Tus kham tàm Anih tờm lơh sơnơm Phú Hoà, lŏ Lê Thị Bích Loan, tàm thôn Phú Thạnh, sàh Phú Hoà 2, càr Dăk Lăk cih măt tàm măi lơh is, gam sơnđan là Kiosk lơh sơnơm ngăc ngar, geh ơn tềng tiah dờp rò cau tus. Mìng kờñ ai màh QR tàm pang sră kham sơm kòp ờ sa priă ha là sră căn cước công dân tàm phan kŭp rùp, măi sền is jơnau tơngit să tờm, dong kờl lŏ tơrmù broă yal să jan mờ ai sră pơn jăt tai tàm măi do tơn. Lŏ Loan sền gŏ, broă lơh tàm măi ƀuơn ngan, bơh cau kơnòm tus mờ cau dờng sơnam kung gơtùi lơh sơl: “Añ gŏ măi do ƀuơn ngui ngan ai cau kòp in, jơnau tơngit loh làng. Să tờm añ gam kơnòm, mơya ală mlŏ, ală wa dờng sơnam kung git lơh sơl. Geh măi do den he ai sồ pơn jăt tai mhar rơlao, ờ pal kơ̆p jŏ, roh tơngai ha là cau tus lài kham tơnơ̆, cau tơnơ̆ kham lài”.

Măi cih măt kham is drơng lơh broă geh ai ngui tàm Anih tờm Lơh sơnơm Phú Hoà bơh nhai 9 nam do, pah tŭ cih măt mìng roh ờ tus 1 phút. Phan do dong kờl tơrmù khà cau lơh broă pal geh lơh sùm tàm tiah dờp rò, ai cau lơh broă lơh ală kơnòl broă ndai in.

Bác sĩ Lương Văn Phước, Kwang Lam bồ Anih tờm Lơh sơnơm Phú Hoà pà git, cồng nha là loh làng ngan tŭ bơh lồi nhai 7 tus tŭ do, anih do lơh jăt broă kham pràn kơl dang să jan gùt làng bol, mờ rơlao 3 rơbô 500 dơ̆ cau neh geh kham. “Bơh tŭ ơh broă mờ măi do den broă atbồ cau lơh broă geh niam rơlao, lài do den pal ai uă cau, tŭ do mìng kờñ bơh 1 tus 2 nă là gơs broă lơh do. Geh tơl bơta nàng he ai tai ờ uă kwang bàng dong kờl ai gah lơh broă ndai in, tàm hơ uă ngan là tiah kham pràn kơl dang să jan gùt làng bol gam dơ̆ lĕ bal lơh. Mìng kờñ rò dờp tàm do cau gơtùi tus tơn tàm tiah kham, lời sơrbì tơngai kŭp rùp măi mok tàm ală gah lơh broă ndai”.

Broă ai is sền jơnau tơngit cau kòp tàm broă dờp rò dong kờl Anih tờm Lơh sơnơm Phú Hoà tơrmù broă cih jơnau tơngit mờ ai wơl cau lơh broă. Do kung là jơnau kờñ mùl màl tàm broă tam gơl sồ tàm ƀòn lơgar dê: măi mok lơh broă gơdờp, ƀuơn ngui, tềm pềr tơngai ai làng bol mờ kwang bàng lơh broă in.

Mò Huỳnh Thị Sơn, Bí thư Đảng ủy sàh Phú Hoà 1, càr Dăk Lăk pà git, bal mờ bơta pràn kes priă dê, tơngai do sàh neh dờp geh uă broă dong kờl bơh gùt mpồl bơtiàn tă bal. Măi cih măt kham tàm Anih tờm Lơh sơnơm Phú Hoà geh Agribank tàm Phú Yên dong kờl là dùl tàm ală khà hơ̆. “Tàm tơngai pa do, sàh Phú Hoà 1 dờp geh uă broă lơh broă bal, tam pà bal, dong kờl bal bơh ală công ty, ală mpồl lơh sa kă bro tàm sàh, tàm hơ̆ uă ngan là broă tam gơl sồ. Do kung là broă dong kờl geh kwơ, pơgồp bal tàm broă lơh geh tai bơta pràn ai sàh Phú Hoà 1 in tàm broă tam gơl sồ tàm jơh ală gah broă”.

Jăt Sờh Lơh sơnơm càr Dăk Lăk yal, tam gơl sồ gam geh lơh bơh sră cau kòp, sră nggal pràn kơl dang să jan điện tử tus tơm priă ờ ngui priă ngan mờ ală bơta kwơ drơng tàm broă kham sơm kòp. Tơngai bơh nam 2026 tus 2030, càr Dăk Lăk neh ring bal ală gùng dà broă lơh ai mờr 484 tơmàn đong ai 7 rơndăp broă lơh sơnơm sồ in. Bal mờ priă bơcri bơh Dà lơgar, càr kung pơlam hòi jà gùt mpồl bơtiàn tă priă nàng bơtơl, tơnguh uă bơta niam broă lơh drơng ala tàm ală gah broă di pal.

Tơnơ̆ tơmŭt bal, càr Dăk Lăk geh 36 hìu kham sơm kòp geh jơnờng piam kòp gơwèt bal, geh 14 hìu sơnơm mờ 22 Anih Lơh sơnơm. Kiosk lơh sơnơm ngăc ngar tŭ do neh geh lơh tàm 15 hìu sơnơm. Tàm hơ̆, Anih priă jền Agribank tàm Phú Yên dong kờl blơi phan lơh broă tàm Anih tờm Lơh sơnơm Phú Hoà mờ Anih tờm Lơh sơnơm Sơn Hoà. Ồng Phan Thông Thái, Kwang Lam bồ Anih priă jền Agribank tàm Phú Yên pà git, mpồl lơh broă gam geh broă rơndăp lơh dong kờl ală phan lơh broă nàng drơng tàm gah broă lơh sơnơm mờ bơsong sră nggal tàm ală sàh, sơnah ƀòn tàm do in. “Bol añ gam geh broă lơh pơn jăt tai dong kờl Kiosk lơh sơnơm ngăc ngar mờ ală Kiosk ai ală gơnoar atbồ sàh, sơnah ƀòn in tai, dong kờl ală phan lơh broă mùl màl nàng lơh bè lơi dong kờl làng bol geh dờp ală bơta kwơ bơh broă tam gơl sồ”.

Bơta pràn gùt mpồl bơtiàn tă bal ờ gơtùi ala broă bơcri priă bơh Dà lơgar dê, mơya gơtùi bơtơl tàm ală jơnau kờñ mùl màl tàm ală sàh, sơnah ƀòn. Mờ ală phan lơh broă bal mờ bơta pràn gơdờp bal mờ jơnau kờñ ngui tàm mùl màl ală sàh, sơnah ƀòn dê, cồng nha tam gơl sồ gơtùi gŏ mơ tơn bơh ală tam gơl mùl màl. Bè tàm ờ uă hìu sơnơm tàm càr Dăk Lăk, cồng nha ai tơngŏ bơh broă phan lơh broă geh ai ngui neh dong kờl làng bol tơrmù broă lơh mờ tơngai ơm kơ̆p.