Chơ Chun là xã tiah nhàr dà lơgar gơtìp uă kal ke bơh kơnhoàl tiah kơh bơnơm Nam Giang, càr Quảng Nam dê. Xã do geh 3 thôn mờ mờr 250 hìu làng bol, mìng là làng bol kòn cau Kơ Tu. Git jơnau yal geh mpồl kwang bàng lơh broă tus bơh Gah lơh sơnơm Ling klàng sền gàr tiah nhàr dà lơgar càr Quảng Nam bơyai tus kham kòp mờ pà sơnơm ờ sa priă tàm xã Chơ Chun in, bơh rìng àng drim, ồng A Viết Mư mờ làng bol kis tàm thôn Blăng, xã Chơ̆ Chun, kơnhoàl Nam Giang neh lòt gan gùng ngài nàng tus tàm anih kham kòp. Ồng A Viết Mư yal: “Bè ờs kờñ kham kòp den pal mù tus tàm ală hìu sơnơm tàm ƀòn dờng Đà Nẵng ha là kơnhoàl Đại Lộc, càr Quảng Nam, mơya bol añ ờ geh priă, ờ geh rơndeh, ờ gơtùi lòt kham tus tàm tiah hơ̆. Ngai do geh oh mi cau ling guh kham làng bol kis tàm tiah kơh bơnơm ñhoa tàm tiah nhàr dà lơgar in, añ kung iang nùs ngan bloh”.

Bơdìh mờ broă kham tơrgùm jơh tàm să jan mờ pà sơnơm ờ sa priă ai làng bol in, ală y, ƀák sĩ lơh broă tàm Gah lơh sơnơm ling klàng Cau ling sền gàr tiah nhàr dà lơgar càr Quảng Nam gam cèng bal ală phan lơh sơnơm pa nàng gơtùi kham mờ gŏ ală bơta kòp mờ làng bol kis tàm tiah kơh bơnơm mờng gơtìp bè tàm tơrdih phan sa, gùng tă nhơm, plai nùs, gùng mhàm, tơngoh, ntìng, kồ ntìng... bơh tŭ hơ̆, bơto pơlam làng bol in bè broă sơm kòp di pal, yal mblàng, bơto sồr làng bol tàm broă gàr kloh niam tiah kis, rơcang sơndră mờ ală bơta kòp gơtờp. Ồng Riah Pêl, Củ tịc UɃÑZ xã Chơ Chun, kơnhoàl Nam Giang pà git, tơngai do làng bol kis tàm xã rơhời neh sơbì ală bơhiàn ờ niam, ờ gam pin dờn tàm cau bơjơu trang sền tai tŭ gơtìp kòp tê jê să, deh dùh... “Broă do ai tơl bơta ƀuơn ngan nàng ală cau kòp tàm gùt xã in. geh ờ uă cau kòp jroă den git bơta kòp tê jê să bơh să tờm mờ tus tàm hìu sơnơm dờng rơlao”.

Pah nam, ală cau lơh sơnơm là cau ling neh tus tàm ală ƀòn ngài, tàm hơ̆ uă ngan là tàm tiah nhàr dà lơgar đah lơgar Việt Nam mờ lơgar Lào nàng bơyai lơh geh uă dơ̆ tus kham, sơm kòp ai làng bol in. Cau lơh sơnơm ờ mìng sơm kòp di tŭ uă cau gơtìp kòp jroă in, mờ gam dong kờl làng bol kis tàm tiah kơh bơnơm ñhoa càr Quảng Nam mờ làng bol kis tàm càr Sê Kong, lơgar Lào in geh tơl bơta niam nàng tìp mờ ală broă lơh drơng ala lơh sơnơm pa. Gha lơh sơnơm Ling klàng gam bơyai lơh yal mblàng, yal jơnau git wă bè broă rơcang sơndră mờ kòp bè kòp sốt rét, kòp jơng tê bơr, kòp sốt xuất huyết... Ală y, ƀák sĩ sùm jơh nùs, làng bol tus den geh sền gàr, kham, sơm kòp, ờ lời làng bol kơ̆p jŏ, nàng làng bol geh lòt lơh broă tai. Thượng tá, Ƀák sĩ Lê Đức Mạnh, Kwang atbồ Gah lơh sơnơm Ling klàng Cau ling sền gàr tiah nhàr dà lơgar càr Quảng Nam pà git, uă cau geh gŏ kòp mờ sơm kòp di tŭ, làng bol rơhời sơbì ală bơhiàn ờ niam: “Bơh ală broă lơh sùm bè do, neh dong kờl mpồl ling sền gàr tiah nhàr dà lơgar càr Quảng Nam bơ̆t bơtàu nùs nhơm tam klăc bal, đềt mềr bal mờ làng bol kis tàm tiah nhàr dà lơgar. Bơh tŭ do, làng bol sơlơ pin dờn Cau ling sền gàr tiah nhàr dà lơgar, pơgồp bal tàm broă sền gàr kơl jăp gơnoar tờm ù tiah nhàr dà lơgar dê”.

