Ƀák sìh mò Nguyễn Thị Mới, Lam bồ Gah Hìu sơnơm nhiệt đới, Hìu sơnơm kơnòm dềt càr Gia Lai pà gĭt, Gah do geh 40 nơm jơnờng kòp mơya ală ngai do ală cau bơtờp kòp rang gơguh mhar, uă ngan geh ngai geh rlau 100 nă kơnòm dềt kòp rang sơm kòp bal gơlam tus bơta gal ir cau. Khà kơnòm dềt bơtờp kòp rang gơguh mhar dùl bơnah tài bơh mŭt tàm kàl uă ngan bơh kòp dê, bơdìh hơ̆, uă kơnòm dềt ờ hềt cĭt vaccine rcang lài kơryan kòp rang halà cĭt ờ hềt tơl ding lơh tơnguh bơta pơhìn bơtờp kòp mờ bơta gơlik geh bơh kòp dê rơ̆p sơlơ kơn jơ̆ pơndrờm mờ ală kơnòm dềt ndai. Mò Nguyễn Thị Mới, đơs:“Bơta kòp rang pơgăp 3 nhai do geh tềl tơngŏ gơguh, kờp bal dồ ngai tàm gah do geh pơgăp 100 nă cau kòp, geh ală tŭ pal piam bal, ai tai jơnờng, ƀák sìh pal tơnguh dơ̆ lơh broă gơ lơh bè rlau 2 dơ̆, is ồn tàm dơ̆ Sa tềp kal ke ngan”.

Sền gàr kòn 14 nhai sơm kòp tàm Gah Hìu sơnơm nhiệt đới, bi Rơ Lan Tuyết, ơm tàm ƀòn T’nung, sàh H’bông, kơnhoàl Chư Sê pà gĭt, kòn ờ hềt cĭt vaccine rcang lài kơryan kòp rang den tŭ bơtờp kòp den gơtìp kơn jơ̆ rlau mờ kơnòm dềt ndai. Tus tŭ do, sau neh sơm geh 3 ngai, tŭ do să jan neh pràn rlau. Bi Rơ Lan Tuyết, đơs:“Kòn oh dê kòp 7 ngai tàm hìu ờ gơmù kòp den jun tus hìu sơnơm kơnhoàl, jun tàm hơ̆ 7 ngai den jun tus hìu sơnơm kơnòm dềt nàng jat sền. Tŭ do sau neh sa, neh pô toh, tă nhơm nggờc rlau, bơsiă den kung gam sơl, jê ndul den ờ gam tai”.

Pal kơlôi rcang ngòt là bơta kơnòm dềt gơtìp tàm bơtờp kòp tai tàm ală hìu sơnơm. Bi Yao, ơm tàm sơnah ƀòn 8, ƀòn drà dềt Đăk Đoa, kơnhoàl Đăk Đoa geh kòn 5 nhai gơtìp aniai kòp as sồt klờm soh kơn jơ̆ yal wơl:“Sau ơm tàm do bơh ngai 2 Sa tềp, lài hơ̆ den kòn gơtìp kòp as sồt klờm soh geh mut tàm hìu sơnơm tàm kơnhoàl Đăk Đoa sơm kòp 1 poh. Tài bơh tàm kơnhoàl geh oh dềt gơtìp kòp rang tŭ mut tàm cơldŭ piam bal sơm kòp den kòn añ gơtìp bơtờp kòp tơn”.

Bơh bồ nam tus tŭ do, Hìu sơnơm Kơnòm dềt càr Gia Lai dờp sơm kòp mờr 500 nă kơnòm dềt mut piam tàm hìu sơnơm tài bơh gơtìp kòp rang, gơguh gơ lơh bè uă ngan khà cau pơndrờm dùl tŭ bal mờ nam 2024. Ƀák sìh Từ Mai Linh, Phó Kwang lam bồ Hìu sơnơm pà gĭt, bơh jơnau tơngkah lài bơh Ƀộ Y tế dê, Hìu sơnơm neh rcang lài bè mpồl cau, phan bơna măi mok, sơnơm tơm ba, ală cơldŭ ai ơm is tàm ală gah, cơldŭ nàng sền gĭt kòp rang mờ sơm kòp niam ngan rlau jơh. Ƀák sìh Từ Mai Linh, đơs:“Hìu sơnơm kung neh ai, rơndăp tăp sèng wơl ală hìu sơnơm nhiệt đới krơi is, geh bĭc cơldŭ is nàng gàr niam pleh bơta tàm bơtờp kòp. Sơlơ tơnguh tai mpồl cau, rcang phan bơna măi mok tă nhơm, Cpap nàng sơm kòp ai cau kòp in niam ngan rlau jơh. Tŭ gŏ kơnòm dềt geh tềl tơngŏ bơh kòp duh să, bơsiă, gơ hòr dà muh, gơlik toh geh gơrềng tus kòp rang den hìu bơnhă pal tus ală hìu sơnơm nàng geh kham kòp, bơto pơlam, sơm kòp dồ bă di pal, broă cĭt vaccine rcang lài kơryan kòp kung kwơ màng ngan mờ kơnòm sơnđờm cĭt bơh 9 nhai, cĭt di mờ tơl jat jơnau sồr bơh Ƀộ Lơh sơnơm dê”.