Jăt jơnau kờp bơh Anih tờm gròi sền Kòp tê jê să ƀòn dờng Hồ Chí Minh yal, mìng tàm dùl poh, ƀòn dờng do neh gŏ geh rơlao 300 nă cau gơtìp kòp mprơm gơlik mhàm. Kờp jơh khà cau gơtìp kòp mprơm gơlik mhàm bơh bồ nam 2025 tus tŭ do là mờr 6 rơbô nă. Tàm dùl poh, ƀòn dờng Hồ Chí Minh kung neh gŏ rơlao 300 nă cau gơtìp kòp jơng tê bơr. Kờp jơh khà cau gơtìp kòp jơng tê bơr bơh bồ nam 2025 tus tŭ do là mờr 2 rơbô 300 nă cau. Jơnau sền gŏ bơh cau lơh ƀăo tàm Hìu sơnơm kơnòm dềt 2 ƀòn dờng Hồ Chí Minh dê, uă kòn dềt gơtìp kòp bơh ală càr tus sơm tài cau mè bèp ờ suk hìu sơnơm tàm ală tiah ờ tơl pràn nàng sền di kòp. Tŭ kòp rang ờ hềt tơn jơh gơtờp, kòp jơng tê bơr mờ kòp mprơm gơlik mhàm gam mŭt tàm kàl gơtờp ờ kal ke ngan kờñ git lài di lah ờ geh sền gròi niam.

Bi Phạm Đức Tuấn tus bơh càr Bình Phước cèng kòn 2 sơnam tus ƀòn dờng Hồ Chí Minh sơm kòp, bŭ lah git tàm càr geh tơl sơnơm mờ gùng dà sơm kòp di pal, mơya tus Hìu sơnơm Kơnòm dềt 2 den hơ̆ sồng cau tàm hìu iang nùs: “Tàm càr cau sền là kòp jê as rơnồng dờp mhar mờ gơlơh duh să, tus tàm do kham mờ kơ̆p ai cồng nha den kòp gơguh duh să lơh rơtơs jơng tê mờ pal sơm mhar. Lài ngan gam kơlôi là gơtìp kơrwài gơdê, mơya tàm bơh 3 tus 4 jơ tơnơ̆, kòn ùr añ gơlik tai toh, ală cau lơh sơnơm sồr tam gơl tus gah sơm kòp gơtờp nàng sền den đơs là kòn ùr añ gơtìp kòp jơng tê bơr”.

Kung ndrờm bè hơ̆ sơl, lŏ Lê Thị Huyền tus bơh càr Đồng Nai kung cèng kòn tus Hìu sơnơm Kơnòm dềt 2 ƀòn dờng Hồ Chí Minh sơl tài lài mờ hơ̆ gơtìp di mơ den tàng ai sơm kòp is tàm hìu: “Ngai dơ̆ pe sơn đờm gơtìp duh să, mơya tus ngai dơ̆ pram hơ̆ sồng tus tàm do nàng kham, di gơlan ƀak sìh gŏ kòp ờ jroă den tàng ai sơnơm nàng sền gròi. Jơh 2 ngai gŏ kòn dềt ờ gơmù kòp mờ bĭc sùm gơtìp rơtơs jơng tê, ñìm, ờ bài sào mờ duh să den tàng cèng tus tàm do tai. Sơm kòp niam den ngai do kòn ùr añ geh sồr rê”.

