Ală ngai do, tàm ală sơnah ƀòn Khánh Xuân, Thành Nhất, Tân Hoà mờ xã Hoà Thuận, mpồl lơh sơnơm ƀòn dờng Buôn Ma Thuột, càr Dăk Lăk gam lơh ngan nàng ƀồm sơnơm gơsơ̆t sơmăc kơrian broă gơtờp bơh kòp mprơm gơlik mhàm tàm ƀòn dờng do dê.

Gam bal mờ ală kwang bàng lơh sơnơm ƀồm sơnơm tàm tiah pa gơtìp kòp tàm sơnah ƀòn Thành Nhất, lŏ Đỗ Thục Vi, drơng broă rơcang kơrian kòp gơtờp bơh Hìu sơnơm sơnah ƀòn Thành Nhất pà git, broă làng bol ờ lơh jăt mờ jơnau geh ai bè rơcang kơrian kòp mprơm gơlik mhàm là bơta tờm lơh gơlik geh tiah gơtìp kòp. Lŏ Đỗ Thục Vi pà git: “Bơh hìu nhă cau gơtìp kòp mprơm gơlik mhàm do den gŏ là, làng bol git wă ờ uă ngan bè broă lơh kloh niam tiah kis gùt dar. Añ neh pơgồp bal mờ mpồl lơh sơnơm tàm sơnah ƀòn tus bơto sồr lơh kloh niam tiah kis, pơs wàs hìu đam, tàm hơ̆ uă ngan tàm kàl mìu, do là kàl ƀuơn ngan gơtìp kòp mprơm gơlik mhàm uă ngan”.

Tiah gơtìp kòp mprơm gơlik mhàm do geh gŏ tàm ngai 19 nhai 6 lài do tàm hìu lŏ Lê Thị Thuận, tàm gùng Nguyễn Phúc Chu, sơnah ƀòn Thành Nhất mờ 03 nă cau tàm hìu gơtìp kòp. Jăt jơnau bơh lŏ Thuận yal, 03 nă mè mờ kòn lŏ pơn jăt tơn geh tơngŏ duh să uă, sơm is kòp tàm hìu ờ bài den tàng neh tus piam tàm hìu sơnơm. Lŏ Lê Thị Thuận pà git tai: “Jơh ală cau pal mŭt piam tàm hìu sơnơm, ƀăk sĩ sền mhàm đơs là gơtìp kòp mprơm gơlik mhàm. Kòp do ngòt rơngơ̆t ngan tài duh să uă, mờ gam gơlik mhàm tàm dơlam să tai. Tơnơ̆ mờ tŭ bời kòp rê tàm hìu añ pal pơs wàs kloh niam hìu đam, tiah lơi geh dà den pal sơklŭp wơl nàng bañ lời kờn dà mờ bañ geh sơmăc deh tăp”.

Là dùl tàm pe tiah geh gŏ khà cau gơtìp kòp mprơm gơlik mhàm uă ngan tàm càr Dăk Lăk dê, mờ 84 nă cau, Hìu sơnơm ƀòn dờng Buôn Ma Thuột gam đơng lam Hìu sơnơm xã, sơnah ƀòn bơsong nền nòn ală ală tiah gơtìp kòp nàng bañ lời kòp gơtờp tàm uă tiah. Mờ tơnguh broă sền gròi, jăt sền nền nòn bơta kòp gơlik geh, tơrgùm tàm ală tiah neh geh kòp lài, di gơlan gơtờp kòp tai nàng gŏ gờñ ală cau lơi pa gơtìp. Jăt ồng Võ Minh Hùng, Kwang atbồ hìu sơnơm ƀòn dờng Buôn Ma Thuột đơs, kòp mprơm gơlik mhàm gam geh tơngŏ kal ke, khà cau gơtìp kòp mprơm gơlik mhàm tàm nhai 06 geh rơlao 50% bơh bồ nam tus tŭ do. Pal kah ngan, neh gŏ 02 tiah gơtìp kòp tàm sơnah ƀòn Thành Nhất mờ sơnah ƀòn Khánh Xuân. Ồng Võ Minh Hùng pà git: “Tus tŭ do tàm ƀòn dờng den jơh ală xã, sơnah ƀòn neh lik pơs wàs kloh niam tiah kis mờ Hìu sơnơm neh lơh broă rơndăp lơh nàng ƀồm rơcang lài ai 02 xã, sơnah ƀòn geh khà cau gơtìp kòp mprơm gơlik mhàm tàm 03 nam do uă là xã Hoà Thuận mờ sơnah ƀòn Tân Hoà, bol añ lơh bơh poh lài mờ geh tơn jơh tàm poh do”.

