Gah sơm kòp jal mhar sơndră mờ khih tàm Hìu sơnơm dờng ƀòn dờng Buôn Ma Thuột neh rơcang 6 jơnờng piam kòp tàm dơlam mờ 5 jơnờng sơm sơm mhar neh rơcang nàng dờp cau kòp di tàm Satềp. Ƀák sĩ Trần Thanh Quý, Phó lam bồ gah sơm mhar tơn pràn să sơndră mờ khih, pà git: “Gah sơm har neh geh broă rơcang lài tơl mpồl sền gàr geh 1 nă ƀák sĩ mờ 2 nă điều dưỡng drơng ngai kung bè mang tŭ lơi kung rơcang mờ ală bơta gơlik geh, tàm hơ̆ uă ngan là ală dơ̆ gơtìp khih phan sa kung bè rềs àr tàm gùng lòt bè ờs mờng gơtìp ngan di tàm satềp”.

Hìu sơnơm dờng tiah Tây Nguyên, mờ gơnoar broă là hìu sơnơm dŭt ndơl bơh tiah Tây Nguyên dê, sùm geh tàm bơta tŭ lơi kung rơcang lài mờ ală dơ̆ sơm mhar cau gơtìp jroă mờ ală bơta gơtìp jal mhar. Ƀák sĩ Nguyễn Doãn Sơn, Phó lam bồ Gah sơm jal mhar pà git, di tàm Satềp, khà cau mŭt sơm mhar di gơlan gơguh rơlao 50% pơn drờm mờ ngai bè ờs, tàm hơ̆ uă ngan là ală dơ̆ gơtìp rềs àr tàm gùng lòt, kòp bè plai nùs mờ gơpừ ni sơna. “Bol añ rơ̆p tơnguh tai tàm broă sồr lơh, tơnguh tai 1 mpồl sền gàr sơm mhar bơdìh, 1 mpồl sền gàr bơtơl mờ 1 mpồl rơcang lài nàng tŭ geh ală bơta gơtìp gal cau mŭt piam uă ha là ală rềs àr lơh sồt să uă cau den rơ̆p hòi jà mơ. Bơdìh hơ̆ tai, rơ̆p ai 1 mpồl gàr sùm tàm gah sơm mhar do, di lah geh broă hòi jà, bol añ rơ̆p ai 1 nă ƀák sĩ, 2 nă điều dưỡng lòt sơm jal mhar hờ bơdìh mơ”.

Bal mờ broă rơcang lài cau lơh broă, phan lơh broă bal mờ khà sơnơm geh, Hìu sơnơm dờng Tiah Tây Nguyên kung sền gròi ngan tus mờ broă drơng bè phan bơna mờ nùs nhơm gơwèt mờ ală cau piam tàm hìu sơnơm di satềp. Ƀák sĩ Nguyễn Ngọc Thịnh, Phó lam bồ Hìu sơnơm dờng tiah Tây Nguyên pà git: “Jơh ală gah, cơl dŭ lơh broă bal mờ anih rơcang lài bol añ ndrờm sồr là tơrmù broă dan ơm nàng tơrgùm tàm broă drơng gàr cau kòp in niam ngan, mìng is gơwèt mờ gah sơm jal mhar mờ tơnpràn să pal geh gàr sùm ngai kung bè mang. Tàm Satềp do den bol añ bơyai lơh drà satềp ai cau kòp gơtìp kal ke in, bè dong kờl phe, dà tơngi, dà toh nàng cau kòp geh dùl satềp hờm ram”.

Ờ mìng ală hìu sơnơm tàm càr, ală hìu sơnơm tàm kơnhoàl kung neh rơcang lài nền nòn ngan di Satềp nam pa. Ƀák sĩ Lê Thị Thủy, Lam bồ hìu sơnơm kơnhoàl Mdrăk pà git: “Mpồl lam bồ hìu sơnơm sồr jơh ală gah sơm kòp, hìu sơnơm tàm ală sàh tàm broă rơcang ală tơngu me gàr niam ngan ai broă sền gàr cau kòp tàm jơh bàr gah, gơwèt mờ Hìu sơnơm kơnhoàl den rơcang lơh jăt ndrờm bal ală tơngu me gơrềng tus sơnơm, phan lơh broă hơ̆ sồng tam pà cau lơh broă gàr sùm nàng ală broă lơh tàm broă sơm kòp jal mhar cau kòp in lài mờ satềp, tàm satềp mờ tơnơ̆ mờ satềp in”.

Kung ndrờm bè hơ̆ sơl, tàm Hìu sơnơm kơnhoàl tiah nhàr lơgar Ea Súp, ƀák sĩ Nguyễn Viết Hữu, Kwang lam bồ Hìu sơnơm kung đơs sơl: “Bol añ ờ ai cau lơh broă ơm rơlô lồi nam mờ satềp, gàr tơl cau lơh broă nàng tam pà bal lơh broă geh sùm, lơh jăt broă kham sơm kòp drơng làng bol in di tàm satềp”.

Gah lơh sơnơm càr Dăk Lăk neh tơlik broă rơndăp lơh nàng rơcang bơh ală tiah tus mờ càr hơ̆ sồng tus ală hìu sơnơm kơnhoàl, gàr niam tàm broă kham sơm kòp mờ sơm kòp jal mhar. Ƀák sĩ Nguyễn Hữu Vũ Quang, PHó kwang lam bồ Sở lơh sơnơm càr Dăk Lăk pà git: “Sở lơh sơnơm càr neh geh sră nggal pơyoa tus jơh ală mpồl lơh broă nàng rơcang cau lơh broă, phan lơh broă, rơcang tơl sơnơm bơh hìu sơnơm kơnhoàl tus càr. Gah lơh sơnơm neh rơcang lài nàng dờp mờ sền git lơh ală cau kòp kờñ tus mờ ală hìu sơnơm nàng sơm kòp di tàm satềp. Lơh broă tàm ngai satềp kung ndrờm bè lơh broă sùm tàm tiah nhàr lơgar sơl”.

Mờ broă rơcang lài nền nòn bal mờ nùs nhơm geh kơnòl uă bơh mpồl cau ƀák sĩ dê, gah lơh sơnơm càr Dăk Lăk neh rơcang lài tơl mờ ală bơta gơlik geh tàm ală ngai satềp. Bŭ lah sơm mhar ha là sền gàr cau kòp, ală y, ƀák sĩ kung gam sùm lơh jăt nền nòn, cèng geh dùl satềp lơngăp lơngai mờ hờm ram ai làng bol in.