Đềt mềr mờ broă lơh sơnơm tàm xã neh rơlao 20 nam, tềl jơng lòt bơh lŏ Nguyễn Thị Hiền neh gŏ tàm 13 thôn, ƀòn bơh xã Ea Kiết, kơnhoàl Cư̆ Mgar dê. Broă lơh, lơh broă mblàng yal, lam sồr làng bol tơnguh nùs nhơm git wă tàm broă rơcang sơndră mờ kòp, yal wơl tơngai cit sơnơm rơcang sơndră mờ kòp, tus bal rơcang sơndră mờ kòp sốt rét, kòp sốt xuất huyết, lam sồr ờ deh kòn dơ̆ 3… geh ală tŭ lơh geh tus mờ lŏ in geh uă jơnau niam, jơnau moăt. Lŏ Nguyễn Thị Hiền pà git: “Nam hơ̆ là nam 2004 tus nhai 6 trồ mìu mờ broă lòt cit sơnơm tàm ƀòn kòn cau Mông gơtìp glar bòl ngan, tŭ hơ̆ lòt gùng brê mờ lòt ndang cèng thùng mrềt vaccsin ndang, nam hơ̆ tiă gan croh dà jàng lah gơtìp dà pơrdô mờ chơ̆t bloh, lòt ndang kơlôi ndang nđah lah añ mŭt lơh broă tàm gah broă do, mơya añ kơlôi làng bol pin dờn, làng bol sùm kơ̆p gơn añ tàm hơ̆ là ală tiah kờñ añ tus mờ añ gŏ nùs nhơm gơguh pràn mờ ală bơta glar bòl, kòl jan kal ke ndrờm sơrlèt jơh. Bơh tŭ hơ̆ sền git să tờm là cau glar bòl mờ cèng geh bơta chờ ai ală tiah glar bòl in rơlao mờ añ, den tàng añ gơlơh chờ hờp ngan rơlao”.

Mờ nùs nhơm kơlôi broă lơh sơnơm là broă lơh niam mờ pơnyờ să ngan, den tàng mờ cau kòp, lŏ Hiền sùm sền bè cau pròc mhàm să tờm dê, đềt mềr, còp să mờ sền gròi tam pà bal ală jơnau. Kơnờm mờ hơ̆, jơh ală làng bol kis tàm xã Ea Kiết ndrờm rơwah Hìu sơnơm xã là anih kham, sơm kòp lài ngan; git bè broă drơng gàr, sền gàr bơta pràn kơl dang să jan bơh tŭ hơ̆ kung rơhời geh gơguh sơl, rài kis bơh làng bol tàm tiah do neh tam gơl sơl jăt mờ ngai. Lŏ H’ Luôr Byă, kis tàm ƀòn Ya Wầm A, xã Ea Kiết pà git: “Kơnờm mờ broă bơto pơlam bơh ală bi lơh broă tàm Hìu sơnơm xã dê, tàm hơ̆ uă ngan là bi Hiền ñhăp ñhar bơto pơlam bol añ in bè broă sền gàr kơnòm dềt bơh tŭ añ geh bun tus tàm tŭ añ deh kòn. Bơh tŭ hơ̆ añ geh tai jơnau git wă bè broă drơng gàr mờ sền gàr kòn di mờ bơta bơtàu tơnguh bơh bồ tơngoh ngăc ngar, nùs nhơm bal mờ pràn kơl dang să jan kòn dê”.