Jăt jơnau yal bơh Anih sền gròi kòp tê jê să càr Dăk Lăk yal, tus ngai lồi nhai 06, gùt càr neh gŏ 408 nă cau gơtìp kòp mprơm gơlik mhàm. Kòp gơlik geh jơh 15 tàm 15 kơnhoàl, thị xã mờ ƀòn dờng. Ồng Hoàng Hải Phúc, Kwang atbồ Anih tờm sền gròi kòp tê jê să càr Dăk Lăk pà git, broă rơcang kơrian kòp mprơm gơlik mhàm gam geh gah lơh sơnơm mhar lơh. Ồng Hoàng Hải Phúc đơs: “Sở Y tế sồr Anih Tờm sền gròi kòp tê jê să càr pal tơnguh jơnau yal tàm ngai dơ̆ pram pah poh. Mờ sồr Hìu sơnơm dờng tiah Tây Nguyên bal mờ ală Hìu sơnơm tàm càr pal yal bè bơta kòp tàm ngai dơ̆ pram pah poh làng ală ƀák sĩ in git bè broă sền nàng git mờ sơm kòp mprơm gơlik mhàm pa ngan. Mờ bol añ neh tơnguh jơnau yal tơngit nàng mbàng yal làng bol in ơm sa kloh niam, mus pès chi che rŭ rơm, kloh niam tiah kis, pơa wàs hìu đam pah ngai mờ tŭ geh tơngŏ duh să pal tus mơ hờ hìu sơnơm”.

Tàm càr Gia Lai, Anih tờm sền gròi kòp tê jê să càr do pà git, kòp mprơm gơlik mhàm neh gơtờp tàm jơh 17 kơnhoàl, thị xã mờ ƀòn dờng, mờ mờr 600 nă cau gơtìp kòp. Ală tiah geh cau gơtìp kòp uă là ƀòn dờng Pleiku, ală kơnhoàl, Krông Pa, Kông Chro, Đăk Pơ. Bơh bồ nam tus tŭ do, càr Gia Lai neh dờp geh 312 tiah gơtìp kòp, tàm hơ̆ geh 35 tiah ờ hềt geh kơrian. Jăt gah lơh sơnơm càr Gia Lai yal, ală cau gơtìp kòp mprơm gơlik mhàm gơguh bơh nhai 05 mờ jŏ tus tŭ do tài tàm kàl mìu là tŭ niam mờ ƀuơn ai sơmăc in deh mờ geh uă.

Kòp mprơm gơlik mhàm rơ̆p pơn jăt tai gơguh mờ geh tơngŏ gơtìp kal ke tàm tơngai tus di lah khà mìu geh uă, trồ tiah sùh iò, là tiah ƀuơn nàng kih dà deh uă. Ồng Nguyễn Văn Đồng, Phó Kwang atbồ Anih tờm gròi sền kòp tê jê să càr Gia Lai pà git: “Anih do pơgồp bal mờ ală kơnhoàl nàng tơnguh broă ƀồm sơnơm, tram phan nàng rơcang kơrian kòp mprơm gơlik mhàm. Pơgồp bal mờ hìu sơnơm kơnhoàl lơh jăt broă sơm kòp, atbồ cau kòp. Bơto sồr làng bol, tàm hơ̆ uă ngan là tàm ală xã gơtìp kòp lơh kloh tiah kis nàng tơmù kih dà bơh sơmăc deh”.

Tây Nguyên gam mŭt tàm kàl mìu, kàl ƀuơn ai kòp mprơm gơlik mhàm gơguh uă mờ di gơlan lơh gơtờp kòp tus tàm uă tiah. Nàng sền gròi kòp mprơm gơlik mhàm, bal mờ broă tus bal bơh ală gah, mpồl lơh broă geh gơnoar, tơl nă làng bol pal tơnguh uă jơnau git wă tàm broă rơcang is kơrian kòp. Lài jơh là mus kơl chi che jăt gah hìu, pơs wàs kloh niam hìu đam, dơ̆p kơ̆ ală phan đơ dà, sơklŭp ală bơta kờn dà nàng tơmù uă ngan sơmăc deh tăp mờ gơs kih dà.