Bơh bồ nam tus tŭ do, càr Dăk Lăk neh gŏ 9 nă cau gơtờp kòp Kovid-19, tàm 5 kơnhoàl mờ ƀòn dờng Buôn Ma Thuột. Jơh ală cau kòp ndrờm tàm bơta di mơ ờ jroă. Mơya gơwèt mờ jơnau yal bè broă gơtờp wơl bơh kòp Kovid-19 tàm ờ uă càr, gah lơh sơnơm càr Dăk Lăk neh rơcang sồr ală mpồl lơh broă gơwèt bal tơnguh broă jăt sền nền nòn bơta kòp gơlik geh. Ồng Lê Phúc, Phó kwang lam bồ Anih tờm gròi sền kòp tê jê să (CDC) càr Dăk Lăk pà git, mpồl lơh broă do neh pơgồp bal mờ Anih Lơh kloh bơta lơh gơtìp kòp tê jê să Tây Nguyên nàng mblàng yal bơta di gơlan lơh gơtìp kòp, sền wơl bơta lơh gơtờp kòp mờ lơh jăt ală gùng dà broă rơcang pleh mờ kòp di pal.

Ndrờm bal mờ hơ̆, Anih lơh broă do kung bơyai lơh bơsram tàp nàng tơnguh uă bơta pràn ai mpồl cau lơh sơnơm in bè broă iăt sền, gŏ gờñ cau gơtìp kòp Kovid-19, lùp sền mờ lơh kloh tiah geh gŏ kòp di mờ jơnau geh ai. “Bol añ geh jơnau pơlam, bơto sồr bè broă lơh kung bè pơlam ai Sờh in nàng sồr ală mpồl lơh broă rơcang lài, hìu sơnơm, tàm hơ̆ uă ngan bè hìu sơnơm den tơnguh broă sền nàng git kòp bal mờ rơcang lài ai broă lơh di pal gơwèt mờ kòp Kovid-19 di lah geh bơta gơguh. Geh ờ uă hìu sơm kòp kung neh lơh broă ờ uă anih tam cah is, tơnguh broă atbồ nàng tam dră mờ gơtờp tàm hìu sơnơm. Ală mpồl lơh broă rơcang gàr lài den tơnguh broă jăt sền cau kòp, lơh kloh ală tiah gơtờp kòp di lah geh”.

Rơcang lài kơrian kòp Kovid-19 gơtờp, Sờh Lơh sơnơm càr Kon Tum pơgồp bal mờ ală mpồl lơh broă gơrềng bal tơnguh ală broă yal tơngit, lam sồr làng bol lơh jăt niam ală gùng dà broă lơh bơh să tờm dê nàng rơcang pleh mờ kòp Kovid-19. Sền wơl, gàr tơl cau lơh broă, phan lơh broă, dà sơnơm, phan lơh sơnơm, cau lơh broă di pal mờ jơnau kờñ rơcang pleh mờ kòp gơtờp. Bal mờ hơ̆, gah lơh sơnơm càr Kon Tum kung rơcang jăt nền nền nòn bơta kòp gơtờp, tơnguh broă lơh jăt ală gùng dà broă rơcang kơrian kòp gơtờp tàm ală hìu sơnơm, mpồl bơtiàn bal mờ mpồng nhàr lơgar ală lơgar Bờ Y. Pơgồp bal nền nòn mờ Anih Lơh kloh kòp tê jê să Tây Nguyên mblàng yal bơta gơlik geh bal mờ sền nàng git broă di gơlan gơtờp kòp nàng geh jơnau sồr lơh, lơh jăt ală gùng dà broă rơcang kơrian mờ kòp gơtờp di pal.