Đại tá Hoàng Văn Mẫn, Cíñ ủy Mpồl đơng lam Cau ling sền gàr tiah nhàr dà lơgar càr Quảng Nam pà git, nam lài, di tơnkah 60 nam lơgar Việt Nam mờ lơgar Lào crơng gơs bơta git gơ̆p cri bơyai bal broă lơh bal mờ lơgar ndai mờ 45 nam ngai kĭ Kơrnoăt hơ bal git gơ̆p lơh bơyô mờ lơh broă bal đah lơgar Việt Nam mờ lơgar Lào, Đoàn Ơruh pơnu Hìu sơnơm 199 gơwèt (Ƀộ Kwang àng) pơgồp bal mờ Mpồl lơh sa kă bro mpồl bơtiàn Phúc Vạn Phúc mờ Pôs ling sền gàr mpồng nhàr dà lơgar Nam Giang, càr Quảng Nam neh bơyai lơh broă “Drà tăc phan 0 đong đah lơgar Việt Nam mờ lơgar Lào”, pơgồp bal kham bơta pràn kơl dang să jan, pà sơnơm ờ sa priă ai làng bol lơgar Lào in tềng mpồng nhàr dà lơgar Nam Giang, càr Quảng Nam. Ală y, ƀák sĩ Hìu sơnơm 199, Ƀộ Kwang àng lơh broă tàm ƀòn dờng Đà Nẵng pơgồp bal kham bơta pràn kơl dang să jan, bơto pơlam mờ pà sơnơm ờ sa priă ai jơh ală làng bol tus bal broă lơh do in. Đại tá Hoàng Văn Mẫn, Cíñ ủy Mpồl đơng lam Cau ling sền gàr tiah nhàr dà lơgar càr Quảng Nam đơs tờm: “Tàm bơta git gơ̆p lơh bơyô bal đah lơgar Việt Nam mờ lơgar Lào đơs bal mờ càr Quảng Nam mờ càr Sê Kong đơs is gơtùi đơs là geh lam lài niam ngan. Bol añ sùm tơnguh geh bơhiàn do nàng bơ̆t bơtàu bal bơta git gơ̆p tam klăc bal 2 gah nhàr dà lơgar ngai sơlơ git gơ̆p, lơh bơyô bal mờ lam lài kwơ màng ngan”.

Tàm “Drà 0 đong đah lơgar Việt Nam mờ lơgar Lào”, ală mpồl lơh sa kă bro ring bal, Cau ling sền gàr tiah nhàr dà lơgar càr Quảng Nam, Pôs ling sền gàr mpồng nhàr dà lơgar Nam Giang jào pà 700 pò phan. Tơl pò phan geh 300 rơbô đong, tàm hơ̆ geh phan sa, phan ngui, ào mpha... pà làng bol ală kòn cau lơgar Lào kis tàm kơnhoàl Đăk Chưng, càr Sê Kong, lơgar Lào kis rềp mờ tiah nhàr dà lơgar đah lơgar Việt Nam mờ lơgar Lào geh rài kis gơtìp kal ke in.