Mìng tàm 2 nhai bồ nam 2024, kơnhoàl Krông Păc neh gŏ geh 3 nă cau gơtìp chơ̆t tài kòp sơnrang, là kơnhoàl geh khà cau gơtìp kòp sơnrang uă ngan càr Dăk Lăk dê. Ồng Y Doãn Niê, Phí Củ tịc UɃÑZ kơnhoàl Krông Păc yal, broă rơcang kơrian kòp sơnrang bơh kơnhoàl dê gơtìp uă ngan kal ke tài uă hìu ròng so mèo ờ lơh broă bal mờ anih lơh broă geh gơnoar tàm broă rơcang lài kơrian kòp: “Làng bol ròng so mèo tàm kơnhoàl mìng ting lềng so mèo tàm suơn, mìr, kwang bàng lơh sơnơm uă dơ̆ tus cit rơcang lài kơrian kòp mơya hìu nhă ờ gơtùi kŭp mờ lời nàng bañ geh cit vaccine”.

Tàm ƀòn dờng Buôn Ma Thuột ha là tàm ală tiah lơi tàm càr Dăk Lăk bơh tiah ƀòn lơgar tus tàm thị trấn, tiah drà ndrờm geh sền gŏ so lòt tàm gùng. Bơta do gơtìp uă ngan rềs àr gơwèt mờ cau lòt gùng. Lŏ Trịnh Thị Hồng Hạnh, kis tàm sơnah ƀòn Tân Lợi, ƀòn dờng Buôn Ma Thuột ngòt rơngơ̆t ngan tài neh geh tŭ gơtìp so kăp. Lŏ Trịnh Thị Hồng Hạnh pà git: “Pơgăp mờ do tàm dùl poh añ lòt drà, gam lòt den ni sơna bơh tàm gùng pòt geh dùl nơm so ntoăt tus. Uih yơ, tŭ hơ̆ añ ngòt ngan mờ broă añ kờñ lơh sơnrờp ngan là ntoăt dô, mơya tŭ añ sơlơ ntoăt dô, so sơlơ ting jăt mờ iơh bơsăk ngan rơlao. Sền gŏ so ting lềng là añ ngòt rơngơ̆t ngan”

Pah nam, càr Dăk Lăk geh di pơgăp 6 rơbô nă cau gơtìp so, mèo kăp pal tus sơm rơcang lài kơrian lài kòp. Mìng is bơh bồ nam tus tŭ do, càr geh 4 nă cau gơtìp chơ̆t tài kòp sơnrang.

Ồng Đỗ Xuân Dũng, Phó Kwang atbồ Sở Nông nghiệp mờ Phát triển Nông thôn càr Dăk Lăk pà git, bơta gơlik geh tờm ngan bơh kòp sơnrang gơguh là tài ờ hềt atbồ geh mpồl so, mèo; Khà cit vaccine rơcang lài kơrian kòp sơnrang gam ờ uă, mìng geh 37%. Bơta ndai tai, broă ngui ală broă lơh glài kơh tìs jơnau sền bè atbồ so ròng, cit vaccine kòp sơnrang ai so, mèo in ờ hềt nền nòn. Ồng Đỗ Xuân Dũng pà git: “Bơh lài tus tŭ do ờ hềt geh mpồl lơh broă, cau dùl nă să lơi lơh glài broă lời so mèo kăp cau. Adăt boh lam den neh geh mơya he ờ hềt ngui. Bơdìh hơ̆ tai broă mblàng yal uă bè broă rơcang lài kơrian kòp sơnrang den pal geh lơh nền nòn broă lơh glài tìs. Ală cau lơi ròng so mèo ờ lơh di mờ jơnau geh ai tàm adăt boh lam mờ lơh gơtìp kăp cau uă den anih lơh broă geh gơnoar gơtùi lơh glài nền nòn gơwèt mờ cau tờm ròng di jăt mờ jơnau neh geh ai”.

Jăt ồng Nguyễn Thiên Văn, Phó Củ tịc UɃÑZ càr Dăk Lăk pà git, nàng tơmù bơta di gơlan gơtìp kòp sơnrang kung bè gơmù khà cau chơ̆t tài kòp sơnrang, ală gah, mpồl lơh broă geh gơnoar bal mờ gơnoar atbồ pal tơrgùm jơh ală bơta pràn nàng lơh jăt nền nòn ală broă rơndăp lơh rơcang lài kơrian kòp sơnrang mờ càr neh geh ai. Tàm hơ̆, pal tơnguh broă atbồ mpồl so, tơnguh uă khà cit vaccine rơcang lài kơrian kòp sơnrang. Ồng Nguyễn Thiên Văn đơs là, jơnau git wă mờ tus bal bơh mpồl bơtiàn dê là bơta tờm ngan ai broă lơh geh cồng nha tàm broă rơcang lài kơrian kòp sơnrang. Ồng Nguyễn Thiên Văn pà git: “Ală tiah sền gròi mblàng yal, lam lơh tàm mpồl bơtiàn ƀòn ơm kis nàng tơnguh uă jơnau git wă bơh làng bol dê bè bơta ngòt rơngơ̆t bơh kòp sơnrang gơwèt mờ kòn bơnus. Cau ròng so, mèo pal cit vaccine rơcang kơrian kòp sơnrang ai so, mèo in. Tŭ gơtìp so, mèo kăp pal rơcang tus anih lơh broă gah lơh sơnơm nàng kham, sơm kòp di tŭ”.

Càr Dăk Lăk gam tàm tơngai prang dờng bơh kàl prang dê, là bơta ƀuơn nàng kòp sơnrang tàm so, mèo gơlik geh, lơh gơtìp ngòt rơngơ̆t tus mờ màng kis kòn bơnus. Den tàng, bal mờ broă tus bal pràn kơl dang bơh ală anih lơh broă geh gơnoar, làng bol pal tơnguh uă jơnau git wă tàm broă rơcang lài kơrian kòp nàng tơmù mờ kơrian geh cồng nha kòp sơnrang.