Jăt mờ hơ̆, càr Gia Lai ai lài bơcri priă lơh, lơh dờng nam mờ blơi tơl phan lơh broă ai 24 hìu sơnơm sàh gơwèt tiah nhàr lơgar, tiah kal ke in. Ală gah broă geh rề ơnàng mpồl hìu lơh broă, lơh pa tiah kham sền mờ rùp, xét nghiệm, siêu âm, sơm mhar lài ngan, mpồl phan lơh kloh dà tơlik bơh hìu sơnơm bal mờ ală broă lơh  kwơ màng ndai. Kờp jơh priă ai broă lơh do in di pơgăp 288 tơmàn đong.

Bal mờ broă bơcri priă blơi phan bơna, càr Gia Lai kung dan lơh ală broă lơh kham pràn kơl dang să jan jăt tơngai ờ sa priă ai làng bol tàm 12 sàh tiah nhàr lơgar, tiah bồt dà lềng mờ tiah gơtìp kal ke uă in. Cau geh kham là cau jơi bơtiàn ờ gal cau, cau dờng sơnam, cau geh màng mờ dà lơgar, cau gơwèt mpồl dong kờl bơh mpồl bơtiàn, hìu rơƀah, hìu ndrờm mờ rơƀah, cau ùr tàm sơnam deh dùh mờ kơnòm dềt hờ đơm 6 sơnam. Broă kham pràn kơl dang să jan rơ̆p pơgồp bal mờ broă lơh sră nggal kham pràn să jan điện tử, pơlam, gŏ gờñ kòp tê jê să mờ ntrờm hìu sơnơm nàng sơm kòp tŭ kờñ.

Mờ Mpồl duh broă Làng bol càr Gia Lai kung gam lơh jơnau lơh nền tàm pơrjum pa bè broă hòi jà mờ dong kờl gơwèt mờ ƀăk sìh, dược sìh tàm càr in. Broă lơh do kờñ wèt tus mpồl cau lơh sơnơm lơh broă tàm ală hìu sơnơm dờng, hìu sơnơm sàh, sơnah ƀòn, hìu sơnơm tàm tiah jơi bơtiàn ờ gal cau, tiah kơh bơnơm, sàh nhàr lơgar, sàh bồt dà lềng mờ ală hìu sơnơm dà lơgar lơh ndai tàm càr dê.

Lài mờ tŭ geh broă dong kờl pa, càr lơh jăt broă rơndăp lơh tơnguh ƀăk sìh tus tàm sàh. Mò Nguyễn Thị Thanh Lịch, Phó Chủ tịch Anih duh broă Làng bol càr Gia Lai pà git: “Càr ai ngui uă ngan broă dong kờl bè hòi jà, mơya geh ờ uă ngan ƀăk sìh tus. Tŭ do, khà hòi jà geh cau lơh broă uă ngan bơh bơl añ dê là 600 tơlăk đong ai dùl nă ƀăk sìh in mờ dong kờl priă ơpah hìu ơm. Bol añ neh lơh broă rơcang lơh nàng ntrờn ƀăk sìh tus tàm sàh”.

Tŭ do gùt càr Gia Lai geh 135 hìu sơnơm sàh, sơnah ƀòn mờ 369 hìu sơnơm tàm ală ƀòn, drơng tàm khà rơlao 26 rơbô 800 nă làng bol tàm dùl hìu sơnơm. Mơya, ƀăk sìh geh tam pà ờ hềt ndrờm bal. Càr gam 76 hìu sơnơm tàm ƀòn ờ hềt geh ƀăk sìh lơh broă. Jăt broă rơcang lơh geh ai, tàm nam do càr Gia Lai pơdar 38 nă ƀăk sìh bơh ală hìu sơnơm dờng, hìu sơnơm sàh, sơnah ƀòn mờ hìu kham kòp dà lơgar lơh nàng tus dong kờl 30 sàh, sơnah ƀòn kờñ geh ƀăk sìh lơh broă in.

Broă rơcang lơh tơnguh ƀăk sìh tus tàm ală sàh, sơnah ƀòn tàm càr Gia Lai geh lơh bơh nam 2026 tus nam 2030. Tơngai tơl nă ƀăk sìh tus lơh broă tàm sàh ờ uă ngan 6 nhai mờ uă ngan 12 nhai, gơtùi lơh jăt uă dơ̆ mơya pal gàr tơl tơngai neh geh ai. Tàm tơngu me cồng nha lơh jăt mờ broă rơwah cau lơh broă gah lơh sơnơm, Sờh Lơh sơnơm càr Gia Lai rơ̆p dan mờ Anih duh broă Làng bol càr Gia Lai nàng ai geh khà ƀăk sìh mờ tiah pơn jăt tai geh dong kờl tàm ală nam pơn jăt tai in.