Tàm pơgăp 02 poh lài, kòn dềt 19 nhai, kis tàm kơnhoàl Hải Lăng, càr Quảng Trị gơtìp kòp mờ bơta tơngŏ as tềng pit tồr đah kiao, mŭt piam kòp tàm Khoa Tồr – Muh – Rơnồng dờ, Hìu sơnơm Dà lơgar Huế nàng sơm kòp. Tơnơ̆ mờ hơ̆, kòn dềt do geh xét nghiệm, gŏ vi khuẩn lơh gơtìp kòp Whitmore den tàng geh jun tus Gah sơm kòp kơnòm dềt. Tơnơ̆ 02 poh sơm mờ kháng siñ gùng mhàm, kòn dềt do neh geh bơta niam tàm să jan, sồt tềng pit tồr neh rañ mờ geh rê bơh hìu sơnơm nàng sơm kòp tàm hìu mờ kháng siñ tàm 03 nhai tai. Geh kòn dềt gơtìp kòp Whitmore jroă rơlao là kòn dềt Trịnh Ngọc N., 06 nhai, kis tàm kơnhoàl Cam Lộ, càr Quảng Trị. Kòn dềt do gơtìp kòp lài mờ tŭ mŭt piam kòp tàm hìu sơnơm 05 ngai mờ duh să uă sùm, jê ndul gơjroh bơh 6 tus 7 dơ̆ tàm ngai bal mờ tă nhơm sơbăc, glar tă nhơm.

Tŭ geh sền gŏ vi khuẩn lơh lơh gơtìp kòp Whitmore, Ală y, ƀák sĩ lơh broă tàm gah sơm kòp kơnòm dềt neh bơyai lơh sơm mờ kháng siñ pràn ai kòn dềt do in. Mò Lê Thị Gái, mò kòn dềt Trịnh Ngọc N. pà git: “Sau añ gơtìp duh să sùm bơh 39 tus 40 độ C, đơs ngan là ờ gơmù tơn tus ngai dơ̆ pe, tàm tŭ duh să den gơtìp rơtơs jơng tê tai, tơnơ̆ mờ hơ̆ kơnờm hìu sơnơm jun mŭt tàm hìu sơnơm Dà lơgar, den tŭ hơ̆ mŭt piam kòp là geh sơm tơn”.

Kòp Whitmore mìng gơtờp bơh broă tìp rềp bal ha là bơh phan sa, dà hùc geh vi khuẩn. Kòp mờng gơlik tàm tŭ geh mìu càl dờng, dà tih dà cò, tàm ală tiah ƀơ̆ ƀơl. Cau gơtìp kòp do pal geh sơm mờ kháng siñ jŏ ngai, bè ờs là cit kháng siñ bơh 2 tus 4 poh. Di lah niam, kòp gơtùi sơm tàm hìu mờ hùc kháng siñ tàm 03 nhai. Thạc sĩ, ƀák sĩ Trần Thị Hạnh Chân, lơh broă tàm gah sơm kòp kơnòm dềt, Hìu sơnơm Dà lơgar Huế pà git: “Kòp Whitmore gơtờp mìng bơh broă geh tìp bal tơn tềng să ha là bơh phan sa dà hùc geh vi khuẩn, den tàng broă lơh mìng geh lơh là lơh kloh să jan. Tài geh uă tŭ he ờ git kòn he geh vi khuẩn lơi, mìng tŭ tă geh kòn vi khuẩn hơ̆ sồng git là kòp Whitmore”.

Tàm Hìu sơnơm Dà lơgar Huế, jăt jơnau kờp tơngai bơh nam 2014 tus 2019, hìu sơnơm neh dờp 83 nă cau geh sền gŏ kòp Whitmore. Bơh bồ nam 2024 tus tŭ do, Hìu sơnơm Dà lơgar Huế dờp mờ sơm kòp 17 nă cau kòp. Tàm càr Dăk Lăk neh gŏ 02 nă cau gơtìp kòp Whitmore kờp bơh bồ nam 2024 tus tŭ do. Jăt gah lơh sơnơm yal, tus tŭ do, kòp Whitmore kung gam ờ hềt geh vaccine rơcang kơrian kòp. Broă rơcang kơrian kòp tờm ngan là pleh tìp tơn mờ ù bal mờ dà geh vi khuẩn, tàm hơ̆ uă ngan là cau gơtìp kòp jŏ bè kòp đồm sơdàng, kòp klờm neh jŏ… Di lah gơtìp sồt, pleh nàng sồt bañ tìp mờ ù ha là dà ƀơ̆ tŭ ờ hềt bời ngan. Tŭ lik bơdìh, pal pơn chèo nàng sền gàr gùng tă nhơm, tàm hơ̆ uă ngan là tàm tiah geh uă ñhŭ, gơthul. Tŭ geh ală bơta bè să jan, bañ sơm is kòp tàm hìu mờ pal tus ală hìu sơnơm geh pin dờn nàng geh ală ƀák sĩ bơto pơlam, kham nàng git kòp mờ sơm kòp di tŭ.