Lŏ Nguyễn Thị Khánh Phương, tàm sơnayh ƀòn Tuy Hoà pà git, di Satềp nam 2023, cau tàm hìu nhă lŏ dê gơtìp tàm bơta jroă ngan tài gơtìp ờ niam bun, pal tơmŭt mờ khà mhàm uă ngan hơ̆ sồng bời. Bơta pal kah ngan rơlao, cau kòp geh mpồl mhàm ờ hoan geh AB den tàng broă jòi mhàm tŭ hơ̆ gơtìp nal ke ngan. tàm bơta ngòt rơngơ̆t hơ̆, ală kơl dung mhàm geh Hìu sơnơm uă gah Phú Yên dờp bơh dùl nă cau lơh broă nùs nhơm dong kờl bal mờ cau tàm mpồl neh di tŭ sơm bời cau pròc mhàm lŏ in. Bơh tŭ hơ̆, tŭ bơta pràn kơl dang să jan geh tơl, git tàm tiah lơi kờñ mhàm den lŏ Phương tus nàng dong kờl. Ai mhàm dong kờl is lài Satềp nam pa Ơseh do là dơ̆ 4 tàm 3 nam do lŏ tus bal tàm sơnah ƀòn Tuy Hoà dê.

Lŏ Nguyễn Thị Khánh Phương đơs: "Bơh tŭ bi ùr gơtìp kòp mờ geh ai mhàm dong klàs mờ neh bời, 3 nam do bơta pràn kơl dang să jan niam, den tàng añ tus bal ai mhàm sùm. Añ kơ̆p kờñ là ală ntờc mhàm bơh añ dê rơ̆p dong klàs ală cau kòp ngòt rơngơ̆t ndai in bè cau hìu nhă añ neh geh tŭ gơtìp”.

Kung tus bal ai mhàm dong kờl is tàm sơnah ƀòn Tuy Hoà di tàm dơ̆ do sơl, tơnơ̆ mờ tŭ dờp bal jơnau hòi jà bơh Hìu sơnơm sơm kòp uă gah Phú Yên dê, lŏ Đinh Thị Ngọc Ngàn, tàm sơnah ƀòn Tuy Hoà pà git: “Do là dơ̆ poan añ tus bal ai mhàm dong kờl is, mờ kơ̆p kờñ geh tam pà bal, dong kờl bal ală cau kòp gam gơtìp kal ke bè khà mhàm. Bơh broă lơh do, añ kơ̆p kờñ geh tai uă cau bơyô, ală bi tus bal gal rơlao nàng ai mhàm dong klàs cau uă rơlao, pơgồp bal tàm broă lơh geh uă nùs nhơm tam pà bal tàm mpồl bơtiàn”.

Bơh bồ nhai 1 tus tŭ do, Hìu sơnơm Sơm uă gah Phú Yên neh dờp geh di pơgăp 330 kơl dung mhàm bơh ală anih ai mhàm dong kờl is tàm sơnah ƀòn Tuy Hoà dê, tơnguh khà mhàm prăp gàr geh mờr 760 kơl dung. Jăt ƀák sìh Nguyễn Định Huy, Kwang lam bồ Mhàr – Ai mhàm, Hìu sơnơm sơm uă gah Phú Yên yal, pah nhai ală hìu sơnơm tàm tiah đah mắt tơngai Lik càr Dăk Lăk kờñ geh di pơgăp 600 kơl dung mhàm. Tàm satềp, tŭ khà cau sơm mhar, rềs àr tàm gùng lòt gơguh, broă rơcang lài tơrgùm mhàm bơh gờñ là gùng dà broă lơh kwơ màng nàng gàr tơl mhàm drơng tàm broă sơm kòp cau kòp in di Satềp nam pa nam Ơseh: “Tŭ do pah poh bol añ dờp geh rơlao 150 kơl dung mhàm tus bơh ală broă lơh ai mhàm dong kờl is geh Mpồl lam ai mhàm dong kờl is hòi jà. Tơnơ̆ mờ tŭ dờp, khà mhàm do geh rơwah mờ jồr nền nòn mờ tam cah is jăt 5 mpồl kòp bơh Ƀộ Lơh sơnơm dê bè: kòp HIV, kòp viêm gan B, C, giang mai, kòp mprơm gơlik mhàm nàng tŭ lơi kung rơcang lài drơng broă sơm mhar, sơm kòp cau kòp in di satềp”.

Bal mờ tiah đah măt tơngai Lik, broă ai mhàm dong kờl is lài Satềp nam pa nam Ơseh kung geh bơyai lơh uă tàm tiah đah măt tơngai Mŭt càr Dăk Lăk sơl. Ƀak sìh Mìng gah II Trịnh Hồng Nhựt, Kwang lam bồ Hìu sơnơm uă gah Tây Nguyên yal, mờ bơta dờng geh 1 rơbô 200 nơm jơnờng piam kòp, pah tŭ do Satềp hìu sơnơm ndrờm dờp mờ khà uă ngan cau kòp. Nàng gàr niam broă kham, sơm kòp di tŭ, geh cồng nha, hìu sơnơm neh rơcang tơl sơnơm, phan lơh sơnơm, ai 100% y ƀak sìh bal mờ cau lơh broă tus lơh broă tơn.

Jăt ƀak sìh Trịnh Hồng Nhựt đơs, bŭ lah khà mhàm tàm dơ̆ ơm rơlô Satềp jŏ ngai là bơta lòng, mơya kơnờm mờ broă rơcang lài bơh gờñ, tus tŭ do hìu sơnơm kung gam pơn jăt tai dờp mờ prăp git nđờ rơhiang kơl dung mhàm, tŭ lơi kung rơcang lài drơng tàm broă sơm mhar, sơm kòp: “Bè sơnơm, hìu sơnơm neh sồr Đah Lơh sơnơm bơ̆t bơtàu broă rơndăp lơh, rơcang tơl sơnơm, phan lơh sơnơm nàng drơng tàm broă kham, sơm kòp di tàm Satềp. Gơwèt mờ khà mhàm, hìu sơnơm pơgồp bal mờ ală mpồl lơh broă nùs nhơm dong kờl, hòi jà geh di pơgăp 1 rơbô kơl dung mhàm prăp nàng drơng tàm broă sơm cau kòp in. Khà do uă rơlao mờ ală nam mìng tàm bơh 700 tus 800 kơl dung mhàm, tŭ lơi kung rơcang lài drơng tàm broă sơm mhar, sơm kòp. Mìng is gơwèt mờ ală mpồl mhàm ờ hoan geh, hìu sơnơm neh hòi jà lài tus mờ ală cau lơh broă nùs nhơm dong kờl is nàng tŭ lơi kung rơcang ai mhàm tŭ cau kòp kờñ”.

Mờ broă rơcang lài bơh gah Lơh sơnơm dê, bal mờ nùs nhơm tam pà bal bơh ală cau lơh broă nùs nhơm dong kờl is nàng ai mhàm, ală hìu sơnơm tàm càr Dăk Lăk gam rơcang nàng di pal mờ jơnau kờñ sơm mhar, sơm kòp di Satềp nam pa nam Ơseh in. Ală kơl dung mhàm geh prăp di tŭ là anih kơl dìng kwơ màng nàng tơnklàs geh rài kis ai cau kòp in. Bơh tŭ hơ̆, pơgồp bal tàm broă sền gàr kơl jăp bơta pràn kơl dang să jan Làng bol in, nàng ală làng bol geh wă rò Satềp nam pa lơngăp lơngai niam.