Gam sơm kòp jê pròc ràm tài gơrềng bơh kòp đồm sơdàng tàm khoa Nội Hìu sơnơm kơnhoàl Krông Búk, lŏ H’ Pốc M’Jao, kis tàm ƀòn Adrơng Prong, xã Cư̆ Pơng pà git, do là dơ̆ bàr tàm nam do lŏ pal piam tàm hìu sơnơm. Jơh bàr dơ̆ lŏ ndrờm gơlơh iang nùs ngan tŭ geh ală y, ƀák sĩ tàm hìu sơnơm do jơh nùs sền gàr: “Ƀák sĩ sền gròi ngan tus mờ cau kòp. Sơm kòp tàm do ờ pal kơlôi rơcang uă ir. Tŭ do añ neh pràn kơl dang wơl uă ngan”.

Tềng gah jơnờng piam kòp bơh lŏ H’ Pốc dê, bi Y Thế Niê, kis tàm ƀòn Ea Brơ, xã Cư̆ Pơng, kơnhoàl Krông Búk gam sơm kòp as sồt klờm soh. Bi gơtìp kòp neh mờr 1 nhai, lài ngan tus piam kòp tàm hìu sơnơm thị xã Buôn Hồ, hơ̆ sồng dan rê piam kòp tai tàm hìu sơnơm kơnhoàl Krông Búk. Tơnơ̆ mờ 4 ngai sơm kòp, bơta kòp tê jê să bơh bi dê neh gơmù loh làng ngan. “Tàm do den kloh niam, ƀák sĩ sền gàr cau kòp nền nòn ngan, sơnơm geh tơl rơlao mờ tŭ ơm piam kòp tàm hìu sơnơm thị xã Buôn Hồ. Tŭ do añ neh pràn kơl dang wơl, di gơlan tàm 2, 3 ngai tai geh rê”.

Jăt ƀák sĩ Y Păm Ayun, Atbồ khoa Nội, hìu sơnơm kơnhoàl Krông Búk yal, 2 nhai pa do, tŭ Hìu sơnơm neh lơh gơs broă blơi sơnơm, khà cau kòp tus tàm khoa nàng piam kòp gơguh ni sơna, geh ngai gơguh gal ìr cau: “Bơh nhai 4 tus nhai 7 den ờ tơl sơnơm, geh gal cau kòp lòt kham ờ geh sơnơm den lòt tus tàm tiah ndai. Mơya bơh nhai 9 nhai 10 sơnơm geh tơl den cau kòp tus gal ngan. Di lah pơn drờm mờ khà geh ai bơh tàm bồ nam mờ bơta pràn bơh Sở Y tế jào den pa do geh ờ uă ngai ni sơna cau kòp tus gơguh gal ngan. Bè ờs mìng geh ai 25 jơnờng piam kòp mơ, mơya geh ngai dờp geh bơh 27 tus 28 jơnờng”.

Tàm tiah hờ đah tô càr Dăk Lăk, pah ngai, Hìu sơnơm kơnhoàl Krông Búk dờp mờ sơm kòp geh di pơgăp 5 rơbô 700 nă cau kòp. Tàm dơ̆ gơtìp kòp Kovid-19 lơh aniai, Hìu sơnơm geh ngui nàng sơm ai rơlao 3 rơbô 500 nă cau kòp Kovid-19 tus bơh ală kơnhoàl Krông Búk, thị xã Buôn Hồ, kơnhoàl Krông Năng mờ Ea H’ Leo. Tơnơ̆ mờ kòp Kovid-19, kung ndrờm bè ală hìu sơnơm ndai tàm càr dê, Hìu sơnơm lơh broă gơtìp uă ngan kal ke tài ờ tơl sơnơm mờ phan lơh broă gah lơh sơnơm. Mơya, mờ ală broă lơh ngan sùm, nhai 9 lài do, kơnhoàl Krông Búk neh lơh geh cồng nha ală dơ̆ blơi sơnơm, là dùl tàm ờ uă hìu sơnơm tàm càr Dăk Lăk bơsong kal ke gơtùi broă ờ tơl sơnơm mờ phan lơh broă gah lơh sơnơm drơng broă kham mờ sơm kòp.

Ồng Trần Thuận, Kwang atbồ Hìu sơnơm kơnhoàl Krông Búk pà git: “Hìu sơnơm kung neh ai geh dùl broă rơndăp lơh, lài ngan là lơh niam wơl mpồl kwang bàng lơh broă, dơ̆ bàr tai là lơh bè lơi den lơh pal tơl sơnơm, phan lơh broă gah lơh sơnơm nàng drơng ai làng bol in, dơ̆ pe tai là lơh broă bal mờ hìu sơnơm geh ală mpồl ntrờn lòt tus tàm ƀòn lơgar lơh broă mờ ală xã, thôn, ƀòn den tàm tiah ƀòn hơ̆ geh pơgồp bal yal là hìu sơnơm he neh tơl ală bơta niam nàng drơng gàr bơta pràn kơl dang să jan tàm kơnhoàl in, den làng bol geh tus hờ hìu sơnơm gal rơlao”.

Mờ broă lơh ngan, tơmù ală kal ke bơh mpồl kwang bàng y ƀák sĩ lơh broă, ală nam do, bơta niam broă kham, sơm kòp bơh Hìu sơnơm kơnhoàl Krông Búk dê ngai sơlơ geh gơguh niam loh làng ngan, khà cau kòp pal ntrờn hìu sơnơm neh gơmù, cau kòp tus piam kòp ngai sơlơ gal. Hìu sơnơm di pal ngan là anih kơl dìng kơl jăp tàm broă sền gàr bơta pràn kơl dang să jan ai làng bol ală kòn cau kis tàm kơnhoàl do in.