Mpồl sồr lơh ală gah lơh broă Dà lơgar neh lơh geh 5 mpồl ală gah lơh broă tơrgùm tàm broă tơnguh broă lòt sền, sền gròi ală gah lơh broă bơh dà lơgar tus kấp sàh geh lơh sùm di tàm Satềp nam pa Ất Tỵ mờ kàl lơh chờ nam Pa 2025. Mờ sồr tàm ală tiah, bơyai lơh geh ală mpồl lòt sền, sền gròi ală gah lơh broă ală kấp, bơh kấp càr tus kấp sàh. Hòi jà uă ngan ală gah yal tơngit yal ală jơnau geh ai tàm adăt boh lam dê bè kloh niam phan sa kung bè ală jơnau git wă tàm broă rơwah, prăp gàr, lơh mờ tăc phan sa tus mờ làng bol. Jăt Ƀộ Broă lơh sa suơn sre mờ Bơtàu tơnguh Ƀòn lơgar yal, tàm Satềp là tŭ broă kờñ tăc phan sa phan ngui, tàm hơ̆ uă ngan là phan geh lơh bơh poăc phan ròng gơguh uă, Ƀộ do neh pơgồp bal mờ ală anih lơh broă geh gơnoar nàng lơh geh 9 mpồl lơh broă lòt sền, atbồ hìu gơsơ̆t phan ròng, sền kloh niam broă lơh sơnơm phan ròng tàm 17 càr, ƀòn dờng, tàm hơ̆ uă ngan là sền nền nòn broă blơi phan bơh lơgar bơdìh, tàm hơ̆, sền kwơ 3 mpồl broă bè kòp gơtờp, kloh niam phan sa mờ jòi anih lơh gơs.

Ồng Tống Xuân Chinh, Phó Lam bồ bồ Kụk ròng phan gơwèt Ƀộ Broă lơh sa mờ Bơtàu tơnguh Ƀòn lơgar pà git: "Mờ kờp jơh mpồl phan ròng tŭ do den bol añ đơs là gơtùi geh tơl phan sa geh lơh bơh poăc phan ròng, tăp, dà toh ai broă tăc tàm lồi nam in, di tàm dơ̆ lơh chờ satềp, tàm hơ̆ is ồn ngan là tàm satềp nam pa. Jăt mờ hơ̆, Ƀộ Broă lơh sa mờ Bơtàu tơnguh Ƀòn lơgar sồr ală càr, ƀòn dờng sồr ală anih lơh broă tờm, gơnoar atbồ ală kấp pơgồp bal mblàng yal ală jơnau geh ai tàm adăt boh lam bè kloh niam phan sa, bơta aniai mờ bơta hoàc huơr bơh broă ngui phan kơrian, ờ ai ngui, bơdìh mờ khà măt phan geh ai ngui tàm broă lơh sa, tơnhào, prăp gàr, lơh ing, lơh gơs phan sa bơh phan geh lơh bơh broă lơh sa suơn sre, brê bơnơm mờ phan tàm dà dê”.

Mùl màl tàm Càr lơgar Hà Nội, Mpồl Sồr lơh sồ 389 ƀòn dờng Hà Nội pà git, neh gờñ ai geh broă rơndăp lơh lik lơh broă gàr kloh niam phan sa drơng Satềp nam pa Ất Tỵ mờ Lơh chờ nam pa 2025. Anih duh broă ƀòn dờng Hà Nội lơh geh 4 mpồl lòt sền ală gah lơh broă lòt sền kloh niam phan sa kấp ƀòn dờng. Bơta tờm sền tơrgùm tàm ală hìu lơh, hìu kă bro, hìu blơi phan bơh lơgar bơdìh ală bơta phan sa, geh ngui uă tàm Satềp mờ jơh kàl lơh chờ. Tàm kấp kơnhoàl, ƀòn drà dềt, rơ̆p lơh geh ală mpồl lòt sền broă lơh jăt gàr kloh niam phan sa drơng tàm ală dơ̆ lơh chờ, satềp tàm ală sàh, sơnah ƀòn, ƀòn drà dềt. Ồng Đoàn Thanh Phong, Lam bồ Kụk kloh niam phan sa ƀòn dờng Hà Nội pà git: “Gơwèt mờ tơngu me là pơn jăt tai gàr kloh niam phan sa tàm bơta pa, tàm hơ̆ uă ngan tàm satềp mờ lơh chờ den Mpồl lòt sền ală gah lơh broă lòt sền tơn tus tàm ală hìu kă bro, hìu lơh phan sa mờ bơh broă tus sền den di lah geh gŏ ală hìu gơtìp tìs bè kloh niam phan sa den bol añ lơh glài mờ sồr ală hìu kă bro nền nòn lơh jăt bal. Gam gơwèt mờ ală hìu lơh sa kă bro phan sa mờ gam lơh jăt nền nòn den bol añ kung pơn jăt tai sồr ală hìu do pơn jăt tai đờm jăt nùs nhơm do sơl”.

