is tus bơh Hà Nội, Hải Phòng, Đồng Nai, ƀòn dờng Hồ Chí Minh… tus kham sơm kòp tàm 11 sàh gơtìp aniai bơh mìu dà tih dà lìu, mờ 22 anih kham ntrờn. Mìng is càr Đồng Nai ai geh 3 mpồl lơh sơnơm tus dong kờl.

Thạc sìh, ƀák sìh Mìng gah II Nguyễn Trọng Nghĩa, Phó Kwang lam bồ Hìu sơnơm Nhi Đồng Đồng Nai pà git, mìng tàm 2 ngai lơh broă tàm sàh Hoà Mỹ mờ Tuy An Đông, mpồl neh kham mờr 1 rơbô 500 dơ̆ làng bol in, tàm hơ̆ kơnòm dềt mìng gơtìp ală bơta kòp gơlik dà muh, duh să, rơgai ờ pràn; cau dờng gơtìp uă bơta kòp tềng bơdìh să, gơguh huyết áp, klung mờ mồr tài sồt. “Mpồl bol añ rơcang nền nòn ngan, añ cèng dùl mpồl ƀák sìh tàm hơ̆ geh bal ƀák sìh sơm kòp kơnòm dềt, ƀák sìh sơm kòp cau dờng, ƀák sìh sơm kòp mhar mờ 1 nơm rơndeh lơh sơnơm, 1 nơm rơndeh pơn diang phan. Broă lơh mpồl dê geh tơl sơnơm. Tàm sơnơm geh 2 mpồl: dùl mpồl là 1 rơbô kơl dung sơnơm hìu nhă geh pà gời bè sơnơm duh să, sơnơm tơmù duh să, tơrmù jê, gơjroh ndul… Dơ̆ bàr là sơnơm cèng bal nàng kham kòp jăt sơnơm geh ai”.

Bal mờ broă kham sơm kòp, gah lơh Sơnơm càr Dăk Lăk ai lài broă lơh kloh tiah kis tơnơ̆ dà tih dà lìu. Ală mpồl lơh broă sơndră mhar bơh Sờh Lơh sơnơm càr pơgồp bal mờ kwang àng, ling klàng bal mờ gơnoar atbồ pơn jăt tai tơrgùm siồ siă, tơ̆p phan ròng gơtìp chơ̆t, pơs wàs, lơh kloh vi khuẩn dà ngui sa. Tàm ală tiah dà soăt, sơnơm gơsơ̆t vi trùng geh ƀồm sùm nàng tơrmù broă di gơlan gơtờp kòp. tơrlung dà geh rào kloh, lơh kloh vi khuẩn mờ Cloramin B; broă jăt sền ală kòp gơtờp bè kòp mprơm gơlik mhàm, kòp jê ndul gơjroh, kòp jơng tê bơr geh tơnguh sền gròi.

Ƀák sìh Châu Trọng Phát, Phó Kwang lam bồ Anih tờm Gròi sền kòp tê jê să càr Dăk Lăk pà git: "Pah ngai bol añ lơh geh bơh 5 tus 10 mpồl, tus tàm ală ƀòn. Bơdìh hơ̆ tai broă mblàng yal dong kờl mpồl bơtiàn tàm broă lơh kloh tiah ơm kis, lơh kloh nàng rơcang kơrian kòp bol añ tơnguh ală broă jăt sền nàng gŏ ală kòp gơtờp di gơlan gơlik geh. Bơdìh hơ̆ tai bol añ kung rơcang bơto sồr làng bol lơh ală broă nàng geh dà ngui sa niam kung bè mblàng yal bè kloh niam phan sa ai làng bol tàm ală ƀòn in”.

Kơnờm mờ broă tus bal mhar bơh gah Lơh sơnơm càr bal mờ broă dong kờl di tŭ bơh ală mpồl ƀák sìh mờ pà sơnơm. Ală mpồl lơh sơnơm ntrờn kung neh pơlam sền gàr pràn kơl dang să jan, bơto sồr sền gàr cau kòp tàm hìu mờ dong kờl phan lơh sơnơm, dong kờl làng bol gơmù uă ngan bơta di gơlan gơtờp kòp, brồ guh lơh sa mờ kơl jăp rài kis tơnơ̆ dà tih dà lìu.