Tàm tŭ trồ tơngai duh bơh trồ prang dê, gah reh, lơh ờ jê tŭ reh, sền gàr bơta pràn kơl dang deh dùh mờ cau ùr bun – Hìu sơnơm kơnhoàl Kon Rẫy kung geh tai bơta glar bòl mờ kal ke. Ndrờm bal mờ bơta glar bòl bơh cau kòp, ƀák sĩ đa khoa Y Hồng Nga rơlĕ tus còp să tơl nă cau. Lŏ pà git, nàng kham di kòp, sơm kòp mhar bời, bal mờ broă lơh sơnơm, kwơ màng sơl là pal dờp geh nùs nhơm pin dờn bơh cau kòp dê tai. Ƀák sĩ Y Hồng Nga pà git: “Añ là dùl nă ƀák sĩ, añ là kòn cau Sơdàng den tàng wă ngan ală cau kòp tus kham, sơm kòp tàm do ndrờm glar bòl, mơya añ sùm lơh ngan ai tơl bơta niam nàng kham, sơm kòp niam ngan ai cau kòp in là cau kòn cau. Là dùl nă ƀák sĩ añ ai broă lơh lài ngan là pal lơh gơs kơnòl mờ gơnoar atbồ jào, gơwèt mờ cau kòp añ sùm jơh nùs đềt mềr, lơh ngan sơm kòp niam ngan ală cau kòp in”.

Kis tàm hìu nhă geh bèp mờ kòn cau Sơdàng, mè là cau Yoan, ƀák sĩ Y Hồng Nga tam pà bal ngan nùs nhơm mờ ală cau kòp là kòn cau. Nàng dong kờl cau kòp tàm tơngai sơm kòp, mờ gơnoar broă là Ƀí thư Ci đoàn Hìu sơnơm kơnhoàl Kon Rẫy dê, Y Hồng Nga neh la ală đoàn viên ơruh pơnu tàm hìu sơnơm, hơ̆ sồng hòi jà bơh uă mpồl lơh broă nàng bơyai lơh geh hìu trŭ phan sa nùs nhơm dong kờl, ào mpha kloh ờ sa priă… dong kờl cau kòp in. Bơdìh hơ̆ tai, ală dơ̆ tơnkah bè Ngai crơng gơs Đoàn ơruh pơnu Kộng sản Hồ Chí Minh ngai 26 nhai 3, Ngai tơnklàs đah jum dà lơgar ngai 30 nhai 4, Ngai Cau ling sồt să, cau ling chơ̆t màng ngai 27 nhai 7…, Ci đoàn ndrờm bơyai lơh ală broă lơh ưn ngài, tam pà bal bơta kal ke mờ làng bol kis tàm kơnhoàl do. Điều dưỡng Nguyễn Trần Mỹ Hạnh pà git, tàm ală broă lơh bơh ơruh pơnu Hìu sơnơm kơnhoàl Kon Rẫy dê, sùm geh tơngŏ broă lơh bơh Ƀí thư Ci đoàn dê. Lŏ Nguyễn Trần Mỹ Hạnh pà git: “Bi Nga là dùl nă cau geh nùs nhơm niam, geh kơnòl mờ broă lơh bal mờ cau kòp. Bơdìh mờ broă sơm kòp, lŏ Nga sùm bơsram bal broă mờng chài, geh sùm ală bơta pa. Bi Nga sùm jơh nùs tus bal ală broă lơh bơh Đoàn lam lơh. Bi Nga là dùl nă cau lam lài nàng ală oh mi tàm Ci đoàn Hìu sơnơm in đòm jăt bal”.

Jăt ƀák sĩ Nguyễn Luện, Phó Kwang atbồ drơng broă lơh Hìu sơnơm kơnhoàl Kon Rẫy pà git, tài gam ờ tơl tus 15 nă ƀák sĩ lơh broă den tàng ală dơ̆ drơng sền gàr broă sơm kòp tàm hìu sơnơm sùm gơtìp glar bòl mờ kal ke. Ƀák sĩ drơng broă mờ sơm ală kòp bè dơlam, bơdìh, deh kòn, kòn se, sơm lài ngan mờ pal lam sồr bơh ngài gơwèt mờ ală cau geh cèng tus sơm bơh tàm ală hìu sơnơm xã. Bŭ lah bè hơ̆, ƀák sĩ Y Hồng Nga ờ mìng lơh gơs jăk chài kơnòl broă geh jào, mờ sùm lam lài tàm ală broă lơh bơh hìu sơnơm dê. Ƀák sĩ Nguyễn Luân pà git: “Ƀák sĩ Y Hồng Nga sùm sền gròi tus mờ broă sền gàr bơta pràn kơl dang să jan, kham sơm kòp cau kòp in, pơlam cau kòp in bè broă sền gàr is bơta pràn kơl dang să jan tàm tơngai gam ơm piam kòp tàm hìu sơnơm mờ tơnơ̆ mờ tŭ neh rê. Bè broă lơh bal den ƀák sĩ Y Hồng Nga là dùl nă Ƀí thư Ci đoàn hìu sơnơm dê, là cau ñhăp ñhar ngan tàm ală broă lơh, tàm hơ̆ uă ngan là tàm broă ai mhàm dong kờl is, broă kham, sơm kòp nùs nhơm dong kờl ai làng bol in”.

Ƀák sĩ Y Hồng Nga neh ai tơngŏ bơta ngăc ngar, jăk chài tàm broă sơm kòp mờ dờp geh uă nùs nhơm kờñ gơboh bơh cau kòp bal mờ cau lơh broă bal tàm Hìu sơnơm kơnhoàl Kon Rẫy, càr Kon Tum dê. Lŏ kơ̆p kờñ geh lòt bơsram cuyên khoa I tàm gah đơng deh nàng tơnguh uă bơta ngăc ngar tàm broă sơm kòp, drơng cau kòp tàm Hìu sơnơm kơnhoàl Kon Rẫy in niam rơlao.