Ƀák sìh Đỗ Ngọc Hoà, Phó Kwang lam bồ Sờh Lơh sơnơm càr Kon Tum pà git: “Bol añ sồr ală sờh, gah lơh broă, mpồl lơh broă tàm càr, Anih duh broă làng bol ală kơnhoàl, ƀòn dờng tơnguh broă rơcang kơrian mờ kòp Kovid-19 tàm ală tiah lòt nhơl, pơ-rài bồ tơngoh. Mờ tơnguh broă pơlam làng bol lơh jăt ală gùng dà broă lơh nàng rơcang kơrian lài bơh cau dùl nă să. Tŭ să tờm geh tơngŏ duh să, bơsiă, glar tă nhơm pal tus mơ hìu sơnơm rềp ngan nàng geh kham, sền gròi mờ sơm kòp di tŭ”.

Gơwèt mờ broă cih vaccine Kovid-19, jăt Phó Kwang lam bồ Sờh Lơh sơnơm càr Kon Tum yal, tŭ do, khà cau cit tơl vaccine tàm khà kờp làng bol càr dê geh di pơgăp 83%. Ƀák sìh Đỗ Ngọc Hoà bơto pơlam lài, di lah làng bol kờñ cit vaccine Kovid-19, gơtùi tus ală hìu sơnơm rềp ngan nàng dan cit. Bơh tŭ hơ̆, gah lơh sơnơm rơ̆p tơrgùm cau, dan mờ Anih Lơh kloh bơta kòp tê jê să Tây Nguyên nàng ai vaccine cit làng bol in. Bơh bồ nam 2025 tus tŭ do, tàm càr Kon Tum ờ hềt dờp geh cau lơi gơtòp kòp Kovid-19.

Sờh Lơh sơnơm càr Lâm Đồng neh sồr ală hìu kham, sơm kòp tàm càr do tơnguh broă kham, gŏ, sơm kòp cau gơtờp kòp Kovid-19 in. Sền wơl mờ tơrgùm broă sền nàhg git kòp, sơm kòp cau kòp Kovid-19 in tàm mpồl lơh broă jăt jơnau yal lài bè kòp gơtờp, bañ lời broă rơcang kơrian kòp ờ geh rơcang lài, gơtìp ni sơna. Rơcang lài phan bơna, tiah tam cah is, phan lơh sơnơm, phan lơh broă gah lơh sơnơm nàng bơyai lơh sền git kòp, tam cah is, sền git kòp, sơm kòp ai cau kòp in, gàr niam ai cau kòp gơwèt mpồl di gơlan lơh gơtờp uă (bè cau ùr geh bun, cau gơtìp kòp lài, kòp jroă, cau dờng sơnam…), tiah tơn pràn kòp, kòp plai nùs, gùng mhàm, kòp leh jồr mhàm, reh…

Lơh jăt nền nòn ală gùng dà broă kơrian kòp gơtờp, gàr niam broă sền gròi gơtờp vi khuẩn, tàm hơ̆ uă ngan là kòp gơtờp bơh gùng tă nhơm, tơrmù ờ uă ngan gơtờp kòp tàm hìu kham, sơm kòp. Tơnguh broă pơs wàs kloh niam tiah bơdìh, kloh niam nàng rơcang kơrian kòp, rơndăp tăp sèng gah sơm kòp ƀuơn, di pal mờ bơta kòp gơtờp mờ gàr niam tiah kis tơlir, kloh, niam.

Sờh Lơh sơnơm càr Lâm Đồng sồr Anih tờm Gròi sền kòp tê jê să càr lơh anih tờm tơnguh broă sền, jăt nền broă lơh jăt ală gùng dà kơrian kòp gơtờp tàm ală hìu sơnơm tàm càr. Sền wơl, tơrgùm broă rơndăp lơh, rơcang lài, tơl cau lơh broă, tơl phan lơh sơnơm, phan lơh broă, dà sơnơm nàng drơng tàm broă rơcang kơrian kòp gơtờp, nàng rơcang di pal mờ ală bơta gơlik geh bơh kòp gơtờp, bañ sền ờ sơ̆p tàm jơnau git wă bal mờ broă lơh, nàng lơh jăt niam kơnòl broă lơh sơnơm.