Măng chờ Bơrlŭ bal săp Cing mồng Tiah đah jum măt tơngai Lik câu Á nam 2025 geh 3 mpồl ală lơgar mờ 5 mpồl cau chài tàm lơgar, tus bal, geh: Lào, Campuchia, Malaysia; ală càr: Lâm Đồng, Dăk Lăk, Gia Lai, Quảng Ngãi mờ Phú Thọ. Đơs tàm dơ̆ bơyai lơh, ồng Đinh Văn Tuấn, Phó Củ tịc Anih duh broă Làng bol càr Lâm Đồng đơs nền bơta kwơ pơnrơ, bơta pràn lơh gơrề pràn kơldang mờ jơnau tơl pràn tàm tơrbŏ hwềng nùs bơh ală săp ntas cing mồng dê. Mang chờ Bơrlŭ bal săp Cing mồng Tiah đah jum măt tơngai Lik câu Á nam 2025 ờ mìng là dùl ù tiah yờ tơngguh jờng rơ muh măt phan lời wơl lơm mờ gam là tiah tàm tìp bal bơh bơceh lơh, tàm tơrbŏ mpồl bơtiàn, kơ̆p kờñ ngan brồ guh bơh niam chài Việt Nam dê tàm gùng lòt kơnhoàl ù tiah do mờ ală lơgar dê:

“Tàm jơh ală tŭ tơngai jòng kah yau cing mồng ờ mìng là phan ngui đơs crih lơm, hơ̆ là hwềng nùs, là jơnau đơs cau Tây Nguyên dê mờ brê bơnơm dờng. Tơl bơta tàm njăt săp ntas cing là dùl jơnau yal, tơl săp ntas là dùl nhơm tă niam chài, dùl gùng lòt tàm tơrbŏ jơnau neh rlau, tŭ do mờ tơnơ̆ do. Mang chờ Bơrlŭ bal săp Cing mồng Tiah đah jum măt tơngai Lik câu Á nam 2025 ngan là tŭ nàng săp cing mpòng ngài lòt gan tiah nhàr lơgar tàm tơrbŏ gơ̆p bơyô kơnhoàl ù tiah do lơh gơlik gơs jơnau bơrlŭ bal săp bal li la niam chài mờ nùs nhơm tam klăc”.

Broă Kra ƀòn lơh Yàng tàm măng chờ pơyua tus yàng in jơnau đơs kơ̆p kờn ai ƀòn lơgar in lơngăp lơngai, kàl lơh sa niam mờ ai lơh chờ in geh lơh wil tơl nùs nhơm kờñ gơboh bal. Tàm mpràp lơh tơnggŏ wơl rài kis ƀòn ờs mờng bơh yau bal mờ Hìu rông, drăp tơrnờm, bơnhă ồs ndu tàm gơcrà àng…ală mpồl cing mồng dròng săp ntas brê bơnơm dờng dê, bơh bơta tam klăc, bơta chờ hờp mờ rài kis mpồl bơtiàn tam klăc đềt mềr bal.

Mang chờ là tŭ nàng ală cau chài càr Lâm Đồng tìp măt lơh kwèng lùp bơsram, tàm lùp mờng chài mơkung yal tơnggĭt, yal uă rùp hin niam chài, kòn bơnus cau Lâm Đồng mờ ală jơi bơtiàn, năc lòt nhơl tàm lơgar mờ ală lơgar. Bi Ka Duýp, Mpồl cau chài kòn cau K’Ho ơm tàm sàh Đinh Trang Thượng, càr Lâm Đồng, pà gĭt:

“Bol hi tus bơh Mpồl Cing mồng bal mờ rlau 40 nă cau mờ bal mờ dùl nùs nhơm là chờ hờp ngan kờñ mŭt gơrờm bal, kờñ lùp bơsram bơh ală mpồl bơyô dê, kờñ gŏ geh bơta niam chài krơi is bơh ală jơi bơtiàn ndai dê. Bơh ală lùp bơsram geh bơh mpồl bơyô dê cèng wơl ală bơta pa ngan ai mpồl cing he dê in”.

Măng chờ Bơrlŭ bal săp Cing mồng Tiah đah jum măt tơngai Lik câu Á nam 2025, Mpồl Cau lơh geh cồng nha jơnhoa ngan rlau jơh Dà lơgar Việt Nam – Mpồl Lơh geh cồng nha jơnhoa ngan rlau jơh Việt Nam neh jàu Jơnau lơh nền dờn dờp 2 Cồng nha lơh geh jơnhoa ngan rlau jơh Việt Nam ai Anih duh broă Làng bol càr Lâm Đồng in, geh: Cồng nha lơh geh jơnhoa ngan rlau jơh “Ù tiah dròng cing jañ mồng pơgồp bal niam chài đơs crih tam ya dờng ngan” mờ Cồng nha lơh geh jơnhoa ngan rlau jơh “Jơnau lơh đơs crih tam ya ngan ngồn pơgồp bal mờ dròng cing jañ mồng tàm tơrbŏ mpồl bơtiàn, bơtòm tơrgùm ală cau chài, cau chài mờng – cau lơh pơgăp mờ làng bol tus bal gal ngan rlau jơh gơ wèt mờ jơnau lơh We ara LamDong”.

Dơ̆ do, tàm Dà Làc, Lâm Đồng gam geh lơh uă broă lơh li la gơkờn ngan, bè: broă lơh soh phan lơh bơh ồi yau ai cau in sền, Lơh chờ Phan lời wơl Kơphê gùt plai ù nam 2025 bal mờ uă ù tiah lòt sền gŏ, pơrjum cribơyai mìng dùl tơngume, broă lơh niam chài – lòt nhơl lơh gơkờñ, is ồn là mang đơs crih mờ Countdown chờ hờp wă rò sơnam pa. Ală broă lơh ờ mìng yờ tơngguh jờng rơ muh măt phan lời wơl niam chài, yal uă rùp hin ƀòn lơgar dê mờ gam lơh gơlik geh nùs nhơm lơh chờ duh hồl nggồr chờ hờp, gơhòi gơ jà làng bol mờ năc lòt nhơl tus mờ Dà Làc tàm ală ngai lồi sơnam.