Bal mờ bơta is rơmis mùl gŏ bơh càr tiah kơh bơnơm geh gal làng bol jơi bơtiàn dồ êt nă cau ơm kis, mờ geh khà cau ùr deh kòn tàm hìu geh khà uă pơndrờm mờ khà kờp bal bơh jơh gùt lơgar dê. Lam lơh Rơndăp broă lơh 8 bè lơh jăt ring bal ùr klau mờ bơsong ală broă jal mhar gơ wèt mờ cau ùr mờ kơnòm dềt, tơngai I bơh nam 2021- 2025, càr Gia Lai là 1 tàm 10 càr geh ai lài lam lơh 4 bơnah priă dong kờl cau ùr jơi bơtiàn dồ êt nă cau deh kòn niam lơngăp lơngai mờ sền gàr pràn kơldang să jan kơnòm dềt in, geh: sền gàr lài mờ tŭ deh; dong kờl sền gàr tàm tŭ deh; dong kờl sền gàr tơnơ̆ tŭ deh; sền gàr pràn kơldang să jan kơnòm dềt.

Tơngai do, ală kâp mpồl neh pơgồp bal mờ gah lơh sơnơm bơyai lơh mờr 100 dơ̆ mblàng yal bơto bơtê yờ tơngguh uă bơta gĭt wă mờ hòi jà cau ùr deh kòn tàm hìu sơnơm, gơhòi gơ jà rlau 7 rbô nă oh mi cau ùr tàm sơnam deh kòn tus bal. Bal mờ hơ̆, neh tă priă dong kờl ai 361 nă cau ùr tàm mpồl in deh kòn tàm hìu sơnơm mờ kờp jơh priă mờ 365 tơlak đong. Bơh ală broă lơh dong kờl do, ờ mìng yờ tơngguh uă bơta gĭt wă, bơta chài sền gàr pràn kơldang să jan ai cau ùr, kơnòm dềt, làng bol jơi bơtiàn dồ êt nă cau mờ gam pơgồp bơnah lơh gơlik geh bơta gơn kơnờm nàng oh mi cau ùr lòt tus hìu sơnơm nàng deh kòn mờ jơh nùs lơh jăt di broă lơh dong kờl khà kờp làng bol. Bi Rơ Châm Alênh, ơm tàm ƀòn Amơng, xã Ia Mơ Nông, kơnhoàl Chư Păh, càr Gia Lai, đơs: Oh geh dong kờl blơi sơpền, blơi mpha blờt ai kòn in. Bơh broă hơ̆ den oh gŏ gơlơh chờ hờp ngan tài bơh geh dờp bơta dong kờl, mơkung geh bơto pơlam sền gàr kòn dồ bă wil tơl. Deh kòn tàm hìu sơnơm xã den kòn he dê geh cĭt vaccine rơcăng lài kòp wil tơl, geh kham kòp ai kòn in.

Bơh broă lam lơh jăt uă broă lơh ală broă dong kờl cau ùr làng bol jơi bơtiàn dồ êt nă cau deh kòn niam lơngăp lơngai mờ sền gàr pràn kơldang să jan kơnòm dềt in neh pơgồp bơnah yờ tơngguh uă bơta gĭt wă bơh oh mi cau ùr dê bè deh kòn niam lơngăp lơngai; bè sền gàr pràn kơldang să jan cau mè, kơnòm dềt in; oh mi cau ùr geh gĭt, ngui drơng broă kham sơm kòp, wă mờ sền gàr kòn dềt dipa. Bi Đinh Ly Ơn ơm tàm ƀòn Hek, xã Chư A Thai, kơnhoàl Phú Thiện, càr Gia Lai, yal: He deh kòn dơ̆ dùl rao, hìng nau kòn dơ̆ 2 tai. Tŭ mờr tus ngai deh añ rơ̆p lòt tus hìu sơnơnơm xã neh niam lơngăp lơngai ai mè mờ kòn in. Añ kung rơ̆p lơh ngan sền gàr nàng kòn in pràn kơldang.

