Jùt dà măt kòn gam bic sơplàng tềng jơnờng piam, sền muh măt kòn geh uă sồt, mpàng tê đah ma gơtìp sồt mờr jơh mờ pal koh nao tê me mờ nao tê cong, nùs nhơm lŏ Trần Thị Thu Hằng kis tàm xã Tam Giang, kơnhoàl Krông Năng, càr Dăk Lăk kung gơlơh moăt ngan sơl. Geh ală ƀák sĩ lơh broă tàm gah sơm sồt, hìu sơnơm dờng tiah Tây Nguyên sơm mhar, sồt neh niam, mơya dơ̆ rềs àr tài phăo bơrtoh kòn lơh, kung gam lời sùm tàm nùs nhơm cau mè moăt ngan. “Tŭ bơrtoh ală cau cèng tus hìu sơnơm, hòi điện thoại añ in, tŭ hơ̆ añ kung gơtìp nrơ̆t dơl mờ gơpừ tơn. Ƀák sĩ yal mpàng tê kòn añ pal koh 2 nao tê, tŭ hơ̆ añ moăt ngan, ờ git lơh bè lơi nàng ala kòn in”.

Lŏ Nông Thị Tiên, mè oh Trần Nhật Phong, kis tàm xã Dăk Gla, kơnhoàl Dăk Mil, càr Dăk Nông kung pa gơtìp mờ dùl dơ̆ rềs àr ndrờm bal sơl. Phong mờ bơyô lơh phăo, tơnơ̆ mờ hơ̆ cèng rê tàm hìu nàng pồt tai. Tài siao phăo gơtìp sùh, oh neh tuh tàm sô ƀák mờ pờ ờs nàng lơh rañ siao mờ lơh gơtìp bơrtoh dờng. “Añ kung git bơta ngòt rơngơ̆t bơh phăo dê, rê tàm hìu añ kung bơto kòn uă ngan mơya kòn ờ dờn. Ngai kòn gơtìp, sền muh măt kòn añ moăt ngan, ờ git bè lơi tơn nđan lah kòn gơtìp rềs àr jroă ngan bè do”.

Sồt tềng tê mờ muh măt bơh ală oh gơtùi bời wơl jăt tơngai, mơya ală bơta moăt tàm nùs nhơm den kal ke ngan gơtìp jơh. Gơwèt mờ kơnòm dềt, rềs àr phăo bơrtoh ờ mìng là ală sồt lơhò, mờ gam lời wơl ală bơta ờ niam bè nùs nhơm, lơh gơrềng tus mờ broă bơtàu tơnguh bal mờ sền git bè ală bơta gùt dar. Oh Hoàng tàm ală ngai sơm sồt tàm hìu sơnơm neh màl ngan mờ bơta ngòt rơngơ̆t bơh phăo dê. “Kòn sền tàm Tiktok mờ blơi siao cèng rê, tơnơ̆ mờ hơ̆ bơrlŭ bal. Kòn tuh dơ̆ 3 den ni sơna bơrtoh. Ƀák sĩ pih sơnơm mờ cit jê ngan, kòn màl ngan bè broă nhơl phăo”.

Gam do là jơnau bơh oh Phong dê tŭ gam pal gơtìp mờ bơta jê tài phăo bơrtoh lơh gơtìp: Tŭ do tê jê mờ as tai, uă dà gơlik, muh măt kung jê. Oh màl ngan tài oh kung ờ hềt git bơta ngòt rơngơ̆t bơh siao bơrtoh dê.

Ƀák sĩ Nguyễn Minh Trực, Atbồ Gah sơm sồt Hìu sơnơm dờng tiah Tây Nguyên yal, ală dơ̆ rềs àr tài phăo bơrtoh gơtìp di tàm tŭ rơlô bơkang mờ Satềp, mờ khà kơnòm dềt gơtìp sồt să uă ngan. Pah nam, Gah sơm sồt dờp geh di pơgăp 20 nă cau tài bơh nhơl phăo. Ală sồt tài phăo di gơlan uă ngan, bơh lơhò uă, tăc nao tê tus mờ lè măt. Ală cau gơtìp lơhò bơh nhơl phăo lơh is ngai sơlơ ngòt rơngơ̆t rơlao, tài phăo di gơlan lơh sồt uă ngan tus tàm dơlam să, pal reh jŏ jòng nàng sơm. “Phăo bơrtoh gơlơh bè sồt să lơhò jroă ngan. Geh ală cau cau pal koh sơrbì jơh ală nao tê den tàng mpàng tê ờ gam bè ờs bè lài tai, lời wơl bơta ờ niam tus jơh rài kis gơwèt mờ ală kơnòm dềt dê. Bè đah hìu nhă, mpồl bơtiàn kung pal sền gròi tus mờ ală kơnòm dềt, tài ală bơta sồt să bè hơ̆ gơlời wơl bơta ờ niam uă ngan”.

Rềs àr phăo bơrtoh ờ di mìng là jơnau bơh hìu nhă ha là jơnau is càr Dăk Lăk dê mờ gam jơh gùt mpồl bơtiàn. Jơnau yal lài pràn kơl dang ngan bè broă pal git loh làng mờ pal geh ală gùng dà broă lơh nàng pleh; tơl nă cau pal tơnguh is kơnòl sền gàr să tờm mờ cau tàm hìu nhă nàng lik klàs mờ ală bơta gơtìp rềs àr ngòt rơngơ̆t ngan bè do.