Kòp jơng tê bơr ờ hềt geh vaccine, mơya neh geh gùng dà sơm kòp, ală hìu sơnơm càr ndrờm neh geh bơsram tàp, mơya ờ suk ir den tàng geh uă cau mè bèp neh cèng kòn tus ƀòn dờng nàng sơm, lơh ală hìu sơnơm tàm do di gơlan gơtìp hăt ir. Tàm tŭ hơ̆, ƀak sìh Dư Tuấn Quy, Lam bồ Gah kòp gơtờp-Tơngoh, Hìu sơnơm Kơnòm dềt 1 ƀòn dờng Hồ Chí Minh pà git, kòp jơng tê bơr poh do geh tơngŏ gơguh. Tŭ do geh 18 nă cau gơtìp kòp jơng tê bơr tàm gah sơm kòp tàm hìu sơnơm, tàm dùl ngai geh bơh 15 tus 20 nă kòn dềt gơtìp kòp jơng tê bơr geh sơm kòp tàm hìu, ờ hềt geh kơnòm dềt lơi gơtìp jroă. Hìu sơnơm yal lài kòp gơtờp di gơlan gơlik wơl den tàng neh bơsram tàp gờñ nàng ai ală cau lơh sơnơm in, ală hìu sơnơm càr mờ tàm hơ̆ pal rơcang tơl sơnơm nàng tŭ lơi kung pal rơcang pleh lài. Mìng is kòp rang, gah sơm kòp do kung gam geh 40 nă cau sơm kòp, geh tơngŏ gơmù. Mơya, ƀak sìh bơto sồr làng bol pal cit vaccine rơcang kơrian kòp rang gơwèt mờ cau dờng mờ kơnòm dềt geh 95% nàng lơh geh bơta ờ gơtờp kòp tàm mpồl bơtiàn, sền gàr ală cau di gơlan gơtờp kòp bè cau gơtìp kòp plai nùs, leh ờ pràn, kòp ung thư.

Ƀák sìh Quy kung bơto sồr tai, tàm tơngai bơh nhai 4 tus nhai 6 là sơn đờm bơh kòp jơng tê bơr dê mờ tơnơ̆ mờ hơ̆ là kòp mprơm gơlik mhàm. Den tàng kung pal rơcang lài nùs nhơm, tơnguh broă kơrian kòp, cit vaccine gơwèt mờ ală bơta kòp lơi geh vaccine: “Kòp rang pal pơn jăt tai cih vaccine rơcang kơrian mờ kòp, tàm hơ̆ uă ngan tŭ do ală tiah pal mhar. Añ sồr pal cit vaccine tŭ kơnòm dềt neh 6 nhai, lài ngan pal kah mờ lơh bơta do nàng ală kơnòm dềt bañ gơtìp kòp, pal kah ală cau gơtìp kòp lài. Tŭ lơh geh broă rơcang kơrian kòp tàm mpồl bơtiàn ờ geh cau gơtìp kòp rang den hơ̆ sồng tơn jơh kòp gơtờp. Dơ̆ bàr, he mblàng yal lơh bè lơi nàng làng bol in git bơh nhai 4 tus nhai 6 kòp jơng tê bơr nàng rơcang lài kơrian kòp gơtờp. làng bol pal sền gròi rơlao mờ bañ ờ sền gròi ală kòp gơtờp ndai bè kòp mprơm gơlik mhàm, kòp toh dà. Ală kòp do geh vaccine kơrian kòp, den tàng pal đơs nàng làng bol cit, mờ yal lài lơgar he là lơgar duh ram, den tàng kòp gơtờp di gơlan gơtìp tàm gùt nam”.

Tàm Hìu sơnơm Kơnòm dềt 2, ƀak sìh Nguyễn Đình Qui pà git, tŭ do kòp mprơm gơlik mhàm, kòp jơng tê bơr gam gơguh mờ cau lơh sơnơm kung kơlôi rơcang tŭ 3 bơta kòp gơtờp di gơlan gơlik dơ̆ lĕ: “Mìng is kòp rang kung neh kal ke bloh, tŭ do geh tai kòp mprơm gơlik mhàm pơgăp mờ do bơh 2 tus 3 poh geh tơngŏ gơguh, sơn đờm lồi nhai do kòp jơng tê bơr sơn đờm bloh. He kơlôi rơcang kòp do gơguh dùl tŭ den kal ke ngan tus mờ cau lơh sơnơm dê. Tŭ do pal lơh pràn broă yal tơngit nàng cau mè bèp in git mờ rơcang kơrian lài”.