Broă lơh ơn broă tờm tàm jơnau yal bè nùs nhơm mờ bơta pin dờn kờñ gơboh bơh làng bol dê gơ wèt mờ Đảng tàm ală tŭ đơng lam dà lơgar sơrlèt kal ke, bơta lòng; pơgồp bơnah lơh gơlik nùs nhơm chờ hờp, ring bal, lơh kah wơl nùs nhơm tam klăc, kơnòl mờ kơ̆p kờñ ngan tă pơgồp dà kơlhề.

Mờ rơndăp tăp sèng geh pe tăp, broă lơh đơs crih tam ya cèng tus uă nùs nhơm ngoh rơngăc ai cau sền in. Tăp I – “Jơnau dà lơgar” lam cau sền rê wơl mờ mò pàng rài yau bal mờ ală jơnau đơs pơnđiang, jơnau đơs pơnđik, gùng đơs crih bơh yau, lơh gơlik geh ù tiah ờs bè ờs ngan, bềng uă nàng gĭt gŏ geh hwềng nùs niam chài Việt Nam dê. Tăp II – “Rài kis tŭ do” pờ gơlik ù tiah gơ lòt mờ tam gơl pa, gùng đơs crih pa ngan, pa tŭ do mơya kung gam gàr bè ờs nùs nhơm Việt Nam, tơnggŏ bơta lòt guh bơh dà lơgar dê tàm rài mŭt gơrờm bal mờ ală lơgar. Tăp III – “Rùp pơrhê king crŭ” là ngoh rơngăc ngan rlau jơh, jờng rơ yờ tơngguh rùp pơrhê – rùp pơrya bơh Đảng mờ Dà lơgar dê. Ală jơnau đơs crih niam bơnĕ ngan tàm bơrlŭ bal đah bơhiàn ờs mờng bơh yau mờ bơceh lơh pa, tơnggŏ bơta pin dờn mờ kơ̆p kờñ ngan tă pơgồp dà kơlhề, wèt tus jơnau kờñ bơ̆t bơtàu dà lơgar dờng pràn, jak chài, pas sơm.