Tàm dơ̆ tìp măt, lŏ Nông Thị Diện (35 sơnam) mờ bi Lý Văn Quyết (40 sơnam), kung ndrờm là kòn cau Nùng, kis tàm sàh Dliê Ya, càr Dăk Lăk, chờ hờp bal mờ kòn ùr rơlao 5 nhai pràn kơl dang. Lŏ Diện yal, bao bơh nam 2017, bŭ lah bơta pràn kơl dang să jan bè ờs, tàm uă nam tơn bàr nă ùr bơklao kung gam kơ̆p gơn sùm kờñ geh kòn.

Tơnơ̆ mờ uă nam lòt tus tàm ală ƀòn dờng dờng nàng sơm kòp ờ geh kòn ndrờm ờ geh cồng nha, nhai 10 nam 2022, git cau yal broă lơh IVF geh lơh tàm Buôn Ma Thuột, bàr nă ùr bơklao lŏ pơn jăt tai tus nàng kơ̆p gơn geh bơta bơtoah. Dùl nam tơnơ̆ mờ hơ̆, kòn ùr hàng niam mờ să ñjơ̆ rơlao 3 kĭ neh deh. Lŏ Diện chờ hờp đơs: “Bàr nă ùr bơklao añ kờñ lơh tàm do nàng ờ pal lòt tus tàm Sài Gòn ờ hoan roh priă. Nhai 10 nam 2022 tus nhai 5 nam 2024 den lơh ală sră nggal nàng rơwah phôi; hơ̆ sồng tus nhai 2 nam 2025 den deh kòn ùr. Kòn añ pràn, să jan bè ờs. Broă rơndăp lơh bơh bàr nă ùr bơklao añ dê là rơ̆p deh tai dùl nă kòn tơnơ̆ mờ tŭ kòn lài neh tờm 2 sơnam. Phôi bơh bàr nă ùr bơklao dê kung gam geh prăp tàm do den tàng lơh nàng geh kòn dơ̆ 2 rơ̆p geh tus tàm do nàng lơh tai”.

Kung ndrờm mờ hơ̆ sơl, ùr bơklao bi Trần Duy Từ mờ lŏ Võ Thị Mỹ Duyên, kis tàm sơnah ƀòn Buôn Ma Thuột bao bơh nam 2011 mơya rơlao 10 nam kung gam ờ geh kòn mờ pal lòt sơm gùt tiah. Nhai 3 nam 2022, bơh jơnau yal bơh dùl nă cau bơyô lơh broă tàm gah lơh sơnơm, ùr bơklao bi neh jòi tus broă lơh IVF tàm Buôn Ma Thuột mờ geh cồng nha tơn bơh dơ̆ sơnrờp: “Tơngai sơnrờp ƀák sìh đơs là tăp lơh geh phôi, gơs hơ̆ sồng tơngai tơnơ̆ ƀák sìh bơkiar phôi mờ tàm dơ̆ sơnrờp añ neh geh kòn tơn. Tài bơtoah, tŭ ơn phôi kòn den bè ờs ngan tŭ añ kung gam lòt lơh broă bè ờs, deh kòn pràn kơl dang, ñhăt ñhar, să jan dờng pràn niam”.

Broă lơh deh kòn tàm ding (IVF) geh lơh tàm lơgar Việt Nam bơh mờr 20 nam lài, neh dong kờl git nđờ jơ̆t rơbô nă ùr bơklao ờ geh kòn lơh jăt jơnau kờñ lơh gơs mè gơs bèp. Ƀák sìh Hồ Mạnh Tường, Kwang Gơnoar cih Mpồl phan dơlam deh dùh mờ Ờ geh kòn ƀòn dờng Hồ Chí Minh đơs, do là dùl broă lơh kwơ màng bơh gah lơh sơnơm dê tàm gah dong kờl deh kòn tàm lơgar Việt Nam. Tàm Tây Nguyên, broă lơh do neh tus kham ai mờr 21 rơbô nă ùr bơklao, lơh jăt broă geh bun mờ gùng ding ai 1 rơbô 128 nă cau mờ cèng geh bơta chờ lơh mè bèp ai rơlao 500 nă ùr bơklao in. Bơta chài rơwah phôi ờ mìng tơnguh uă cồng nha geh kòn mờ gam dong kờl sơrbì ală gen ờ pràn, gen kòp.

Ƀák sìh Hồ Mạnh Tường pà git: “Tàm tiah Tây Nguyên, geh ală gen kòp krơi is ngan mờ khà geh uă rơlao pơn drờm mờ uă tiah ndai tàm gùt lơgar. Di lah pơn jăt tai lời deh kòn geh is, ală gen kòp do rơ̆p lơh gơtờp tus mờ uă rơnàng, geh mờ lơh gơtờp tàm mpồl bơtiàn. Mờ gùng dà broă lơh IVF, gơtùi xét nghiệm mờ sền nàng git gen kòp tơn bơh tàm ding, bơh tŭ hơ̆ prăp wơl gen niam, sơrbì rơhời ală gen ờ niam. Do là dùl broă lơh geh kwơ, pơgồp bal tàm broă tơnguh uă bơta pràn khà kờp làng bol tàm tơnơ̆ do”.

Bơh broă lơh IVF tàm Tây Nguyên, uă ùr bơklao ờ geh kòn ờ gam pal glar bòl tàm broă jòi kòn tàm ală ƀòn dờng dờng tai. Broă lơh sa, priă geh bơh làng bol kis tàm  Tây Nguyên ngai sơlơ gơguh uă, kung lơh gơmù di mơ bơta kơlôi rơcang bè priă tă, mờ ngai sơlơ geh tai uă ùr bơklao ờ geh kòn geh tus mờ jơnau kơ̆p kờñ lơh mè bèp kơnờm bơh bơta chài gơguh jăk do.