Broă lơh mùl màl do neh dong kờl, tam pà bal bơta kal ke mờ ală cau geh rài kis kal ke, gơtìp kòp jroă in, dong kờl ală cau do iang nùs sơm kòp.

Dờp rơlao 20 tơlăk đong bơh broă tơrbŏ bal bơh Mpồl lơh broă mpồl bơtiàn tàm Hìu sơnơm dờng tiah Tây Nguyên mờ ală cau geh nùs nhơm niam nàng dong kờl oh Phan Đình Cương gơtìp kòp jroă tài nhơl pháo, lŏ Hồ Thị Hồng Phương mè oh Cương, kis tàm thôn 1 xã Ea Păl, kơnhoàl Ea Kar chờ hờp mờ ngoh rơngăc ngan. Lŏ Phương pà git, hìu nhă lŏ geh 3 nă kòn, tàm hơ̆ oh Cương là kòn dờng. Nhai 2 lài do tài kờñ nhơl, oh neh bal mờ klao bi tàm jơi nòi nhơl pháo blơi bơh internet mờ gơtìp bơrtoh. Oh Cương gơtìp sồt uă tềng muh măt mờ pal reh koh sơbì bàr mpàng tê. Bŭ lah neh lòt càn gùt tiah, mơya ùr bơklao lŏ kung neh càn ờ tơl priă nàng drơng tàm broă sơm kòn in sơl. Kơnờm mờ mpồl lơh broă mpồl bơtiàn tàm hìu sơnơm tơrbŏ bal mờ ală cau geh nùs nhơm niam dong kờl priă, dong kờl lŏ tă sơbì bơta kal ke. Ờ mìng bè hơ̆, Mpồl lơh broă mpồl bơtiàn do gam jòi geh cau dong kờl jơh priă bơkiar tê ai oh Cương in tai. “Bơh tŭ kòn añ mŭt piam tàm hìu sơnơm den ală Ƀák sĩ kung bè ală Điều dưỡng tàm Hìu sơnơm sền gàr nền nòn ngan mờ sơnđàc kòn añ ngan, mờ kung kơnờm ală ƀák sĩ tàm hìu sơnơm do neh hòi jà ală cau geh nùs nhơm niam dong kờl kòn, mờ cau tàm hìu nhă ưn ngài uă ngan. Ala măt cau tàm hìu ưn ngài ală cau geh nùs nhơm niam ală ngai do neh dong kờl kòn añ uă ngan”.

Oh Y Hoan Êban, 20 sơnam, kis tàm ƀòn Ju, xã Ea Tu, ƀòn dờng Buôn Ma Thuột gơtìp rềs sàr tàm gùng lòt tàm gùng lòt lơh broă rê tàm hìu. Mŭt piam tàm hìu sơnơm tàm bơta gơtìp sồt uă tềng ntìng gòr ngkời, pă ntìng gòr ngkời, tăc chung mờ lơng bàr đah jơng. Bŭ lah Y Hoan neh sơrlèt mờ bơta chơ̆t jê, mơya tài rềs àr gơtìp jroă ir den tàng oh pal reh uă dơ̆. Y Hoan gơtìp kòn đời mè bèp bơh tŭ 13 sơnam, kis mờ kồñ, priă tă tàm broă sơm sồt uă rơlao mờ bơta geh hìu nhă dê. Kơnờm mờ broă hòi jà di tŭ bơh Mpồl lơh broă mpồl bơtiàn, Y Hoan neh geh ală cau geh nùs nhơm niam dong kờl mờr 50 tơlăk đong, tơl nàng tơm priă ơm piam tàm hìu sơnơm. Ồng Y Băn Êban, kồñ oh Y Hoan đơs: “Rài kis kơmòn añ kal ke ngan, ờ geh mè bèp. Khai dờng mờ lòt lơh broă ơpah cau in, tŭ do gơtìp rềs àr, mŭt tàm do ƀák sĩ sơm sồt, hơ̆ sồng sơm kơmòn añ in mờ hòi jà cau geh nùs nhơm niam dong kờl kơmòn añ in tai, geh priă nàng sơm sồt, añ ờ git đơs jơnau lơi tai, añ ưn ngài”.

