Gam sền gàr kòn gơtìp kòp tàm Khoa Kham-Hồi sứk kấp kứu, Hìu sơnơm Kòp sơnrang càr Dăk Lăk, lŏ H’ Loanh Niê kis tàm xã Cư̆ Dliê Mnông, kơnhoàl Cư̆ Mgar pà git, kòn lŏ gơtìp kòp ờ niam tơngoh bơh dềt, kơnờm mờ hùc sơnơm di pal den tàng bơta kòp bơh kòn lŏ dê geh niam. Mơya, ală ngai pa do, trồ tơngai duh jŏ, lơh kòp bơh kòn lŏ dê gơtìp jroă, sùm gơtìp rơtơs jơng tê mờ ờ kah. Lŏ H’ Loanh Niê pà git: “Bè ờs di lah ờ hùc sơnơm là gơtìp mơ. Dơ̆ do hùc sơnơm sùm mơya kung gam gơtìp, di gơlan tài trồ tiah prang duh. Dùl ngai gơtìp rơtơs jơng tê dùl dơ̆ den ai hùc sơnơm, mờ kung ờ gơmù sơl, gŏ bơh pe tus poan dơ̆ den tàng cèng mŭt piam tàm hìu sơnơm”.

Ơm bal dùl jơdŭ kòp mờ kòn lŏ H’ Loanh là cau kòp Nguyễn Đức Lĩnh, deh nam 2000, tàm xã Trung Hoà, kơnhoàl Cư̆ Kiuñ. Jăt mò Nguyễn Thị Quỳ, mẹ cau kòp do dê pà git, pơgăp mờ do 5 nam, tài glar ir mờ broă lơh, bi Lĩnh gơtìp ờ niam tơngoh mờ neh geh sơm kòp. Tàm ală nam pa do, bi Lĩnh ơm kis mờ lơh broă bè ờs. Pơgăp mờ do 2 nhai, bi Lĩnh ờ hùc sơnơm di jăt jơnau bơto sồr bơh ƀák sĩ dê, bal mờ trồ tơngai duh neh lơh kòp gơtìp wơl mờ pal cèng tus hờ hìu sơnơm nàng sơm kòp. Mò Nguyễn Thị Quỳ pà git: “Trồ tiah prang tơngai duh ir den kòn añ gơtìp nrơ̆t bàr pe dơ̆, bơta bic ờ kah uă rơlao. Añ cèng mŭt piam kòp tàm hìu sơnơm, gŏ ƀák sĩ cit sơnơm nàng kòn añ in, kòn añ bic dùl rơngal den tŭ do kung ờ hềt kah sơl mờ kung gam bic sùm”.

Jăt jơnau kờp bơh Khoa Kham-Hồi sứk kấp kứu, Hìu sơnơm Kòp sơnrang càr Dăk Lăk yal, bơh nhai 3 tus tŭ do, pah ngai, Khoa do dờp kham rơlao 100 nă cau, gơguh di pơgăp 20% pơn drờm mờ lài, khà cau kòp mŭt piam kòp kung gơguh. Ƀák sĩ Nguyễn Thị Bé, Kwang atbồ Khoa Kham-Hồi sứk kấp kứu, Hìu sơnơm Kòp sơnrang càr Dăk Lăk pà git, ală cau kòp gơtìp kòp tàm tŭ do mìng là gơtìp kòp tàm tơngoh, kơrwài, ês sơ-ềl, ờ git bơta lơi… Uă cau kòp mŭt piam kòp tàm bơta ờ kah tai, lơh pờng chi che, nggà…

Geh bơta gơguh khà cau kòp do geh uă, tàm hơ̆ tài trồ tiah tam gơl, trồ tơngai duh jŏ là bơta tờm lơh gơrềng tus mờ kòp tàm tơngoh, bơta pràn kơl dang să jan ală cau, tàm hơ̆ uă ngan là ală cau lơh broă gơtìp kal ke, cau kran neh geh kòp lài, cau ùr tơnơ̆ mờ tŭ deh kòn… Nàng tơmù bơta gơtìp wơl kòp tàm cau gơtìp kòp ờ niam tơngoh, tàm tơngai do, cau tàm hìu pal sùm sền gròi tus cau kòp. Tŭ gŏ ală bơta tơngŏ bè sào sa ờ gơbài, ờ lơhă bĭc, ês sơ-ềl, ờ kah bơta lơi den cau tàm hìu pal cèng cau kòp tus hờ hìu sơnơm nàng sơm kòp gờñ, pleh mờ bơta gơtìp jroă den lơh gơtìp ngòt rơngơ̆t ngan. Ƀák sĩ Nguyễn Thị Bé bơto bè do: “Tềng đăp mờ bơta trồ prang duh bè tŭ do, den bơto sồr ală cau kòp pal hùc sơnơm tơl, ndrờm bal, di mờ jơnau bơto sồr bơh ƀák sĩ dê. Tàm tơngai do tơnguh hùc uă dà nàng tơlik sơnơm tàm mhàm lik bơdìh. Mờ ală cau kòp lòt lơh broă gơtùi den pleh mờ ală tŭ trồ tơngai duh ir, bañ ai să jan ơm tàm tiah trồ tơngai duh”.