Tềng đăp mờ broă tam gơl sồ, ùr kwang atbồ Hìu sơnơm xã lơh ngan jòi sền tàm kông nghệ, phần mềm drơng tàm broă lơh. Bơdìh hơ̆ tai, lŏ gam bơsram is, bơtơl jơnau git wă geh kwơ nàng jòi geh broă mblàng jơnau yal, lam sồr niam ngan ai làng bol in. Tàm gơnoar broă atbồ Hìu sơnơm xã, lŏ geh broă tam pà bal broă lơh loh làng, di pal mờ broă lơh bơh tơl nă cau dê nàng lơh geh cồng nha broă rơcang gàr lài mờ bơto, pơlam, kham, sơm kòp. Mờ lŏ kung sền kwơ tàm broă bơ̆t bơtàu bơta git gơ̆p, tam klăc bal, đềt mềr bal tàm anih lơh broă, ai geh bơta niam nàng dong kờl bal ală oh mi lơh broă nàng gơguh jăk bal. Ƀák sĩ Đa khoa H’ Pim AYun, Phó kwang atbồ Hìu sơnơm xã Ea Kiết-do là cau neh geh 14 nam lơh broă bal mờ lŏ Hiền tàm broă kham, sơm kòp ai làng bol kis tàm xã Ea Kiết in pà git: “Tŭ mŭt tàm Hìu sơnơm do geh cau bi ñhăp ñhar bè hơ̆ den kung geh dong kờl añ uă ngan sơl, tŭ añ ờ git den lùp bi mờ bi jơh nùs bơto añ in den añ kung geh bơta git wă tai, geh tai bơta pràn nàng gơguh jăk rơlao”.

Là xã tiah ngài, ngài mờ tiah tờm kơnhoàl Cư̆ Mgar dê 25 kơi sồ, Ea Kiết geh mờr 1 bơnah 3 khà kờp làng bol là kòn cau, rài kis gam uă kal ke. Nàng tam gơl nùs nhơm kơlôi sơnơng bơh làng bol dê tàm broă drơng gàr, sền gàr bơta pràn kơl dang să jan, lŏ Hiền neh pơlam kấp ủy, gơnoar atbồ bal mờ ală mpồl lơh broă tàm xã in bơyai lơh mblàng yal, tơnguh uă jơnau git wă, git wă tàm broă sền gàr is bơta pràn kơl dang să jan mpồl bơtiàn; sền kwơ broă pơs wàs kloh niam tiah kis. Tàm hơ̆ uă ngan tàm tơngai kòp Kovid-19 bơh nam 2019 tus 2022, lŏ neh lơh niam broă pơlam kấp ủy Đảng, gơnoar atbồ bơ̆t bơtàu ală broă lơh nàng rơcang gàr lài, tam dră mờ kòp gơtờp geh cồng nha. Ồng Trần Trung Hiếu, Phó Củ tịc UɃÑZ xã Ea Kiết, kơnhoàl Cư̆ Mgar đơs bè ùr kwang atbồ Hìu sơnơm xã Nguyễn Thị Hiền bè do: “Tài kis ngài mờ tiah tờm kơnhoàl dê, den tàng gơnoar broă bơh Hìu sơnơm xã kwơ màng ngan, lơh broă kham sơm kòp lài ngan ai làng bol in. Tàm do, ùr kwang atbồ Hìu sơnơm neh ngui gơnoar pơlam di tŭ Ủy ƀan xã kung bè Đảng ủy in nàng geh tơl sơnơm nàng kham, sơm kòp ai làng bol in. Tus tŭ do xã kung neh lơh niam broă kham sơm kòp, den tàng khà rơgai tàm kơnòm dềt kung bè làng bol gam geh bun mờ ală broă lơh ndai ndrờm niam mờ Hìu sơnơm pah nam ndrờm geh khà dà lơgar bè lơh sơnơm”.

20 nam soh ào blouse kò, cồng nha bơh lŏ geh uă mờ uă sră jờng rơ tàm broă lơh, mơya di gơlan bơta phan jờng rơ dờng ngan gơwèt mờ lŏ Nguyễn Thị Hiền dê là nùs nhơm pin dờn bơh làng bol dê gơwèt mờ Hìu sơnơm xã Ea Kiết. Bơta do neh bơtơl tai ai lŏ in geh uă bơta chờ, bơta pràn nàng pơn jăt tai ñhăp ñhar jơh nùs mờ broă lơh.