Bi Hồ Sĩ Phú, Kwang atbồ Cơl dŭ lơh broă sền gàr cau kòp, drơng broă Mpồl lơh broă mpồl bơtiàn Hìu sơnơm dờng tiah Tây Nguyên pà git, bơh nam 2022 tus tŭ do, Mpồl lơh broă mpồl bơtiàn bơh Hìu sơnơm dê neh hòi jà tă geh rơlao 1 tơmàn 500 tơlăk đong mờ mờr 1 rơbô pò phan jào pà ală cau kòp geh rài kis gơtìp kal ke in. Bơdìh mờ broă lơh nùs nhơm dong kờl, Mpồl lơh broă mpồl bơtiàn gam lơh jăt kơnòl sền gàr cau tus bal, bơto sồr ală broă lơh, broă drơng gàr kham, sơm kòp gam geh lơh tàm Hìu sơnơm; Bơto sồr cau kòp lơh ală sră nggal geh kwơ di pal mờ ală cau tŭ tus kham mờ sơm kòp; Dong kờl, mblàng ală bơta kal ke bơh hìu nhă cau kòp bè: bơta cau kòp, gùng dà sơm kòp bơh ƀák sĩ, sền gàr kòp tàm hìu; Gơnoar kwơ bal mờ kơnòl bơh cau kòp, cau tàm hìu nhă, bi Hồ Sĩ Phú pà git: “Mpồl lơh broă mpồl bơtiàn kong kơnòl dờp ală jơnau tơngit bơh ală cau kòp gơtìp kal ke bè priă sơm kòp ha là priă ngui sa bơh ală Khoa sơm kòp mờ anih bol añ geh tus sền nàng git jơnau yal geh di ngan nàng geh hòi jà lah ờ. Tơnơ̆ mờ hơ̆, bol añ rơcang pơgồp bal, hòi jà ală cau geh nùs nhơm niam nàng tus còp mờ jào tơn cau kòp in nàng geh dong kờl bơnah lơi priă tă sơm kòp kung bè priă ngui sa cau kòp in. Anih do kung neh ai lơh bè lơi nàng cau kòp ing nùs bè broă sơm kòp, ờ ngòt bè priă tă sơm kòp mờ priă ngui sa”.

Jăt Ƀák sĩ CK II Nguyễn Đại Phong, Kwang atbồ Hìu sơnơm dờng tiah Tây Nguyên đơs, Mpồl lơh broă mpồl bơtiàn bơh hìu sơnơm geh lơh bơh nam 2016. Tus nam 2021 geh mŭt tơrgùm bal mờ Cơl dŭ lơh broă sền gàr cau kòp. Đơs bè cồng nha lơh broă bơh Mpồl lơh broă mpồl bơtiàn Hìu sơnơm dê, ƀák sĩ Nguyễn Đại Phong pà git: “Mpồl lơh broă mpồl bơtiàn geh gơnoar kwơ màng tàm jơh ală broă pơgồp bal ală cau dong kờl nàng dong kờl ală cau geh rài kis gơtìp kal ke in. Lài jơh là lam sồr cau lơh broă, lam sồr ală cau geh nùs nhơm niam, geh tŭ là hòi jà ală cau lơh ƀăo nàng kŭp rùp mờ cih tàm ală pang ƀăo den kung neh geh dong kờl uă ngan bơh ală cau geh nùs nhơm niam mờ ală cau geh nùs nhơm niam lơh cau kòp in tơmù ờ uă bơta kal ke mờ priă tă ơm piam kòp. Bơdìh hơ̆ tai mpồl lơh broă mpồl bơtiàn kung neh lơh uă ngan broă, hơ̆ là bơto sồr, dong kờl cau kòp tàm jơh ală broă mờ cau kòp ờ gơtùi lơh is, lơh cau kòp kung bè cau pròc mhàm cau kòp di nùs ngan”.

Broă lơh jăt geh cồng nha broă lơh mpồl bơtiàn tàm hìu sơnơm nàng dong kờl cau kòp bơsong ală jơnau kờñ tŭ tus kham kòp, sơm kòp tàm hìu sơnơm là dùl broă lơh pa tàm broă sền gàr mờ drơng cau kòp in, pơgồp bal tàm broă lơh tơmù ờ uă bơta glar bòl, ờ tơl tài kal ke kòp tê jê să bơh uă cau gơtìp kal ke in; lơh gơguh bơta chờ, bơta gơboh gơbài, bơtơl ală bơta niam bơnĕ tàm rài kis...