Dan ồng pà git, ală broă lơh mờ Ƀan Zân tộk càr neh lơh jăt tàm tơngai càr Dăk Lăk gơtìp mờ kòp Kovid-19?

Ồng Hà Huy Quang: “Nam 2020, 2021 tềng đăp mờ kòp Kovid-19 gơtờp tàm càr Dăk Lăk, tàm hơ̆ uă ngan là gơwèt mờ ală ƀòn làng bol kòn cau, git broă do, Ƀan Zân tộk càr neh di tŭ dan mờ UɃÑZ càr bơ̆t bơtàu broă rơndăp đơng lam anih lơh broă kòn cau ală kấp, lơh pràn broă lam sồr, sơndră mờ kòp Kovid-19 tàm tiah làng bol kòn cau tàm gùt càr, tàm hơ̆ uă ngan là ală ƀòn gơtìp tài bơh kòp do dê. Bơh ală broă lam sồr bè pà sră, cih pano mờ hòi jà mpồl cau geh bơngă pin dờn tus tơl pòt gùng, teh tơl mpồng hìu nàng lam sồr làng bol kòn cau in git mờ lơh jăt nền nòn ală broă sơndră mờ kòp Kovid-19 gơtờp di jăt mờ jơnau bơto sồr bơh gah lơh sơnơm dê, den tàng kòp Kovid-19 tàm tiah làng bol kòn cau neh rơhời geh sền gròi, tơmù ờ uă ngan bơta aniai tus mờ màng kis làng bol, ai rài kis lơh broă sa bơh làng bol dê geh bè ờs wơl, tơrgùm lơh broă, tơnguh bơtàu lơh sa”.

Ơ ồng, gơtùi đơs là, sơnơm vaccine là bơta tờm kwơ màng tàm broă sơndră mờ kòp Kovid-19. Mơya, tŭ kòp gơtờp neh gơmù ing, geh ờ uă làng bol kis tàm càr Dăk Lăk geh nùs nhơm sền ờ sơ̆p den tàng neh ờ lơh jăt nền nòn tàm broă tus bal cit sơnơm vaccine sơndră mờ Kovid-19, tềng đăp mờ bơta do, Ƀan Zân tộk neh geh ală broă lơh lơi nàng lam sồr làng bol lòt cit sơnơm vaccine ơ ồng?

Ồng Hà Huy Quang: “Gơtùi đơs là, broă cit sơnơm vaccine sơndră mờ kòp Kovid-19 là bơta tờm kơrian geh cồng nha ngan tàm broă sơndră mờ kòp gơtờp; bè bol he neh gŏ tàm tơngai sơnrờp tài kơnờm mờ gùng dà broă lơh di pal, di tŭ bơh kấp ủy, gơnoar atbồ ală kấp, tàm hơ̆ uă ngan là broă “Lơh broă bal mờ lơgar ndai sơnơm vaccine” ring bal bơh Đảng, Cíñ phủ he dê neh geh dùl khà sơnơm vaccine uă ngan di tŭ nàng cit sơndră mờ kòp ai làng bol kis tàm ală tiah gơtờp uă bè kòp in, kơnờm mờ hơ̆, den tàng kòp gơtờp neh rơhời geh sền gròi, khà cau gơtìp chơ̆t tài kòp gơtờp neh gơmù ngan, rài kis làng bol neh rơhời bè ờs wơl; bơh tŭ hơ̆, lơh geh nùs nhơm kơlôi sơnơng tàm làng bol, tàm hơ̆ uă ngan là làng bol kòn cau geh nùs nhơm sền ờ sơ̆p, ờ sền gròi, ờ kờñ tus mờ broă cit sơnơm vaccine. Git loh bè bơta do, tàm tơngu me bơto sồr bơh gah lơh sơnơm ală kấp, Ƀan zân tộk càr neh rơcang pơgồp bal mờ Anih jơnau đơs Việt Nam tàm Tây Nguyên mờ Anih jơnau đơs mờ sơnđio rùp càr Dăk Lăk lơh jăt broă lam sồr sơndră mờ kòp gơtờp mờ uă jơnau đơs, pờ tơlik tàm jơh anih pờ tơlik jơnau đơs càr bal mờ tiah do dê nàng lơh pràn broă lam sồr, nàng tơnguh uă jơnau git wă bơh làng bol dê tàm tiah làng bol kòn cau in git loh bè bơta kwơ, bơta kwơ màng bơh broă cit sơnơm vaccine sơndră mờ kòp Kovid-19, tàm broă sơndră mờ kòp Kovid-19, lam sồr làng bol kòn cau tus bal cit sơnơm vaccine di tŭ, tơl làm. Bơh tŭ hơ̆, jăt jơnau yal tơrgùm bal bơh gah lơh sơnơm dê, tus tŭ do khà cau cit sơnơm vaccine kòp Kovid-19 tàm tơl mpồl cau neh geh cồng nha niam; pơgồp bal tàm broă rơhời kơrian kòp Kovid-19 gơtờp tàm gùt càr".

