Tơnơ̆ mờ tŭ sào mho, mò Phạm Thị Dự (tàm càr Hưng Yên) gŏ jê bồ, gơdan hă, jê tềng măt. Rơlao dùl mang, ală bơta tơngŏ bơh mò dê sơlơ jroă ngan, jê măt ngai sơlơ uă, den tàng mò geh cau tàm hìu cèng tus Hìu sơnơm Măt Dà lơgar nàng kham. Tơnơ̆ mờ tŭ ală ƀák sìh kham, mò Dự ni sơna git să tờm gơtìp kòp Glôcôm (mờng hòi là kòp thiên đầu thống, ha là kòp gơguh klồng măt): “Añ mìng kơlôi là gơtìp kòp nggù gời gơdê, gơmŭt tàm dơlam, ờ kơlôi là gơtìp kòp thiên đầu thống. Gơlơh bè bơcah gar măt, jê bồ ngan, kơrwài, hơ̆ sồng jê tàm măt, jê ờ gơtùi ơ̆t tơn, hùc sơnơm kung ờ gơmù sơl. Ală ƀák sìh sồr sơm mờ lazer mờ rê hùc sơnơm, sền gròi tàm 2 poh. Mơya tơnơ̆ 2 poh sơm, lòt kham tai, kòp măt añ kung ờ bời sơl den tàng ƀák sìh neh sồr reh”.

Bal mờ bơta tơngŏ jê bồ, jê măt bè mò Dự, cau kòp gam kơnòm să Đỗ Thị Lan Hương (tàm ƀòn dờng Hải Phòng) kung gơlơh moăt ngan tŭ gơtìp kòp Glôcôm. Lài mờ hơ̆, lŏ Hương kung ờ hềt tŭ lơi gơtìp kòp bè măt, bơdìh mờ sền ngài ờ loh, geh tŭ măt jê di mơ mơya mìng tơngŏ bè ờs mờ bời is: “Mùl màl tàm tơngai sơnrờp añ moăt ngan, mờng kơlôi geh jơnau ờ niam, ală tŭ tơnơ̆ kham mờ ală ƀák sìh tàm do hơ̆ sồng nùs nhơm añ gơlơh niam rơlao. Lài jơh tàm tơngai jal mhar añ geh sơm mờ sơnơm hùc pơgồp bal, sền gròi sùm pah poh, pah nhai cau kòp in, mơya là kòp jroă gơguh jăt tơngai den tàng ờ gơtùi bời, tơnơ̆ mờ hơ̆ klồng măt añ ờ niam ngan den tàng geh jơnau sồr reh”.

Jăt ală ƀák sìh đơs, kòp Glôcôm là dùl bơta kòp geh tơngu me tài gơguh klồng măt, lơh sồt che tơngoh măt den tàng lơh gơmù măt sền mờ jơngo măt. Kòp Glôcôm kung là kòp mờng lơh gơtìp jơngo măt mìng tơnơ̆ mờ tŭ gơtìp jù tềng kòn măt. Di lah ờ gŏ mờ sơm kòp gờñ, bơta loh măt sền bơh cau kòp rơ̆p rơhời gơmù mờ lơh gơtìp ờ loh măt tơn mờ ờ gơtùi sơm. Ƀák sìh Nguyễn Thị Thanh Hương, lơh broă tàm gah Glôcôm, Hìu sơnơm Măt Dà lơgar pà git, nàng gŏ gờñ mờ sền gròi kòp Glôcôm, mìng mờ broă lòt kham mờ geh rơwah kòp: “Lài ngan là ală cau geh cau pròc mhàm tàm hìu nhă măt gơtìp kòp do; ală cau gơtìp kòp bè jơh să bồ gơtìp gơguh huyết áp, kòp đồm sơdàng, kóp gut, kòp kồ ntìng… ală cau gơtìp gơguh huyết áp, đồm sơdàng pal lòt kham jăt tơngai nàng geh sền gròi klồng măt, kơrian gơtìp tus mờ Glôcôm. Is ồn, uă cau kòp dờng sơnam mờng ngui sơnơm brê… uă bơta di gơlan gơtìp Glôcôm gơlik geh tơnơ̆ mờ tŭ ngui ală bơta sơnơm do. Bơdìh hơ̆ tai, cau kơnòm să gơtìp ờ loh măt tŭ sền ngài, ờ loh măt sền ngài mơya khà gơguh mhar ngan kung pal sền gròi Glôcôm tài geh uă cau gơguh ờ loh măt tŭ sền nàgi mhar neh gơtìp Glôcôm. Ală cau do kung pal lòt kham mờ geh rơwah kòp gờñ”.

Mờ ală cau neh geh sền gŏ gơtìp kòp Glôcôm, cau kòp pal kis bal mờ kòp do tus jơh rài tơn, mờ broă gơtìp jơngo măt là ờ gơtùi sền loh wơl; den tàng broă sền gròi sơm kòp là kwơ màng ngan. Cau kòp geh sơm mờ sơnơm pal ngui sơnơm di tŭ, kham di tơngai neh pơrgon, bañ ơm is ngui sơnơm nàng gàr sùm bơta loh măt gam tai, pleh mờ gơtìp jơngo măt tơn.