Lŏ H’ Dung Niê, kis tàm ƀòn Tơng Jŭ, xã Ea Kao, ƀòn dờng Buôn Ma Thuột, càr Dăk Lăk yal: Lài do kòn cau Rơđê gam ờ hềt lòt bơsram uă, ờ git wă den tàng tŭ geh cau tàm hìu gơtìp kòp tê jê să ờ geh lòt tus hờ hìu sơnơm nàng sơm kòp, mờ mờng sơm mờ ală bơta sơnơm ờs mờng, sơm mờ broă duh khoai yàng kơh bơnơm nàng kơ̆p kờñ geh sơm bời kòp. Mơya tŭ do den neh is mờ lài: “Bơh tŭ geh broă sền gròi bơh Đảng, Dà lơgar, bơh broă lơh sơnơm tàm ƀòn tus mờ xã, ƀòn dờng, tŭ do den geh lam sồr bè cau ùr deh dùh di kơrhia tàm hìu nhă, ha là tàm tơngai geh bun den sền gàr bun pràn niam, sùm pal lòt kham, pal tus mờ cau lơh broă lơh sơnơm tàm ƀòn bơto pơlam. Kòp Kovid-19 tàm ƀòn kung gơtìp uă, lài ngan tàm xã Ea Kao, mơya tài geh broă sền gròi bơh Đảng, Dà lơgar den kung lơh jăt, tơrgùm bal uă ngan, kòp gơtờp tàm ƀòn geh uă mơya ờ geh cau gơtìp jroă ha là chơ̆t, hơ̆ là bơta chờ hờp ngan tàm tơngai pa do”.

Tus tŭ do, mờ broă lơh ngan bơh gah lơh sơnơm dê, làng bol ală kòn cau kis tàm càr Dăk Lăk neh tơnguh uă jơnau git wă tàm broă sền gàr bơta pràn kơl dang să jan, tus is hờ hìu sơnơm nàng kham tŭ gơtìp kòp tê jê să, ală bơhiàn duh khoai yàng, sơm kòp mờ nha chi neh rơhời sơbì jơh. 100% khà cau ùr deh kòn tàm ală hìu sơnơm, ờ gam geh cau deh is kòn tàm hìu tai. Ală hìu sơnơm neh geh tơl ală bơta phan, măi mŏk lơh broă, tơl khà sơnơm nàng drơng tàm broă sền gàr bơta pràn kơl dang să jan ală làng bol kòn cau in, tơrmù ờ uă ngan khà cau kòp pal cèng tus hờ hìu sơnơm dờng. Ƀák sĩ Nông Văn Sáng, kwang atbồ hìu sơnơm xã Ea Mdroh, kơnhoàl Cư̆ Mgar đơs: “Tŭ do neh geh măi siêu âm, măi was plai nùs, ală bơta măi bè jồp kơnhà, xét nghiệm bè ờs. Tŭ broă sền gàr bơta pràn kơl dang să jan tàm ƀòn he geh gơguh uă, làng bol ờ pal lòt kham, sơm kòp tàm tiah ngài tai den geh gơmù priă tă tàm broă blơi xăng, tơngai, cau lòt sền gàr ală bơta geh gơmù uă ngan”.

Ờ mìng tàm càr Dăk Lăk, tàm càr Lai Châu kung bè hơ̆ sơl, nàng tơnguh uă bơta ndrờm bal tàm broă sền gàr bơta pràn kơl dang să jan, tàm hơ̆ uă ngan là broă sền gàr bơta pràn kơl dang să jan ai làng bol kis tàm tiah ngài, tiah làng bol kòn cau in, Đảng mờ Dà lơgar neh geh ală broă dong kờl, broă lơh mùl màl bè mpồl dong kờl mờ broă lơh nàng ai lài bơsong ală bơta sền gàr bơta pràn kơl dang să jan cau rơƀah, tiah rơƀah; mpồl cau geh broă dong kờl nàng tơnguh broă geh kham mờ sơm kòp bơh cau rơƀah dê tus mờ broă lơh sơnơm dà lơgar mờ dŭt ndơl là mpồl cau geh sră dong kờl nàng dong kờl priă ai cau rơƀah, tiah rơƀah tàm broă kham, sơm kòp. Lŏ Lò Thị Khăn, kòn cau Lự, kis tàm xã Ƀản Hon, kơnhoàl Tam Đường, càr Lai Châu yal: “Sền gàr bơta pràn kơl dang să jan cau ùr den ai lòt kham bun, kham bơta pràn kơl dang să jan añ in. Tŭ oh mi cau ùr neh deh, cit sơnơm rơcang sơndră. Ờ sền gàr bơta pràn kơl dang să jan den tơnơ̆ do ngòt he gơtìp kòp, geh bơta lơi den ờ pal lòt sền lài. Añ geh sră ƀảo hiểm y tế mờ hìu rơƀah tai den ờ jơh uă ngan sơl, ờ geh sră ƀảo hiểm y tế den roh priă ngan”.

Tàm broă sền gàr bơta pràn kơl dang să jan ai làng bol kòn cau mờ tiah kơh bơnơm tŭ do in, ală càr, ƀòn dờng geh sền gròi ngan tus mờ broă yal bơta git wă mờ lơh tàm broă sền gàr bơta pràn kơl dang să jan, phan sa bơkah ai cau mè mờ kòn dềt in. Dong kờl tơnguh broă kham bơta pràn kơl dang să jan jăt tơngai ai kơnòm dềt hờ đơm 24 nhai in; Dong kờl tơnguh phan sa bơkah mờ rơcang sơndră mờ kòp rơgai jòr tàm tiah làng bol kòn cau mờ tiah kơh bơnơm ai kơnòm dềt in. Lŏ Ƀùi Thị Toan, kis tàm ƀòn Lục, xã Yến Nghiệp, kơnhoàl Lạc Sơn, càr Hoà Bình pà git: “Tàm ƀòn bol añ, ală kơnòm dềt bơh 5 sơnam là geh cit sơnơm vaccine rơcang sơndră mờ kòp pah nhai di mờ tơngai geh ai, mờ bơta pràn kơl dang să jan cau dờng là geh bè cau ùr bol añ jăt tơngai kham mờ ai hùc sơnơm gơsơ̆t jrơs, geh bun pal cit sơnơm rơcang sơndră mờ kòp, cit sơnơm dong kờl bun geh pràn”.

Broă lơh sơnơm dà lơgar tàm tiah làng bol kòn cau ală nam pa do neh geh lơh jăt mờ lơh geh cồng nha, làng bol ală kòn cau neh git tàm broă kham, sơm kòp, deh kòn tàm hìu sơnơm. Cồng nha do, dùl bơnah tài kơnờm mờ broă sền gròi sùm bơh bal mờ jơnau lam sồr bơh ală kấp ủy Đảng, gơnoar atbồ ală tiah tàm broă rơcang sơndră mờ kòp gơtờp, sền gàr, drơng gàr bơta pràn kơl dang să jan ai làng bol in. Tàm hơ̆ uă ngan là broă sền gàr bơta pràn kơl dang să jan ai làng bol kòn cau in sùm geh sền gròi tơnguh bơtàu bè broă lơh bal mờ phan bơna, phan lơh broă; bơta niam broă kham sơm kòp geh tam gơl niam; làng bol kòn cau geh tus bal mờ ală broă drơng ala sền gàr bơta pràn kơl dang să jan pa. 100% khà làng bol kòn cau kis tàm tiah kal ke, mpồl hìu rơƀah, hìu ndrờm mờ rơƀah geh pà sră ƀảo hiểm y tế.