Ơi, bè ồng pa đơs bè broă pơgồp bal mờ ală anih yal tơngit sră ƀăo nàng lơh uă bơta lam sồr, nàng tơnguh uă jơnau git wă bơh làng bol dê tàm broă sơndră mờ kòp Kovid-19, di bè hơ̆, ồng Hà Huy Quang đơs bè lơi bè jơnau hơ wơl bơh cau iăt, cau sền rơjô tàm tơngai tus, Ƀan Zân tộk càr Dăk Lăk geh ală broă pơgồp bè lơi nàng gơtùi yal tơl ală bơta bè broă ai tiah làng bol kòn cau in?

Ồng Hà Huy Quang: “Hơ̆ kung là dùl bơta tơngŏ mờ cồng nha niam tàm broă lam sồr sơndră mờ kòp Kovid-19 dê gơwèt mờ broă pơgồp bal mờ anih lơh broă sră ƀăo, pờ tơlik jơnau đơs dà lơgar kung bè tàm càr nàng tơnguh uă jơnau git wă, kơnòl bơh làng bol dê tàm broă sơndră mờ kòp gơtờp. Ngui niam ală cồng nha neh lơh geh, broă lam sồr sơndră mờ kòp Kovid-19 tàm tơngai tus pal geh tơrgùm tàm ờ uă kơnòl mùl màl hơ̆ là: Pơn jăt tai pơgồp bal mờ ală anih lơh broă yal tơngit bè Anih pờ tơlik jơnau đơs Việt Nam tàm Tây Nguyên (VOV), Anih pờ tơlik jơnau đơs mờ sơnđio rùp càr tơnguh uă tơngai lam sồr geh sùm, uă, jrô ơnàng tàm tiah làng bol kòn cau; tàm hơ̆ uă ngan là tơnguh gơnoar broă bơh cau geh bơngă pin dờn nàng lơh pràn broă lam sồr sơndră mờ kòp gơtờp, dong kờl làng bol kis tàm tiah kòn cau in git bơta kwơ, bơta niam bơh broă cit sơnơm vaccine sơndră mờ kòp gơtờp, pơn jăt tai rơcang lơh jăt ală broă jăt jơnau bơto sồr bơh anih lơh broă lơh sơnơm ală kấp; pơgồp bal mờ broă bơyai lơh jăt niam broă lơh jăt jơnau kờñ dà lơgar dê bè tơnguh bơtàu lơh sa mpồl bơtiàn tàm tiah làng bol kòn cau mờ tiah kơh bơnơm tơngai bơh nam 2021 tus 2030. Pơgồp bal gờñ kơrian kòp Kovid-19 gơtờp, tơrgùm tơnguh bơtàu lơh sa, tơnguh rài kis, gàr niam bơta lơngăp lơngai cíñ trị mờ ờ do ờ dă mpồl bơtiàn tàm tiah làng bol kòn cau; tơmù ờ uă ngan bè bơta ờ ndrờm bal tàm rài kis đah làng bol kis tàm tiah kòn cau mờ làng bol cau yoan, đah làng bol kis tàm ƀòn lơgar mờ ƀòn drà".

Ơi, Dan ưn ngài ồng!