Lơh jăt nền nòn broă atbồ drà kă bro phan drơng tàm broă kờñ ngui sa di Satềp mờ jơh kàl lơh chờ, mpồl Atbồ drà kă bro gùt lơgar lơh jăt bơh gờñ Broă rơndăp lơh lik lơh broă uă nàng tam dră mờ kă bro blơ̆ blăc kă bro phan mờ phan ờ ngan Satềp nam pa Ất Tỵ 2025; tơnguh broă sền, sền gròi drà kă bro mờ lơh glài nền nòn ală broă lơh tìs prăp phan, lir priă tăc, kă bro phan điện tử, kă bro, pơn diang, prăp phan kơrian, phan blơi bơh lơgar bơdìh ờ di mờ adăt boh lam, phan ờ git loh anih lơh gơs, phan ờ ngan, phan sơgràm gơnoar ngui bơta ngăc ngar, phan ờ niam, sền kwơ ală bơta phan tờm, phan geh broă kờñ ngui uă tàm lồi nam mờ Satềp. Tơnguh broă lùp sền, sền gròi, sền bơta kloh niam phan sa tàm ală broă lơh, broă lơh gơs phan tus mờ broă tăc phan; lơh ngan tam dră, kơrian mờ lơh glài nền nòn ală cau dùl nă să, mpồl lơh broă, hìu lơh phan, kă bro phan tìs mờ jơnau geh ai bè kloh niam phan sa.

Ồng Nguyễn Quang Huy, Phó Lam bồ Vụ Tàm bơrlŭ bal, broă rơndăp lơh priă jền, Kụk dờng atbồ drà kă bro gơwèt Ƀộ Lơh sa măi mok mờ kă bro phan pà git: mpồl atbồ drà kă bro rơ̆p pơgồp bal nền nòn mờ ală anih lơh broă geh gơnoar bal mờ gơnoar atbồ ƀòn lơgar nàng lơh jăt nền nòn broă sền phan kă bro bơh mpồng nhàr dà lơgar mŭt tàm drà kă bro tàm dơlam lơgar. “Gơwèt mờ đah phan sa tàm tiah rềp nhàr lơgar den mpồl atbồ drà kă bro pơgồp bal nền nòn mờ ală mpồl lơh broă geh gơnoar tềng mpồng nhàr lơgar bơyai lơh sền gròi nàng kơrian phan kă bro, phan jơi poan nơm jơng, sur iar blơi bơh lơgar bơdìh mŭt tàm tiah nhàr lơgar jăt gùng ù gờl, anih ơhò ơm dà lềng, ƀlàng rơndeh par pơn diang mŭt tàm drà kă bro dơlam dà lơgar nàng tăc. Tàm drà kă bro tàm dơlam lơgar, mpồl lơh broă atbồ drà kă bro tơrgùm sền phan kă bro tàm ală drà dờng, drà blơi phan bơh tàm ală tiah, drà mìng tăc phan, drà làng bol lơh gơs… sền kwơ tàm broă lir priă tăc, tăc mờ priă neh geh lir… Pơn jăt tai lơh pràn broă tam dră mờ kă bro blơ̆ blăc phan kă bro mờ phan ờ ngan tàm internet, tàm hơ̆ uă ngan là tàm internet mpồl bơtiàn”.

Lơh jăt nền nòn broă atbồ kloh niam phan sa di tàm Satềp nam pa Ất Tỵ 2025 mờ kàl lơh chờ 2025, gơnoar broă lơh ală tiah kwơ màng ngan. Tàm hơ̆ uă ngan ală hìu lơh, hìu kă bro phan sa geh lơh bơh broă lơh sa suơn sre di gơlan gơtìp uă, lơh ờ kloh niam tàm phan sa, broă kờñ ngui sa geh uă tàm dơ̆ lơh chờ, satềp làng bol dê. Ală tìs bè kloh niam phan sa geh gŏ pal lơh glài nền nòn, tơl niam broă kơrian mờ loh làng tàm anih yal tơngit di jăt jơnau geh ai tàm adăt boh lam dê. Tơl nă làng bol kung pal là cau ngui sa ngăc ngar nàng gàr niam bơta pràn kơl dang să jan ai să tờm mờ cau tàm hìu nhă in, nàng bal mờ dà lơgar dờp dùl nam pa geh bơta chờ uă.