Bơh bồ nam tus tŭ do, càr Dăk Lăk dờp geh 1 rơbô 518 nă cau gơtìp kòp mprơm gơlik mhàm tàm 14 tiah geh kòp, gơguh 154% pơn drờm mờ tŭ do nam 2025. Pal kah ngan, mìng tàm poh lài neh geh rơlao 210 nă cau gơtìp kòp mprơm gơlik mhàm pal tus sơm kòp tàm ală hìu sơnơm tàm càr do. Ală tiah dờp geh uă cau gơtìp kòp ngan bè sơnah ƀòn Tuy Hoà, Buôn Ma Thột mờ ală sàh Phú Hoà, Đồng Xuân, Sông Hinh, Krông Ana, Ea Súp, Ea H’leo…

Băk sìh Lê Phúc, Phó Kwang lam bồ Anih tờm Gròi sền kòp tê jê să càr Dăk Lăk pà git, tềng đăp mờ bơta gơtìp gơguh uă bơh khà cau gơtìp kòp tàm ală ngai pa do, mpồl lơh broă do gam pơgồp bal mờ mpồl lơh sơnơm tàm ală sàh, sơnah ƀòn lơh ndrờm bal ală gùng dà broă lơh nàng kơrian mờ kòp mprơm gơlik mhàm. “Bol añ tơnguh uă mờ lơh mhar broă kơrian véctơ, hơ̆ là jăt nền, gơsơ̆t sơmăc, kih dà, phan lơh gơtờp kòp nàng ai mpồl lơh sơnơm tàm ală hìu sơnơm sàh, sơnah ƀòn in. Bơh tŭ hơ̆, tơnguh uă bơta pràn bơh mpồl lơh broă do nàng di pal mờ jơnau rơcang lài bè broă di gơlan gơtìp kòp tàm tơl tiah, nàng lơh ƀuơn broă yal lài kung bè cồng nha rơlao tàm broă kơrian kòp mprơm gơlik mhàm”.

Bơh bồ nam tus tŭ do, gùt càr Gia Lai dờp geh 1 rơbô 813 nă cau gơtìp kòp mprơm gơlik mhàm, tàm hơ̆ geh dùl nă cau neh gơtìp chơ̆t. Di lah pơn drờm mờ tŭ do nam 2025, khà cau gơtìp kòp gơguh 914 nă. Nàng rơcang sền gròi mờ kơrian kòp mprơm gơlik mhàm gơguh, Anih tờm gròi sền kòp tê jê să càr neh bơyai lơh ai mpồl lơh broă tus jăt sền bơta kòp mprơm gơlik mhàm, broă kơrian kòp gơtờp mờ lơh kloh tiah gơtìp kòp tàm ală sàh gơtìp uă, dờp geh uă cau gơtìp tàm poh lài.

Mùl màl, mpồl lơh broă do pa jăt sền tàm sàh Bình An. Mpồl lơh broă neh lơh broă mờ kwang đơng lam Anih duh broă Làng bol sàh, Hìu sơnơm sàh Bình An, Anih tờm Lơh sơnơm Tây Sơn bè broă kơrian kòp mprơm gơlik mhàm tàm sàh do, bơta cau gơtìp kòp mprơm gơlik mhàm, broă lơh kloh tiah gơtìp kòp, gơsơ̆t kih dà, ƀồm dà sơnơm; pơgồp bal mờ dong kờl sàh do lơh jăt broă lơh kloh tiah gơtìp kòp mprơm gơlik mhàm.

Jăt Sờh Lơh sơnơm càr Gia Lai đơs, nàng broă kơrian kòp mprơm gơlik mhàm geh cồng nha, ală tiah pal pơn jăt tai lơh ală broă lơh kloh tiah gơtìp kòp; pal kah tus tàm broă gơsơ̆t kih dà, pơs wàs kloh niam tiah kis, pơs wàs kloh niam hìu đam; tơnguh broă mblàng yal, kơrian mờ kòp mprơm gơlik mhàm tàm ală hìu làng bol, tàm ală hìu bơsram mờ tàm mpồl loa pờ tơlik jơnau đơs sàh dê; jăt sền sơmăc mờ kih dà jăt tơngai nàng geh ală gùng dà broă lơh di tŭ, pleh mờ lời kòp gơtờp tus tàm uă tiah.

Tus tŭ do, càr Lâm Đồng dờp geh 1 rơbô 126 nă cau gơtìp kòp mprơm gơlik mhàm; dờp geh 48 nă cau gơtìp kòp pa mờ 10 tiah gơtìp kòp gam lơh broă, tơrgùm tàm ală tiah bè: Dà Huoai, Bảo Lộc, Di Linh, Tánh Linh, Đức Linh mờ Bắc Bình. Jăt Sờh Lơh sơnơm càr Lâm Đồng yal, bŭ lah khà cau gơtìp kòp geh tơngŏ gơmù di mơ di lah pơn drờm mờ tŭ do nam lài, mơya kòp gơtờp neh gơlik gờñ, uă tiah di gơlan gơtờp uă tàm tơngai tus tŭ mŭt tàm kàl mìu dờng.

Nàng rơcang sền gròi kòp gơtờp, tơrmù ờ uă ngan khà cau gơtìp kòp, cau kòp jroă mờ chơ̆t tài bơh kòp mprơm gơlik mhàm, Sờh Lơh sơnơm neh sồr Anih tờm gròi sền kòp tê jê să càr tơnguh broă jăt sền kòp, rơcang sền gròi nền nòn bơta kòp gơtờp tàm càr. Di tŭ gŏ gờñ ală cau kòp, tiah kòp pa gơlik geh nàng bơyai lơh ƀồm sơnơm lơh kloh, bañ lời kòp gơtờp uă tiah mờ tơngŏ tơngai. Rơcang lài tơl dà sơnơm, phan lơh broă, phan sơnơm nàng drơng tàm broă rơcang kơrian kòp gơtờp; bơyai lơh sền gròi, jăt sền jăt tơngai mờ ni sơna tàm ală tiah di gơlan gơtìp kòp uă.