Bơh 03 nam lam lơh Rơndăp broă lơh 8 tàm ù tiah càr Gia Lai dê neh lơh geh ală cồng nha niam ngan tàm broă tơn jơh ală bơta gơ kơryan, tam cah ờ rờm bal ùr klau, lơh jăt geh cồng nha jơnau kờñ ring bal ùr klau mờ tơngguh jơnhoa rài kis phan bơna, nùs nhơm ai cau ùr mờ kơnòm dềt tiah jơi bơtiàn dồ êt nă cau in. Pà gĭt bal bè cồng nha lam lơh Rơndăp broă lơh 8 tàm càr, mò Rơ Châm H’Hồng, Củ tịc Mpồl Tam klăc Cau ùr càr Gia Lai, pà gĭt: Ală broă lơh tơrlòng lài, ală broă lơh tŭ geh lam lơh tus càr, tus tŭ do den geh làng bol mờ cau tàm mpồl cau ùr dờp rò, geh bơta dong kờl, dồ nùs bal bơh kâp ủy, gơnoar ătbồ tàm tiah dê jờng rơ ngan. Tàm tơngai tus, den ală kâp Mpồl cau ùr pơn jăt tai rơcăng lài lơh jăt niam gơnoar broă he dê nàng tă pơgồp jơnau đơs, lam lơh, lơh jăt geh cồng nha 16 broă lơh gơ wèt 4 mpồl tơnggume tờm bơh Rơndăp broă lơh 8 dê, pơnđơl lơh geh mờ sơrlèt broă jàu bơh tơngai I dê sồr. Broă tờm là lam lơh ală broă lơh lơh tam gơl bơta mờng sơning, broă lơh, pơgồp bơnah tơn jơh tĕ ală jơnau tam cah ờ rờm bal ùr klau, bơta mờng tam cah ùr klau tàm hìu bơnhă mờ mpồl bơtiàn; ală bơhiàn mờng kwèng niam chài geh aniai mờ bàr pe ală broă mpồl bơtiàn jal mhar gơ wèt mờ cau ùr mờ kơnòm dềt.

Kung jăt Củ tịc Mpồl Tam klăc Cau ùr càr Gia Lai, Mpồl rơ̆p pơn jăt tai lơh sùm ală broă lơh tơrlòng lài, nàng kờñ lơh tam gơl bơta mờng sơning, broă lơh, yờ tơngguh uă gơnoar broă lơh sa ai cau ùr in, sơlơ tơngguh tai ring bal ùr klau, bơsong ală broă jal mhar gơ wèt mờ cau ùr mờ kơnòm dềt, sền gàr jơnau đơs mờ bơta tus bal ngan ngồn bơh cau ùr mờ kơnòm dềt dê tàm ală broă lơh bơtàu tơngguh lơh sa, mpồl bơtiàn tàm mpồl bơtiàn. Jăt sền mờ đơs wơl, dong kờl yờ tơngguh pràn jak ai cau ùr in tus bal đơng lam tàm ală anih lơh broă cíñ trị. Lam lơh ală broă lơh bơto yal bè bơta gĭt wă ring bal ùr klau, bơta chài lơh jăt pơgồp bal ùr klau ai kwang bàng tàm ală anih lơh broă cíñ trị, ală kra ƀòn, kwang ătbồ ƀòn, cau geh bơngă pin dờn tàm mpồl bơtiàn. Bơh hơ̆ rơ̆p lơh geh bơta tam gơl loh làng tàm tŭ lơh jăt ring bal ùr klau mờ bơsong ală broă jal mhar gơ wèt mờ cau ùr mờ kơnòm dềt, pơgồp bơnah tơngguh uă rài kis phan bơna, nùs nhơm ai cau ùr, kơnòm dềt jơi bơtiàn dồ êt nă cau tàm ù tiah càr Gia Lai dê in.

Mờ uă broă lơh ngan ngồn mờ geh kwơ ngan neh mờ gam geh ală kâp Mpồl Tam klăc cau ùr tàm càr Gia Lai jơh nùs lam lơh jăt, Rơndăp broă lơh 8 geh gơn kơnờm rơ̆p lơh gơlik bơnàng jă bơh sơnrờp ai ală broă lơh, broă lơh tơrlòng lài ndai geh lam lơh dồ bă geh cồng nha mờ kơ̆ kơl jăp tàm tiah làng bol jơi bơtiàn dồ êt nă cau càr Gia Lai.