Tơnơ̆ mờr 1 nhai reh nội soi mờ laser sơm gơprồ gùng dà đồm, ồng Lê Thanh Khởi, 57 sơnam, tàm sơnah ƀòn Buôn Ma Thuột, neh gơtùi lòt rê, lơh broă bè ờs. Tàm 2 nam gơtìp kòp, ồng uă dơ̆ gơtìp kòl đồm, jê mờ pal crăp ding nàng gơlik dà đồm, mơya kung gam ờ niam sơl. Tŭ tus Hìu sơnơm Đại học Y Dược Buôn Ma Thuột kham, ồng geh sồr reh mờ laser Holmium nàng sơrbì poăc tềng gùng dà đồm as lơh kòl gùng dà đồm. Ồng Khởi pà git, lài do, bơta jê neh lơh ồng ngòt reh. Mơya, ngui gùng dà broă lơh pa, măi mok pa ờ hoan sơgràm, ồng gơlơh iang nùs. Tơnơ̆ dơ̆ reh, bơta pràn kơl dang să jan ồng Khởi neh pràn wơl mhar: “Bác sĩ đơs là reh mờ gùng dà broă lơh do ờ jê, niam, reh mờ laser. Reh gơs là lòt đồm gơtùi, ndrờm bè he pa tơrbluh. Reh nội soi do ờ jê, di lah reh ngan den jê, añ ờ khin reh ờ”.

Kung geh dờp mờ bơta chờ bơh bơta chài pa, măi mok pa tàm broă lơh sơnơm, mò H’ Djak Ayun, 46 sơnam, tàm sàh Cư̆ Mgar neh pràn wơl să jan tơnơ̆ mờ tŭ reh nội soi kồ ntìng gòr nggko pa do. Lài mờ hơ̆, tàm 10 nam, mò sùm gơtìp jê, lơgah bơh ngko, pơnì tus tàm đo tê ma, lơh gơrềng ờ niam tus mờ rài kis, broă lơh pah ngai. Cồng nha chụp cộng hưởng từ sền gŏ kồ ntìng C5-C6 gơtìp nđir che tơngoh. Mò H’ Djak yal bè bơta chờ tơnơ̆ mờ tŭ reh. “Añ gơtìp jê ntìng gòr ngko 10 nam do bloh, gơtìp jê mờ lơgah sùm bơh pơnì tus đo tê ma, lơh gơrềng ờ niam tus mờ rài kis pah ngai. Añ geh ală bác sĩ tàm Hìu sơnơm reh mờ nội soi. Tŭ do, bơta pràn să jan añ dê neh niam wơl, ală broă lơh pah ngai neh bè ờs wơl. Añ ưn ngài ală y, bác sĩ”.

Bơh ală cau kòp mùl màl, gơtùi gŏ gơnoar bơh măi mok tàm broă rề ơnàng bơta pràn sơm ală bơta kòp kal ke. Mơya, cồng nha gam gơrềng tàm bơta kòp, jơnau sồr sơm mờ bơta pràn bơh mpồl cau lơh sơnơm.

Bác sĩ Lê Xuân Nguyên, lơh broă tàm Hìu sơnơm Đại học Y Dược Buôn Ma Thuột pà git, nam 2026, hìu sơnơm bơcri priă tai nàng blơi ală phan drơng tàm broă reh nội soi bàr đah UBE sơm kòp gòr ngkời mờ nội soi tă ală phan tàm broă sơm ală sồt tàm gùng tơrdih phan sa. Ală măi mok do dong kờl bác sĩ sơm di pal rơlao, tơrmù broă reh bè ờs uă mờ ai tơl bơta niam nàng cau kòp gờñ pràn wơl.

Jăt bác sĩ Lê Xuân Nguyên yal, broă ngui ală phan mờ bơta chài pa kung ai geh bơta niam nàng mpồl bác sĩ kơnòm să tơnguh uă bơta pràn lơh broă, rơhời lơh tờm ală gùng dà sơm kòp nền nòn. “Ală kòp bè do den lài do mìng geh ală bác sĩ Mìng gah II ha là Tiến sĩ hơ̆ sồng geh tus bal reh, sơm ai cau kòp in. Kơnờm mờ măi mok, măi mok pa geh uă bè tŭ do, ală bác sĩ kơnòm să bè añ kung gơtùi lơh sơl. Reh mờ măi den cau kòp ờ hoan gơtìp rơlao, pràn wơl mhar mờ tơnguh bơta pràn niam rơlao”.

Ờ mìng tam gơl bơta chài sơm, ală hìu sơnơm tàm càr Dăk Lăk gam rơhời ngui măi mok tàm broă kham, sơm kòp, bơh broă dan cih măt kham kòp điện tử tus mờ lơh sră sơm kòp điện tử. Do là ală broă lơh geh pơgồp bal mờ jơnau kờñ lơh pràn jăk chài, măi mok, tam gơl pa bơceh lơh mờ tam gơl sồ jăt Jơnau lơh nền tàm Pơrjum sồ 57 bơh Bộ Chính trị dê.

Càr Dăk Lăk tŭ do geh 11 hìu sơnơm bơdìh dà lơgar, mờ 1 rơbô 621 nơm jơnờng piam kòp geh ai. Bác sĩ Phạm Minh Hữu, Phó Kwang lam bồ Sờh Lơh sơnơm càr Dăk Lăk pà git, broă ală hìu sơnơm bơcri priă blơi phan lơh broă, ngui măi mok mờ tơnguh broă pơgồp bal broă lơh gam pơgồp bal tàm broă tơnguh uă bơta pràn ngui broă lơh drơng ala lơh sơnơm geh bơta niam tơn tàm càr dê. “Tŭ do, mờ kơrnoăt sră kham sơm kòp ờ sa priă kung gam geh ngui ală cồng nha kham, xét nghiệm geh tơm mờ sră kham sơm kòp ờ sa priă, rơ̆p ai geh bơta ƀuơn nàng ală cau kòp kờñ sơm uă tŭ lơi kung rơcang geh lơh. Mờ dong kờl uă ngan ală hìu sơnơm dà lơgar bè broă gal ir cau, mờ ală cau kòp jroă den geh broă pơgồp bal nàng sền git kòp, dong kờl làng bol”.

Mùl màl tàm càr Dăk Lăk pà gŏ, lơh pa jơh broă lơh sơnơm ờ mìng geh tàm broă bơcri priă blơi măi mok mờ gam tàm bơta pràn ai măi mok tàm broă sơm kòp, tơnguh uă bơta pràn mpồl lơh broă mờ rề ơnàng dơ̆ niam geh ngui broă lơh drơng ala ai làng bol in. Tŭ geh lơh ndrờm bal, ală tam gơl do rơ̆p pơgồp bal lơh mùl màl jơh Jơnau lơh nền tàm Pơrjum sồ 57 dê tàm gah lơh sơnơm, wèt tus jơnau kờñ tơnguh uă bơta pràn drơng gàr bơta pràn kơl dang să jan mờ tơrmù bơta ờ ndrờm bal tàm broă geh bơta chài pa đah ală tiah dê.