Pa do, Pơrjum dờng dơ̆ IV, tơngai lơh broă bơh nam 2023 tus 2028 bơh Mpồl cau lơh sơnơm kơnòm să càr Dăk Lăk neh ai gŏ jơnau kờñ tờm ngan là: Ngui ală broă lơh nùs nhơm dong kờl tài bơta pràn kơl dang mpồl bơtiàn; lơh pràn broă lơh bơh Mpồl cau lơh sơnơm kơnòm să tàm ală ƀòn ơm kis. Mờ jơnau ai geh nàng lơh broă “Cau lơh sơnơm kơnòm să càr Dăk Lăk lơh jăt jơnau bơto bơh Wa Hồ dê, lơh broă nùs nhơm dong kờl is tài bơta pràn kơl dang mpồl bơtiàn”, tàm tơngai lơh broă pa, Mpồl cau lơh sơnơm gam kơnòm să càr Dăk Lăk pơn jăt tai ngui gơnoar mờ bơta pràn bơh ală cau tàm mpồl dê bơh ală broă lơh bơsram sră, bơsram tàp, tơnguh uă nùs nhơm niam cau lơh sơnơm; ngui broă bơceh pa tàm broă kơlôi sơnơng khoa họk mờ lơh pràn broă lơh nùs nhơm dong kờl is tài bơta pràn kơl dang mpồl bơtiàn.

Ƀák sĩ Phan Thành Trinh, Củ tịc Mpồl cau lơh sơnơm kơnòm să càr Dăk Lăk khoă 4 pà git: “Mpồl cau lơh sơnơm kơnòm să càr Dăk lăk pơn jăt tai lơh jăt ală tơngu me lơh broă bơh să tờm dê mờ 3 tơngu me mờ 3 tơngu me tờm, mìng tơrgùm tàm ală broă lơh cau lơh sơnơm gam kơnòm să lơh broă nùs nhơm dong kờl is tài rài kis mpồl bơtiàn; ngui geh gơnoar lam lài bơh să tờm dê tàm tơl tiah. Mờ gơnoar bơh ală mpồl cau lơh sơnơm kơnòm să tàm ală kơnhoàl tàm tơngai tus geh pràn kơl dang rơlao, ală oh mi cau ùr geh ngui gơnoar bơh să tờm tàm ù tiah he atbồ”.

Mpồl cau lơh sơnơm kơnòm să càr Dăk Lăk tŭ do geh 16 mpồl gơwèt bal mờ mờr 1 rơbô nă cau tàm mpồl là ală y, ƀák sĩ kơnòm să gam lơh broă tàm ală hìu sơnơm bơh càr tus kơnhoàl mờ ală hìu sơnơm cau dùl nă să lơh is tàm càr. Tàm 5 nam do, ală kấp mpồl Cau lơh sơnơm kơnòm să tàm càr neh geh uă broă lơh nùs nhơm dong kờl tài bơta pràn kơl dang să jan mpồl bơtiàn bè: bơyai lơh 120 dơ̆ kham kòp, bơto pơlam sền gàr bơta pràn kơl dang să jan, pà sơnơm ờ sa priă ai 86 rơbô nă làng bol in mờ khà priă rơlao 4 tơmàn 200 tơlăk đong; bơsram tàp ală broă lơh sơm kòp ai git nđờ rơbô nă cau pơgru ală hìu bơsram mầm non, hìu bơsram kấp 1 tàm gùt càr in. Bơyai lơh Ngai chờ rào tê mờ sơƀong; bơsram tàp bè broă mblàng yal bơto bơtê sền gàr bơta pràn kơl dang să jan deh dùh cau pa tào in, rơcang sơndră mờ kòp gơtờp ai git nđờ rơbô nă kơnòm bơsram, cau bơsram dờng in. Lơh broă Dong kờl cau kòp tàm 14 hìu sơnơm tàm gùt càr. Bal mờ hơ̆, Mpồl gam bơyai lơh dùl broă lơh nùs nhơm dong kờl is dunia tàm lơgar Campuchia nàng kham kòp, bơto pơlam sền gàr bơta pràn kơl dang să jan mờ pà sơnơm ờ sa priă ai làng bol in, pà rơndeh coh ai kơnòm bơsram geh rài kis bơtìp kal ke in.

Lồi nam 2023 pa do, tàm càr lơgar Hà Nội, Mpồl cau lơh sơnơm kơnòm să Việt Nam neh bơyai lơh broă lơh “Tam gơl sồ tài bơta pràn kơl dang klờm soh” kham rơwah kòp ung thư klờm soh mờ ală kòp bè klờm soh. Broă lơh kham rơwah ngui kông nghệ kao geh ală ƀák sĩ bơh ală hìu sơnơm lơh. Mờ ală broă kham tơrgùm, cụp X-qang, siêu âm, điện tim, điện tâm đồ, sền gròi sơdàng mhàm, xét nghiệm đồm sơdàng, tơngi mhàm… geh làng bol đơs niam. Dùl nă cau kòp đơs: “Añ was geh huyết áp mờ ai mhàm tơrlòng, den tàng tŭ do gam kơ̆p nàng kŭp rùp klờm soh, gam pal siêu âm tai, añ kờñ ngan broă lơh do. Ưn ngài Dà lơgar neh sền gròi tus làng bol”.

Do là broă kham ờ sa priă nàng gŏ di tŭ ală cau di gơlan gơtìp kòp ung thư klờm soh mờ ală kòp ngòt rơngơ̆t bè klờm soh, dong kờl sền gàr mờ sơm kòp di tŭ, tơmù ờ uă ngan bơta di gơlan gơtìp chơ̆t, bơta di gơlan lơh gơrềng tus mờ ală broă lơh bơh geh gơnoar bal mờ bơta pràn kơl dang să jan, pơgồp bal tàm broă gàr niam rài kis lơh broă sa mpồl bơtiàn, tơnguh uă bơta niam rài kis bơh làng bol lơgar Việt Nam dê. Ƀák sĩ Hà Anh Đức, Kwang atbồ cơl dŭ lơh broă gơwèt Ƀộ Y tế, Củ tịc Mpồl cau lơh sơnơm kơnòm să Việt Nam pà git: “Broă rơwah gờñ, gŏ gờñ, sơm kòp di tŭ den geh dong kờl cau kòp tơnjŏ rài kis, rài kis mờ tơnguh uă bơta niam mờ kung dong kờl tơmù priă tă mờ mpồl bơtiàn pal kong gơtìp. Mpồl cau lơh sơnơm kơnòm să bol añ kờñ ai geh hơ̆ là pal geh dùl broă lơh di, dong kờl ai broă lơh lơi in priă tă ờ uă ngan, geh cồng nha uă ngan, cau kòp geh dờp mờ kwang bàng lơh sơnơm kung lơh di broă lơh, gŏ di cau kòp nàng ai lòt sơm kòp di tŭ”.

Broă lơh “Tam gơl sồ tài bơta pràn kơl dang klờm soh” kham jăt jơnau kờñ kham rơwah ờ sa priă broă di gơlan gơtìp kòp ung thư klờm soh mờ ală kòp bè klờm soh ndai ai rơlao 50 rơbô nă làng bol in. Lài mờ hơ̆, broă lơh do neh geh lơh tàm ƀòn dờng Hồ Chí Minh, tŭ do broă lơh do gam pơn jăt tai geh lơh tàm ală ƀòn dờng bè Hà Nội, Cần Thơ, Đà Nẵng mờ càr Thừa Thiên Huế mờ broă tus bal bơh mờr 1 rơbô nă y, ƀák sỹ.