Tàm uă ƀòn, ƀuơn ngan gŏ ală phan ngui nàng đơ dà bè rơsô, sơƀàk, kong rơndeh ờ ngui tai… gơtìp lời hờ bơdìh tơnơ̆ mờ ală dơ̆ mìu bồ kàl. Do là tiah niam nàng sơmăc deh tăp – do là phan tờm lơh gơtờp kòp mprơm gơlik mhàm. Jăt jơnau dờp, bŭ lah ờ hềt mŭt tàm kàl uă bơh kòp dê, mơya khà cau gơtìp kòp bơh ală bơta kòp gơtờp neh sơn đờm geh tơngŏ gơguh di mơ pơn drờm mờ ală nhai bồ nam. Tàm hơ̆ uă ngan là tàm ală tiah hìu ơm ơpah, tiah ƀòn gal cau, bơta di gơlan lơh gơtờp kòp ngai sơlơ uă di lah ờ geh sền gròi niam, pơs wàs kloh niam tiah kis. Kờp bơh bồ nam 2026 tus tŭ do, phan sền gròi kờp gơtờp bơh Ƀộ Lơh sơnơm neh dờp geh mờr 32 rơbô nă cau gơtìp kòp mprơm gơlik mhàm, tàm hơ̆ uă geh 4 nă cau neh gơtìp chơ̆t.

Tŭ tam jào kàl bè tŭ do mờng ƀuơn ngan gơtìp ờ sền gròi, tài kòp gơtờp ờ hềt gơtìp pràn. Mơya, do là tơngai tờm niam ngan nàng rơcang kơrian. Di lah ờ sền gròi, kòp gơtờp di gơlan lơh gơtờp mhar tŭ mŭt tàm kàl gơtờp uă kòp tàm kàl rơlô bơkang tàm ală nhai tus. Ƀák sìh Đặng Hồng Hường, Phó Kwang Lam bồ Anih tờm Lơh sơnơm kơnhoàl ù tiah Văn Yên, càr Lào Cai pà git: “Bol añ dan mờ Đảng ủy, gơnoar atbồ tàm do sồr ală cơl dŭ lơh broă, gah lơh broă tờm atbồ, sền gròi, jăt sền sùm kòp gơtờp tàm mpồl bơtiàn nàng gŏ gờñ ală tiah gơtìp kòp mờ kơrian kòp gơtờp di tŭ. Lơh niam broă mblàng yal tus mờ làng bol, mpồl kwang bàng đơng lam nàng tơnguh uă jơnau git wă mờ tus bal tàm broă rơcang kơrian kòp gơtờp”.

Bơdìh mờ kòp mprơm gơlik mhàm, dùl bơta kòp gơtờp ndai kung gơguh sơl tàm kàl rơlô bơkang do, tàm hơ̆ uă ngan là kơnòm dềt, là kòp jơng tê bơr. Jăt Ƀộ Lơh sơnơm yal, bơh bồ nam 2026 tus tŭ do, gùt lơgar neh dờp geh di pơgăp 26 rơbô nă cau gơtìp mờ 8 nă cau neh gơtìp chơ̆t tài kòp jơng tê bơr. Mìng is nhai 3 nam 2026, khà cau gơtìp bè ờs jăt poh gơguh pơn drờm mờ nhai lài. Kòp jơng tê bơr gơtờp bơh gùng tơrdih phan sa, ƀuơn gơtờp tàm ală hìu kơnòm dềt ơm bal, hìu bơsram mầm non di lah ờ sền gròi niam broă pơs wàs kloh niam. Bơta pal kơlôi rơcang ngan là kòp jơng tê bơr di gơlan gơtìp mhar, lơh gơbàn jroă di lah ờ gŏ gờñ. Mơya, uă cau mè bèp kung gam ờ sền gròi, mờ git đal mờ ală bơta kòp tềng bơdìh să bè ờs. Tiến sìh, ƀák sìh Nguyễn Văn Lâm, Kwang Lam bồ Anih tờm Kòp ñiệt đới, Hìu sơnơm Kơnòm dềt Dà lơgar pà git: “Broă gơtờp bơh kòp jơng tê bơr là bơh gùng tơrdih phan sa mờ dà gơpar tơn bơh cau kòp ha là dà diao geh virus mờ rơ̆p lơh gơtờp bơh cau do tus cau ndai. Mờ kòp jơng tê bơr ờ hềt geh Vaccine sơm kòp den tàng broă rơcang pleh mờ kwơ màng ngan. Geh bal ală kòp jơng tê bơr neh gơtìp den kung di gơlan gơtìp tai tài kòp gơtờp bơh kòp jơng tê bơr ờ di là jơh kòp gơtờp kơl jăp”.

Bơdìh mờ broă rơcang bơh làng bol, gah lơh sơnơm kung gam lơh uă gùng dà broă lơh nàng sền gròi kòp gơtờp tơn bơh gờñ. Bơh broă jăt sền kòp, bơsong tiah gơtìp ờ uă, tus mờ broă tơnguh jơnau yal tơngit rơcang kơrian kòp tàm mpồl bơtiàn. Mơya, jăt ală cau jăk đơs, cồng nha bơh broă rơcang kơrian kòp gơtờp gơrềng uă ngan tàm jơnau git wă bơh tơl nă làng bol dê.

Kòp gơtờp tàm kàl rơlô bơkang gơtìp ni sơna, mờ mờng ờ gŏ loh làng broă gơguh bơh ală bơta tờm ờ uă ngan tàm rài kis pah ngai dê. Den tàng, sền gròi kòp gơtờp ờ mìng là broă lơh mhar tŭ geh kòp gơtờp, mờ pal geh bơh bơh broă rơcang lài gờñ bơh tàm tŭ do dê. Phó Pơgru dờng– Tiến sìh Trần Đắc Phu, Pơlam broă kâp dờng Anih tờm lơh di pal broă lơh sơnơm mpồl bơtiàn, gơwèt Ƀộ Lơh sơnơm tơnkah: “He pal wă mờ pà gŏ bè broă rơcang kơrian kòp ai să tờm in bal mờ rơcang ai mpồl bơtiàn in tai, rơcanh kơrian kòp ai ală mpồl cau ƀuơn gơtìp uă. Bè kơnòm dềt, bè cau ùr geh bun, cau ờ pràn bơh kòp gơtờp mờ kwơ màng bơh ală cau kra, cau gơtìp kòp lài den pal geh rơcang kơrian lài. Tài ală cau do tŭ gơtìp kòp den mờng geh tơngŏ gơguh jroă mờ he pal rơcang lơh ală broă lơh kloh niam să jan mờ añ sồr tơnkah là broă pơs wàs kloh niam hìu đam, gàr kloh niam ală phan nhơl. Tŭ do lơh jăt broă sa sin hùc sin mờ rào tê mờ sơƀong mờ he lơh jăt broă cit vaccine tơl”.

Nhai 5 – do là tŭ tam gơl kàl – là tŭ niam ngan nàng kơrian ală kòp gơtờp là mờ tŭ mŭt tàm kàl gơtờp kòp uă bơh kàl rơlô bơkang dê. Gàr kloh niam să jan, tiah kis, sào sa kloh niam mờ rơcang sền gròi bơta pràn kơl dang să jan… ală broă lơh jàng lah ƀuơn bè ờs mơya là “broă kơrian” geh cồng nha ngan. Rơcang bơh gờñ, bơh ngài – hơ̆ là broă lơh nàng tơl nă làng bol pơgồp bal tàm broă sền gàr pràn kơl dang să jan ai să tờm, cau tàm hìu nhă mờ gùt mpồl bơtiàn in.