Gam sền gàr kòn sơm kòp tàm Hìu sơnơm Uă gah tiah Tây Nguyên, bi Y Vy Ktul, kis tàm ƀòn Chăm, kơnhoàl Krông Ana pà git, tàm 1 nhai bi geh 2 nă kòp pal mŭt piam kòp tàm hìu sơnơm tài gơtìp kòp rang.

Bơta kơlôi rơcang sơlơ uă tài 2 nă kòn ndai tàm hìu kung ndrờm ờ hềt geh cit vaccine rơcang kòp rang: “Añ ờ git lơh bè lơi, lòt kham den cau đơs là kòp duh să gơlik toh pơrhê, tus tàm do hơ̆ sồng git là kòp rang. Gŏ kòn ùr gam bic piam kòp bè do den tŭ do hơ̆ sồng git tus mờ vaccine kòp rang, di gơlan pal lòt cit kòn ùr in mơ. Tŭ do tus tàm hìu sơnơm den tàm hìu ờ geh cau lơh broă, mờ tàm hơ̆ tai kòn ùr kòp den he kung kơlôi rơcang ngan”.

Ƀak sìh Trần Thị Thuý Minh, Lam bồ gah Kòn dềt Trơgùm bal, Hìu sơnơm Uă gah tiah Tây Nguyên pà git, tŭ do kòp rang gam gơtờp mhar ngan mờ uă kòn dềt gơtìp kòp jroă. Tàm khà rơlao 60 nă kòn dềt gam sơm kòp tàm tiah tam cah is, geh uă ngan kòn dềt gơtìp tus as sồt klờm soh, kòp tàm klồng măt mờ gơjroh ndul mhar. “Kòp rang là dùl tàm ală kòp ngòt rơngơ̆t ngan mờ gơtờp mhar ngan, di lah pơndrờm kòp do gơtờp mhar rơlao mờ kòp Kovid-19. Bŭ lah bè hơ̆, geh dùl bơta bơtoah là geh uă bơta kòp rang neh cit vaccine den ờ geh cau gơtìp. Do là kòp gơtùi rơcang kơryan lài mờ vaccine. Di lah ờ geh rơcang vaccine gơtìp gơtờp den gơtờp rơ̆p jroă ngan mờ khà gơtìp kòp jroă uă”.

Ồng Hoàng Hải Phúc, Kwang lam bồ Anih tờm Gròi sền kòp tê jê să càr Dăk Lăk yal, tềng đap mờ bơta gơtờp bơh kòp rang gơguh, gah lơh sơnơm neh lơh uă broă lơh nàng sền gròi kòp gơtờp. tàm hơ̆ geh broă tơnguh broă jăt sền kòp, cit bơtơl vaccine ai kơnòm dềt ờ hềt cit in mờ lơh pràn broă mblàng yal nàng tơnguh uă jơnau git wă tàm làng bol. “Bol añ neh pơlam Sờh Lơh sơnơm in nàng lơh jăt broă rơcang kơrian kòp rang tàm càr, tàm hơ̆ geh broă cit vaccine kòp rang, rubella mờ sồr ală kơnhoàl bè broă lơh, hơ̆ sồng lơh mhar broă cit vaccine. Tàm hơ̆ kwơ màng bol añ tơnguh broă mblàng yal, yal tus tàm ală tiah ngài, tiah làng bol jơi bơtiàn ờ gal cau tus bal nàng ai oh kòn tàm sơnam lòt cit vaccine”.

Jăt Kụk Rơcang kòp gơwèt Ƀộ Lơh sơnơm đơs, bơh bồ nam tus tŭ do gùt lơgar neh gŏ 52 rơbô nă cau gơtìp kòp rang, uă ngan là tàm ală càr đah Jum. Tơnơ̆ mờ jơnau sồr bơh Thủ tướng tàm nhai 11 nam 2024 bè broă tơnguh broă rơcang kơrian kòp rang, uă tiah neh dan vaccine mơya gam ờ uă. Rơlao mờ hơ̆ tai, broă bơyai lơh cit vaccine gơlơh bè mìng gah lơh sơnơm lơh broă do, ală gah lơh broă ndai ờ tus bal uă, ờ hòi jà geh làng bol tus cit  vaccine.

Jăt Tiến sìh Hoàng Minh Đức, Lam bồ Kụk Rơcang kòp đơs, tŭ do gam geh ờ uă tiah lơh broă lơyài tàm broă rơcang kòp gơtờp: “Broă do gơrềng mìng tus mờ broă bơyai lơh cit vaccine, hơ̆ là kĭ broă rơndăp lơh, ai kes priă, blơi phan lơh broă… Tŭ do khà cau gơtìp kòp gơguh là tài khà cit vaccine lơyài rơlao mờ khà gơtìp bơh kòp rang dê”.

Bè ờs, tơnơ̆ mờ tŭ cit vaccine rơcang kòp 2 poh rơ̆p geh ờ gơtờp kòp. Tàm bơta kòp rang kung gam gơtìp kal ke bè tŭ do, mè bèp pal cèng kòp bơh 6 nhai tus 10 sơnam ờ hềt cit ha là cit mờ hềt tơl vaccine kòp rang den lòt cit. Di lah cau mè bèp ờ kah loh neh geh cit ai kòn in tơl ha là ờ den pal cit bơtơl tài vaccine kòp rang ờ lơh gơtìp aniai tus mờ bơta pràn kơl dang să jan kòn dềt dê.